ಮೀರತ್ (ಉತ್ತರ ಪ್ರದೇಶ): ನೀರೆಂದು ಭಾವಿಸಿ ಸೀಲ್ಡ್ ನೀರಿನ ಬಾಟಲಿಯಿಂದ ಕುಡಿದ ಯುವ ಶಿಕ್ಷಕಿಯೊಬ್ಬರು ತೀವ್ರ ಸಾಂದ್ರತೆಯ ಆಸಿಡ್ ಸೇವಿಸಿ ಗಂಭೀರವಾಗಿ ಅಸ್ವಸ್ಥಗೊಂಡಿರುವ ಘಟನೆ ಉತ್ತರ ಪ್ರದೇಶದ ಮೀರತ್ನಲ್ಲಿ ನಡೆದಿದೆ. ಸದ್ಯ ವೈದ್ಯಕೀಯ ಕಾಲೇಜು ಆಸ್ಪತ್ರೆಯ ತೀವ್ರ ನಿಗಾ ಘಟಕದಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದು, ಅವರ ಸ್ಥಿತಿ ಚಿಂತಾಜನಕವಾಗಿದೆ.
ಲಭ್ಯವಿರುವ ಮಾಹಿತಿಯ ಪ್ರಕಾರ, ಯುವ ಶಿಕ್ಷಕಿ ಆಭರಣ ಖರೀದಿಸಲು ಸ್ಥಳೀಯ ಚಿನ್ನದ ಅಂಗಡಿಗೆ ತೆರಳಿದ್ದರು. ಈ ವೇಳೆ ಅವರಿಗೆ ಬಾಯಾರಿಕೆಯಾದ ಕಾರಣ ಪಕ್ಕದ ಅಂಗಡಿಯ ಡೀಪ್ ಫ್ರೀಜರ್ನಿಂದ ತರಲಾದ ಸೀಲ್ಡ್ ನೀರಿನ ಬಾಟಲಿಯನ್ನು ನೀಡಲಾಗಿತ್ತು. ಬಾಟಲಿಯ ಸೀಲ್ ಒಡೆದು ನೀರು ಎಂದು ಭಾವಿಸಿ ಕುಡಿದ ತಕ್ಷಣವೇ ಗಂಟಲು ಹಾಗೂ ಹೊಟ್ಟೆಯಲ್ಲಿ ತೀವ್ರ ಉರಿ ಕಾಣಿಸಿಕೊಂಡಿದ್ದು, ಅವರು ನೋವಿನಿಂದ ಕಿರುಚಾಡಿದ್ದಾರೆ.
ಪರಿಶೀಲಿಸಿದಾಗ ಬಾಟಲಿಯಲ್ಲಿದ್ದ ದ್ರವ ನೀರಲ್ಲ, ತೀವ್ರ ಸಾಂದ್ರತೆಯ ಆಸಿಡ್ ಎಂಬುದು ಬೆಳಕಿಗೆ ಬಂದಿದೆ. ತಕ್ಷಣವೇ ಅವರನ್ನು ಆಸ್ಪತ್ರೆಗೆ ದಾಖಲಿಸಲಾಗಿದ್ದು, ವೈದ್ಯರು ತುರ್ತು ಚಿಕಿತ್ಸೆ ನೀಡುತ್ತಿದ್ದಾರೆ.
ಘಟನೆಗೆ ಸಂಬಂಧಿಸಿದಂತೆ ಪೊಲೀಸರು ಜ್ಯುವೆಲ್ಲರಿ ಅಂಗಡಿ ಹಾಗೂ ತಂಪು ಪಾನೀಯ ಮಾರಾಟಗಾರರನ್ನು ವಿಚಾರಣೆಗೆ ಒಳಪಡಿಸಿದ್ದಾರೆ. ಆದರೆ, ತಮಗೆ ಕಂಪನಿಯಿಂದಲೇ ಸೀಲ್ಡ್ ಬಾಟಲಿ ಬಂದಿದ್ದು, ಅದರೊಳಗೆ ಆಸಿಡ್ ಹೇಗೆ ಸೇರಿತು ಎಂಬುದು ತಿಳಿದಿಲ್ಲ ಎಂದು ಅಂಗಡಿ ಮಾಲೀಕರು ತಿಳಿಸಿದ್ದಾರೆ.
ಬ್ರಾಂಡೆಡ್ ಸೀಲ್ಡ್ ನೀರಿನ ಬಾಟಲಿಯಲ್ಲಿ ಆಸಿಡ್ ಹೇಗೆ ಸೇರಿಕೊಂಡಿತು? ಉತ್ಪಾದನಾ ಹಂತದಲ್ಲೇ ಲೋಪವಾಗಿದೆಯೇ ಅಥವಾ ಸರಬರಾಜು ಸರಪಳಿಯಲ್ಲಿ ಯಾರಾದರೂ ದುಷ್ಕೃತ್ಯ ಎಸಗಿದ್ದಾರೆಯೇ ಎಂಬ ಎಲ್ಲಾ ಆಯಾಮಗಳಲ್ಲೂ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ. ಬಾಟಲಿಯನ್ನು ವಿಧಿವಿಜ್ಞಾನ ಪ್ರಯೋಗಾಲಯಕ್ಕೆ (ಎಫ್ಎಸ್ಎಲ್) ಕಳುಹಿಸಲಾಗಿದ್ದು, ವರದಿ ಬಂದ ಬಳಿಕ ನಿಖರ ಕಾರಣ ತಿಳಿಯುವ ಸಾಧ್ಯತೆಯಿದೆ.
ಈ ಘಟನೆ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕ ಚರ್ಚೆಗೆ ಕಾರಣವಾಗಿದ್ದು, ಪ್ಯಾಕೇಜ್ಡ್ ಕುಡಿಯುವ ನೀರಿನ ಸುರಕ್ಷತೆ ಮತ್ತು ಗ್ರಾಹಕರ ಭದ್ರತೆ ಕುರಿತು ಸಾರ್ವಜನಿಕರು ತೀವ್ರ ಕಳವಳ ವ್ಯಕ್ತಪಡಿಸಿದ್ದಾರೆ. ಪ್ರಕರಣಕ್ಕೆ ಸಂಬಂಧಿಸಿದಂತೆ ಅಧಿಕಾರಿಗಳಿಂದ ಇನ್ನೂ ಅಧಿಕೃತ ಅಂತಿಮ ಹೇಳಿಕೆ ಪ್ರಕಟವಾಗಿಲ್ಲ.
ಈ ಪ್ರಕರಣದ ಬಗ್ಗೆ ಆರಂಭಿಕ ಮಾಹಿತಿಯಷ್ಟೇ ಲಭ್ಯವಿದ್ದು, ತನಿಖೆ ಪೂರ್ಣಗೊಂಡ ನಂತರವೇ ಬಾಟಲಿಯಲ್ಲಿ ಆಸಿಡ್ ಇದ್ದ ನಿಖರ ಕಾರಣ ಸ್ಪಷ್ಟವಾಗಲಿದೆ.
