ಪುತ್ತೂರು: ಪುತ್ತೂರು ಸಮೀಪದ ಪೋಳ್ಯದಲ್ಲಿ ನಡೆದ ಒಂದು ಅಪರೂಪದ ಘಟನೆ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿದೆ. ಮನೆಯ ಸದಸ್ಯನಂತೆಯೇ ಪ್ರೀತಿಯಿಂದ ಸಾಕಿದ್ದ ದೇಸಿ ತಳಿಯ ‘ಚಿನ್ನು’ ಎಂಬ ನಾಯಿ ಕಾಣೆಯಾದಾಗ, ಅದರ ಮಾಲೀಕ ಗಣೇಶ್ ಕೇರ ಅವರು ಪಟ್ಟ ಆತಂಕ ಮತ್ತು ಹುಡುಕಾಟ ಕೊನೆಗೂ ಸಂತಸದ ಕ್ಷಣಕ್ಕೆ ಕಾರಣವಾಗಿದೆ. ಕೊಟ್ಟ ಮಾತಿನಂತೆ ನಾಯಿ ಹುಡುಕಿಕೊಟ್ಟವರಿಗೆ ಬರೋಬ್ಬರಿ ₹50 ಸಾವಿರ ಬಹುಮಾನ ನೀಡಿ ಅವರು ಮಾನವೀಯತೆ ಮೆರೆದಿದ್ದಾರೆ.

ಗಣೇಶ್ ಕೇರ ಅವರು ತಮ್ಮ ಮನೆಯಲ್ಲಿ ಸುಮಾರು 30 ನಾಯಿಗಳನ್ನು ಸಾಕುತ್ತಿದ್ದು, ಅವುಗಳನ್ನು ಕುಟುಂಬದ ಸದಸ್ಯರಂತೆ ನೋಡಿಕೊಳ್ಳುತ್ತಾರೆ. ಅವುಗಳಲ್ಲಿ ‘ಚಿನ್ನು’ ಎಂಬ ದೇಸಿ ತಳಿಯ ನಾಯಿಗೆ ಫಿಟ್ಸ್ ಸಮಸ್ಯೆಯಿಂದಾಗಿ ಕಾಲಿನ ಸ್ವಾಧೀನ ಕಳೆದುಕೊಂಡಿತ್ತು. ಸುಮಾರು ಮೂರು ವಾರಗಳ ಹಿಂದೆ ಈ ವಿಶೇಷ ನಾಯಿ ನಾಪತ್ತೆಯಾದಾಗ ಗಣೇಶ್ ಅವರು ತೀವ್ರ ಕಳವಳಕ್ಕೊಳಗಾಗಿದ್ದರು.

ನಾಯಿಯನ್ನು ಪತ್ತೆಹಚ್ಚಲು ಅವರು ಸಾಮಾಜಿಕ ಜಾಲತಾಣಗಳು ಹಾಗೂ ಪತ್ರಿಕೆಗಳಲ್ಲಿ ಜಾಹೀರಾತು ನೀಡಿ, ಸುಳಿವು ನೀಡಿದವರಿಗೆ ಅಥವಾ ನಾಯಿಯನ್ನು ಹುಡುಕಿಕೊಟ್ಟವರಿಗೆ ₹50 ಸಾವಿರ ಬಹುಮಾನ ನೀಡುವುದಾಗಿ ಘೋಷಿಸಿದ್ದರು. ಅಲ್ಲದೆ, ವಿವಿಧ ಸ್ಥಳಗಳಲ್ಲಿ ಬ್ಯಾನರ್‌ಗಳನ್ನೂ ಅಳವಡಿಸಿ ಹುಡುಕಾಟ ಮುಂದುವರಿಸಿದ್ದರು.

ಇದಕ್ಕೆ ಫಲ ಸಿಕ್ಕಿದ್ದು, ಪೋಳ್ಯದ ನಿವಾಸಿ ಪುರಂದರ ಅವರು ನಾಪತ್ತೆಯಾಗಿದ್ದ ‘ಚಿನ್ನು’ ನಾಯಿಯನ್ನು ಪತ್ತೆಹಚ್ಚಿ ಗಣೇಶ್ ಕೇರ ಅವರಿಗೆ ಒಪ್ಪಿಸಿದ್ದಾರೆ. ಇದರಿಂದ ಸಂತಸಗೊಂಡ ಗಣೇಶ್ ಅವರು ಪುರಂದರ ಅವರನ್ನು ಮನೆಗೆ ಆಹ್ವಾನಿಸಿ, ಕೊಟ್ಟ ಮಾತಿನಂತೆ ₹50 ಸಾವಿರದ ಚೆಕ್‌ ನೀಡಿ ಗೌರವಿಸಿದ್ದಾರೆ.

ಸಾಮಾನ್ಯವಾಗಿ ಸಾಕುಪ್ರಾಣಿಗಳು ಕಾಣೆಯಾದಾಗ ಬಹುಮಾನ ಘೋಷಿಸುವುದು ಕಂಡುಬರುತ್ತದೆ. ಆದರೆ ಕೊಟ್ಟ ಮಾತನ್ನು ಪಾರದರ್ಶಕವಾಗಿ ಉಳಿಸಿಕೊಂಡು ಪ್ರಾಣಿಗಳ ಮೇಲಿನ ಪ್ರೀತಿ ಹಾಗೂ ಮಾನವೀಯತೆಯನ್ನು ತೋರಿದ ಗಣೇಶ್ ಕೇರ ಅವರ ನಡೆ ಈಗ ಎಲ್ಲರ ಮೆಚ್ಚುಗೆಗೆ ಪಾತ್ರವಾಗಿದೆ. ಶ್ವಾನಪ್ರಿಯರ ಈ ಕಥೆ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ಪ್ರಾಣಿಗಳ ಮೇಲಿನ ಮಮತೆಯ ಒಂದು ಸುಂದರ ಉದಾಹರಣೆಯಾಗಿ ಗಮನ ಸೆಳೆಯುತ್ತಿದೆ.