ಬಹರೈನ್: ಇಲ್ಲಿ ನಡೆದ ಬಿಲ್ಲವರ ಸಂಘದ 20ನೇ ವರ್ಷದ ಆಚರಣೆಯ ಸಂದರ್ಭದಲ್ಲಿ ವಿವಿಧ ಕ್ಷೇತ್ರದಲ್ಲಿ ಮಿಂಚಿದಂತಹ ಸಾಧಕರನ್ನು ಗೌರವಿಸುವಂತಹ ಕಾರ್ಯಕ್ರಮವು ನಡೆಯಿತು.

ಈ ಸಂದರ್ಭದಲ್ಲಿ ಕೊಡವೂರು ವಾರ್ಡಿನ ನಗರಸಭಾ ಸದಸ್ಯ ವಿಜಯ್ ಕೊಡವೂರು ಅವರನ್ನು ಗೌರವಿಸುವ ಕಾರ್ಯ ನಡೆಯಿತು.

ಈ ಕಾರ್ಯಕ್ರಮವನ್ನು ಉದ್ದೇಶಿಸಿ ಮಾತನಾಡಿದ ಬಹರೈನ್ ಬಿಲ್ಲವ ಸಂಘದ ಅಧ್ಯಕ್ಷ ಹರೀಶ್ ಕೊಡವೂರು, ಕೊಡವೂರು ವಾರ್ಡ್ ಒಂದು ಮಾದರಿ ವಾರ್ಡ್ ಆಗಿದೆ. ಅಲ್ಲಿಯ ಜನಪ್ರತಿನಿಧಿಯಾದ ವಿಜಯ್ ಕೊಡವೂರು ಮತ್ತು ಅಲ್ಲಿಯ ಕಾರ್ಯಕರ್ತರ ಗುಂಪು ಕೊಡವೂರಿನ ಎಲ್ಲಾ ಮನೆಗಳನ್ನು ಸರ್ವೆ ನಡೆಸಿ ಸ್ವಾವಲಂಬಿ ಗ್ರಾಮವನ್ನಾಗಿ ಮಾಡಬೇಕು ಎನ್ನುವ ನಿಟ್ಟಿನಲ್ಲಿ 17 ಸಮಿತಿಗಳನ್ನು ರಚಿಸಿ ಸ್ವಾವಲಂಬಿ ಮಾದರಿ ವಾರ್ಡ್ ಮಾಡುವ ಕಾರ್ಯವು ಇಡೀ ದೇಶಕ್ಕೆ ಮಾದರಿಯಾಗಿದೆ. ಆದ್ದರಿಂದ ಕೊಡವೂರು ವಾರ್ಡಿನ ಕಾರ್ಯಗಳನ್ನು ಗುರುತಿಸಿ ಬಿಲ್ಲವ ಸಂಘದ ವತಿಯಿಂದ ನಗರಸಭಾ ಸದಸ್ಯರಾದ ವಿಜಯ್ ಕೊಡವೂರು ಇವರನ್ನು ಗೌರವಿಸುತ್ತಿದೆ ಎಂದು ತಿಳಿಸಿದರು.

ಇದೇ ರೀತಿ ಎಲ್ಲಾ ಗ್ರಾಮಗಳಲ್ಲೂ ಎಲ್ಲಾ ವಾರ್ಡ್ ಗಳಲ್ಲೂ ಮಾಡಿದರೆ ನಮ್ಮ ದೇಶ ಪರಮ ವೈಭವದ ಸ್ಥಿತಿಗೆ ಹೋಗುವುದು ಹಾಗೂ ವಿಶ್ವದಲ್ಲಿಯೇ ನಂಬರ್ ವನ್ ಆಗುವುದು ಮತ್ತು ಮೋದಿಯ ಯೋಚನೆ ಯೋಜನೆಗಳು ಸಾಕಾರವಾಗುವುದು ಎಂದರು.