ಮಣಿಪಾಲ: ಮಂಚಿಕೆರೆ ಶ್ರೀ ವಾಸುಕಿ ನಾಗಯಕ್ಷಿ ಸನ್ನಿಧಾನದಲ್ಲಿ ಭಾನುವಾರ ನಡೆದ ಕಾರ್ಯಕ್ರಮದಲ್ಲಿ ನಟ, ನಿರ್ದೇಶಕ, ನಿರ್ಮಾಪಕ ಜಯಕರ್ ಮಣಿಪಾಲ ಅವರ ನೂತನ ವಿಜಯಧಾರ (ಕರ್ಣ ಪರ್ವ) ನಾಟಕ ಕೃತಿಯನ್ನು ಬಡಗುಬೆಟ್ಟು ಗ್ರಾಮ ಪಂಚಾಯತ್ ಮಾಜಿ ಅಧ್ಯಕ್ಷ ಶಾಂತಾರಾಮ್ ಶೆಟ್ಟಿ ಬಿಡುಗಡೆಗೊಳಿಸಿದರು.
ಬಳಿಕ ಮಾತನಾಡಿದ ಶಾಂತಾರಾಮ್ ಶೆಟ್ಟಿ, ಮಕ್ಕಳ ಸರ್ವಾಂಗೀಣ ಅಭಿವೃದ್ಧಿಗೆ ರಂಗಭೂಮಿ ಪೂರಕ. ಆ ನಿಟ್ಟಿನಲ್ಲಿ ಜಯಕರ್ ಅವರು ರಂಗಭೂಮಿಯ ಒಳ ತಿರುಳುಗಳನ್ನು, ಅದರ ವಿಭಿನ್ನತೆಯನ್ನು ಹಳ್ಳಿಯ ವಾತಾವರಣಗಳಿಗೆ ವಿಸ್ತರಿಸಿ ಅಲ್ಲಿನ ಪ್ರತಿಭೆಗಳಿಗೆ ರಂಗ ನಾಟಕಗಳನ್ನು ಪರಿಚಯಿಸುತ್ತಿದ್ದಾರೆ ಎಂದರು.
ಹಳ್ಳಿಯ ಮಕ್ಕಳಲ್ಲಿ ಸೂಪ್ತವಾಗಿರುವ ಪ್ರತಿಭೆಗಳನ್ನು ಹೊರತರುವ ಉದ್ದೇಶದಿಂದ ಈ ವಿನೂತನ ಪ್ರಯತ್ನಗಳು ನಡೆಯುತ್ತಿವೆ. ಈ ಕಾರಣದಿಂದ ಇದರ ಚಾಲನೆಯನ್ನು ಗ್ರಾಮ ಮಟ್ಟದಲ್ಲಿಯೇ ಆಯೋಜಿಸಲಾಗಿದೆ ಎಂದು ತಿಳಿಸಿದರು.
ಜಿಲ್ಲಾ ಪಂಚಾಯತ್ ಮಾಜಿ ಅಧ್ಯಕ್ಷ ಉಪೇಂದ್ರ ನಾಯಕ್ ಕಾರ್ಯಕ್ರಮವನ್ನು ಉದ್ಘಾಟಿಸಿದರು. ಉಡುಪಿ ನಗರಸಭಾ ಸದಸ್ಯ ಮಂಜುನಾಥ್ ಮಣಿಪಾಲ, ಉದ್ಯಮಿ ಬಳ್ಕೂರು ಗೋಪಾಲ್ ಆಚಾರ್ಯ, ರಂಗ ನಿರ್ದೇಶಕರುಗಳಾದ ರವಿರಾಜ್ ಎಚ್.ಪಿ, ಸೋಮನಾಥ್ ಚಿಟ್ಪಾಡಿ, ರಾಘವೇಂದ್ರ ಕಟಪಾಡಿ, ಯೋಗೀಶ್ ಕೊಳಲಗಿರಿ ಮತ್ತಿತರರು ಉಪಸ್ಥಿತರಿದ್ದರು. ವಿಶ್ವಮೂರ್ತಿ ಆಚಾರ್ಯ ರಾಜೀವನಗರ ವಂದಿಸಿದರು.
