ಬೆಂಗಳೂರು: ಈ ಹಿಂದೆ ವ್ಯಾಪಾರಿಗಳಿಗೆ ಗ್ರಾಹಕರ ಪೇಮೆಂಟ್​ ಇತಿಹಾಸವನ್ನು ಸುಲಭವಾಗಿ ತಿಳಿಯುವ ಉದ್ದೇಶದಿಂದ ಪಾವತಿ ಕುರಿತು ಸ್ಮಾರ್ಟ್​ ಸ್ಪೀಕರ್​ ನೋಟಿಫಿಕೇಶನ್​ ಅನ್ನು ಪರಿಚಯಿಸಿತು. ಇಷ್ಟು ದಿನ ಇಂಗ್ಲಿಷ್​ನಲ್ಲಿ ಈ ನೋಟಿಫಿಕೇಶನ್​ ಧ್ವನಿ ಕೇಳಿ ಬರುತ್ತಿತ್ತು. ಆದರೆ, ಇದೀಗ ಪ್ರಾದೇಶಿಕ ಭಾಷೆಗಳಲ್ಲೂ ಪರಿಚಯಿಸಿದೆ. ಡಿಜಿಟಲ್​ ಪೇಮೆಂಟ್​ ಪ್ಲಾಟ್​​ಫಾರ್ಮ್​​ನಲ್ಲಿ ಜನಸಾಮಾನ್ಯರ ಜನಪ್ರಿಯ ತಾಣವಾಗಿರುವ ಫೋನ್​ಪೇ ಇದೀಗ ಮತ್ತಷ್ಟು ವ್ಯಾಪಾರಿ ಸ್ನೇಹಿಯಾಗುವತ್ತ ಹೆಜ್ಜೆ ಇಟ್ಟಿದೆ.ವ್ಯಾಪಾರಿಗಳು ಇದೀಗ ತಮ್ಮ ಗ್ರಾಹಕರ ಹಣದ ವಹಿವಾಟಿನ ಮಾಹಿತಿಯನ್ನು ತಮ್ಮ ಭಾಷೆಗಳಲ್ಲಿ ಪಡೆಯುವ ಆಯ್ಕೆಯನ್ನು ಆರಿಸಿಕೊಳ್ಳಬಹುದು.

ಈ ಸ್ಮಾರ್ಟ್​ ಸ್ಪೀಕರ್​ ಇನ್ಮುಂದೆ ಹಣದ ವಾಹಿವಾಟಿನ ಮಾಹಿತಿಯನ್ನು ಕನ್ನಡ, ತಮಿಳು, ಮಲಯಾಳಂ, ತೆಲುಗಿನಲ್ಲಿ ನೀಡಲು ಸಿದ್ಧವಾಗಿದೆ. ಶೀಘ್ರದಲ್ಲೇ ಮರಾಠಿ ಸೇರಿದಂತೆ ಇನ್ನಿತರ ಪ್ರಾದೇಶಿಕ ಭಾಷೆಗಳಲ್ಲಿ ಬಿಡುಗಡೆ ಮಾಡುವ ಸಿದ್ಧತೆಯನ್ನು ಕಂಪನಿ ನಡೆಸಿದೆ

ಸದ್ಯ ಈ ಪೋನ್​ ಪೇ ಸ್ಮಾರ್ಟ್​ ಸ್ಪೀಕರ್​ ಭಾರತದ ಉದ್ಯಮದಲ್ಲಿ ಹೆಚ್ಚು ಮನ್ನಣೆ ಪಡೆದಿದ್ದು, ವ್ಯಾಪಾರಿಗಳು ಶೇ 90ರರಷ್ಟು ಬಳಕೆ ಮಾಡುತ್ತಿದ್ದಾರೆ. ಇದೀಗ ಭಾಷೆಗಳ ಸೌಲಭ್ಯ ಮತ್ತಷ್ಟು ವ್ಯಾಪಾರಿಗಳನ್ನು ಸೆಳೆಯಲಿದೆ. ವ್ಯಾಪಾರಿಗಳು ತಮ್ಮ ಬ್ಯುಸಿನೆಸ್​ ಆಪ್​​ ಮೂಲಕ ಯಾವುದೇ ಹೆಚ್ಚುವರಿ ಪಾವತಿ ಇಲ್ಲದೇ ಈ ಭಾಷಾ ಸೌಲಭ್ಯದ ಸೆಟ್ಟಿಂಗ್​​ ಪಡೆಯಬಹುದಾಗಿದೆ.

ಹೀಗೆ ಸೆಟ್​ ಮಾಡಿ: ಇನ್ನು ವ್ಯಾಪಾರಿಗಳು ಹೇಗೆ ಈ ಪ್ರಾದೇಶಿಕ ಭಾಷಾ ಆಯ್ಕೆಯನ್ನು ಈ ಫೋನ್​ ಪೇ ಸ್ಮಾರ್ಟ್​ ಸ್ಪೀಕರ್​ನಲ್ಲಿ ಪಡೆಯಬಹುದು ಎಂಬುದರ ಕುರಿತು ಸುಲಭ ಸೂಚನೆಗಳು ಇಲ್ಲಿವೆ.

ವರ್ನಾಕ್ಯುಲರ್​(ಭಾಷೆ) ವಾಯ್ಸ್​ ನೋಟಿಫಿಕೇಶನ್ ಮೂಲಕ ಇದೀಗ ವ್ಯಾಪಾರಿಗಳು ತಮ್ಮ ಗ್ರಾಹಕರ ಹಣದ ವಹಿವಾಟಿನ ಮಾಹಿತಿಯನ್ನು ತಮ್ಮ ಭಾಷೆಗಳಲ್ಲಿ ಪಡೆಯುವ ಆಯ್ಕೆಯನ್ನು ಆರಿಸಿಕೊಳ್ಳಬಹುದು. ಇದರಿಂದ ಅವರು ಪೇಮೆಂಟ್​ ಕುರಿತಾದ ವಿವರಗಳ ಧೃಢೀಕರಣಕ್ಕೆ ಗ್ರಾಹಕರ ಸ್ಕ್ರೀನ್​ ನಲ್ಲಿ ನೋಡುವ ಅವಶ್ಯಕತೆ ಎದುರಾಗುವುದಿಲ್ಲ. ಜೊತೆಗೆ ತಮ್ಮ ಭಾಷೆಗಳಲ್ಲೇ ಕೇಳುವುದರಿಂದ ಅವರಿಗೆ ಮತ್ತಷ್ಟು ಖಾತ್ರಿ ದೊರಕಲಿದೆ ಎಂದು ಸಂಸ್ಥೆ ತಿಳಿಸಿದೆ.

ವ್ಯಾಪಾರಿಗಳು ತಮ್ಮ ಫೋನ್​ಪೇ ಬ್ಯುಸಿನೆಸ್​ ಆಯಪ್ ಅನ್ನು ತೆರೆಯಬೇಕು, ಇಲ್ಲಿ ಹೋಂ ಸ್ಕ್ರೀನ್​ನ ಸ್ಮಾರ್ಟ್​ ಸ್ಪೀಕರ್​ ಸೆಕ್ಷನ್​ಗೆ ಭೇಟಿ ನೀಡಿ, ಅಲ್ಲಿ ಲಾಕ್ವೆಜ್​ ಬಾರ್​ನಲ್ಲಿ ನಿಮಗೆ ಬೇಕಾದ ಭಾಷೆಯನ್ನು ಆಯ್ಕೆ ಮಾಡಬಹುದು. ನೀವು ಆಯ್ಕೆ ಮಾಡಿದ ಭಾಷೆ ಸ್ಮಾರ್ಟ್​ ಸ್ಪೀಕರ್​ ಸಾಧನದಲ್ಲಿ ಡೌನ್​ಲೋಡ್​ ಆಗಲಿದ್ದು, ಈ ಸಾಧನವೂ ಹೊಸ ಅಪ್​ಡೇಟ್​ ಭಾಷೆಯೊಂದಿಗೆ ರೀಬೂಟ್​​ ಆಗುತ್ತದೆ.

ಕಳೆದ ವರ್ಷ ಬಿಡುಗಡೆ: ಫೋನ್​ ಪೇ ವಹಿವಾಟಿನಿಂದ ವ್ಯಾಪಾರಿಗಳು ಪ್ರತಿ ಬಾರಿ ಗ್ರಾಹಕರ ದೃಢೀಕರಣಕ್ಕೆ ಅವರ ಮೊಬೈಲ್​ ಸ್ಕ್ರೀನ್​ ನೋಡುವ ತೊಂದರೆ ತಪ್ಪಿಸುವ ಉದ್ದೇಶದಿಂದ ಕಳೆದ ವರ್ಷ ಫೋನ್​ ಪೇ ಈ ಸ್ಮಾರ್ಟ್​​ ಸ್ಪೀಕರ್​ ಅನ್ನು ಬಿಡುಗಡೆ ಮಾಡಿತ್ತು. ಸುಲಭವಾಗಿ ಎಲ್ಲಿಗೆ ಬೇಕಾದಲ್ಲಿ ಕೊಂಡೊಯ್ಯಬಹುದಾದ ಈ ಸಾಧನದಲ್ಲಿ ಅತ್ಯುತ್ತಮ ಬ್ಯಾಟರಿ ಮತ್ತು ಉತ್ತಮ ಆಡಿಯೋ ಕ್ಲಾರಿಟಿ ಹೊಂದಿದ್ದು, ಜನಪ್ರಿಯಗೊಂಡಿತು. ವ್ಯಾಪಾರಿಗಳ ಹಣದ ವಹಿವಾಟಿನ ಕುರಿತು ಮಾಹಿತಿಯನ್ನು ಸುಲಭವಾಗಿ ಪಡೆಯಬಹುದಾಗಿತ್ತು

ಬೆಂಗಳೂರು ಮೂಲದ ಫೋನ್​ ಪೇ 2015ರಲ್ಲಿ ಸ್ಥಾಪಿತವಾಗಿದ್ದು, ಅತ್ಯಂತ ಮೆಚ್ಚಿನ ಡಿಜಿಟಲ್​ ಪೇಮೆಂಟ್​ ತಾಣವಾಗಿದೆ. 47 ಕೋಟಿ ಮಂದಿ ಬಳಕೆದಾರರು ಇದಕ್ಕೆ ನೋಂದಣಿ ಆಗಿದ್ದು, ಭಾರತದಲ್ಲಿ ನಾಲ್ವರಲ್ಲಿ ಒಬ್ಬರು ಫೋನ್​ ಪೇ ಅನ್ನು ಬಳಕೆ ಮಾಡುತ್ತಿದ್ದಾರೆ.ಇನ್ನು, ಈ ಸ್ಮಾರ್ಟ್​ ಸ್ಪೀಕರ್​ ಬ್ಯಾಟರಿ ಲೈಫ್​ ಒಮ್ಮೆ ಚಾರ್ಜ್​ ಮಾಡಿದರೆ ಸಾಕು ನಾಲ್ಕು ದಿನಗಳ ಕಾಲ ಬರುತ್ತದೆ ಜೊತೆಗೆ ಡಾಟಾ ಕನೆಕ್ಟಿವಿಟಿ ಕೂಡ ಹೊಂದಿದೆ. ಕಡಿಮೆ ಬ್ಯಾಟರಿಯಲ್ಲೂ ಇದು ಆಡಿಯೋ ಅಲರ್ಟ್​ ನೀಡುವ ಜೊತೆಗೆ ಕಡೆಯ ವಹಿವಾಟಿನ ಮಾಹಿತಿಯನ್ನು ರಿಪ್ಲೈ ಬಟನ್​ ಮೂಲಕ ಪಡೆಯಬಹುದಾಗಿದೆ.