ಮುಂಬೈ: ನಟಿ ಅನುಷ್ಕಾ ಶರ್ಮ ಧರಿಸಿದ್ದ ತುಳಸಿ ಕಂಠಿ ಮಾಲೆ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್ ಆಗಿದ್ದು, ಅದರ ಪರಿಣಾಮವಾಗಿ ವಿವಿಧ ಬ್ರ್ಯಾಂಡ್ಗಳ ತುಳಸಿ ಮಾಲೆಗಳ ಬೇಡಿಕೆ ಮತ್ತು ಮಾರಾಟದಲ್ಲೂ ಗಮನಾರ್ಹ ಏರಿಕೆ ಕಂಡುಬಂದಿದೆ.
ಇತ್ತೀಚೆಗೆ ನಡೆದ ಐಪಿಎಲ್ ಫೈನಲ್ ಪಂದ್ಯದಲ್ಲಿ ಅನುಷ್ಕಾ ಶರ್ಮಾ ಧರಿಸಿದ್ದ ಗಾಢ ಬಣ್ಣದ ತುಳಸಿ ಕಂಠಿ ಮಾಲೆ ಅಭಿಮಾನಿಗಳ ಗಮನ ಸೆಳೆದಿತ್ತು. ಪಂದ್ಯ ಪ್ರಸಾರದ ಬಳಿಕ ಸಾಮಾಜಿಕ ಜಾಲತಾಣಗಳಲ್ಲಿ ಈ ಮಾಲೆಯ ಕುರಿತು ವ್ಯಾಪಕ ಚರ್ಚೆ ಆರಂಭವಾಗಿದ್ದು, ಅನೇಕರು ಅದೇ ಮಾದರಿಯ ಮಾಲೆಯನ್ನು ಖರೀದಿಸಲು ಆಸಕ್ತಿ ತೋರಿದ್ದಾರೆ.
ಇನ್ಸ್ಟಾಗ್ರಾಂ ಸ್ಟೋರ್ ‘ಐ ಲವ್ ಮಾಯಾಪುರ’ ಸಂಸ್ಥಾಪಕ ಪೀಟರ್ ಪ್ಯಾನ್ಸ್ಟಿಂಗಲ್ ಅವರ ಪ್ರಕಾರ, ಕಳೆದ ಕೆಲವು ವಾರಗಳಲ್ಲಿ ತುಳಸಿ ಮಾಲೆಗಳ ಮಾರಾಟದಲ್ಲಿ ಶೇ.10ರಿಂದ 15ರಷ್ಟು ಏರಿಕೆ ದಾಖಲಾಗಿದೆ. ಹೆಚ್ಚಿನ ಗ್ರಾಹಕರು ಅನುಷ್ಕಾ ಧರಿಸಿದ್ದ ಮಾದರಿಯ ಮಾಲೆಯನ್ನೇ ಕೇಳುತ್ತಿರುವುದಾಗಿ ಅವರು ತಿಳಿಸಿದ್ದಾರೆ.
ವೃಂದಾವನ ಮೂಲದ ‘ಪ್ಯೂರ್ ತುಳಸಿ ಮಾಲಾ’ ಸಂಸ್ಥೆಯ ರೋಹಿತ್ ಗುಪ್ತಾ ಅವರ ಪ್ರಕಾರ, ವಿಶೇಷವಾಗಿ ಗಾಢ ಬಣ್ಣದ ತುಳಸಿ ಮಾಲೆಗೆ ಬೇಡಿಕೆ ಹೆಚ್ಚಾಗಿದೆ.
ಸಾಂಪ್ರದಾಯಿಕವಾಗಿ ತುಳಸಿ ಕಂಠಿ ಮಾಲೆಯನ್ನು ಭಕ್ತಿಯ ಸಂಕೇತವಾಗಿ ಪರಿಗಣಿಸಲಾಗುತ್ತದೆ. ತುಳಸಿ ಗಿಡದ ಕಾಂಡದಿಂದ ತಯಾರಿಸಲಾಗುವ ಈ ಮಾಲೆಗಳ ಬೆಲೆ ಸಾಮಾನ್ಯವಾಗಿ ₹150ರಿಂದ ₹700ರವರೆಗೆ ಇರುತ್ತದೆ.
ಅನುಷ್ಕಾ ಶರ್ಮಾ ಹಾಗೂ ಅವರ ಪತಿ, ಭಾರತೀಯ ಕ್ರಿಕೆಟಿಗ ವಿರಾಟ್ ಕೊಹ್ಲಿ ವೃಂದಾವನದ ಆಧ್ಯಾತ್ಮಿಕ ಗುರು ಪ್ರೇಮಾನಂದ ಗೋವಿಂದ ಶರಣ್ ಅವರ ಅನುಯಾಯಿಗಳಾಗಿದ್ದಾರೆ. ಅನುಷ್ಕಾ ಹೆಚ್ಚಾಗಿ ಎರಡು ಸುತ್ತಿನ ತುಳಸಿ ಕಂಠಿ ಮಾಲೆ ಧರಿಸಿರುವುದು ಕಂಡುಬರುತ್ತದೆ.
ಇಸ್ಕಾನ್ ದ್ವಾರಕಾದ ತುಷ್ಟ್ ಗೌರ್ ಅವರ ಪ್ರಕಾರ, ಒಂದು ಅಥವಾ ಎರಡು ಸುತ್ತಿನ ತುಳಸಿ ಕಂಠಿ ಮಾಲೆಯನ್ನು ಶ್ರೀಕೃಷ್ಣ ಭಕ್ತರು ಹಾಗೂ ವೈಷ್ಣವ ಸಂಪ್ರದಾಯದ ಅನುಯಾಯಿಗಳು ಧರಿಸುತ್ತಾರೆ. ಮೂರು ಸುತ್ತಿನ ಮಾಲೆಯನ್ನು ಗುರುಗಳಿಂದ ದೀಕ್ಷೆ ಪಡೆದ ಭಕ್ತರು ಧರಿಸುವ ಸಂಪ್ರದಾಯವಿದೆ.
