ಕುಂಬಳೆ: ಇಲ್ಲಿನ ಬಹು ಪ್ರಸಿದ್ದ ಅನಂತಪುರ ಶ್ರೀ ಅನಂತ ಪದ್ಮನಾಭ ದೇವಸ್ಥಾನದ ಸರೋವರದಲ್ಲಿ ಮರಿ ಮೊಸಳೆ ಪ್ರತ್ಯಕ್ಷವಾಗಿದ್ದು, ಈ ಪ್ರಯುಕ್ತ ನ.17 ರಂದು ಬೆಳಿಗ್ಗೆ 10 ಗಂಟೆಗೆ ಕ್ಷೇತ್ರದ ಸಭಾಂಗಣದಲ್ಲಿ ಮಕರ ಸಂಭ್ರಮ ಕಾರ್ಯಕ್ರಮ ಜರಗಲಿದೆ. ಬಳಿಕ ಭಕ್ತರ ಜೊತೆ ಸಮಾಲೋಚನೆ ನಡೆಯಲಿದೆ ಎಂದು ಕ್ಷೇತ್ರದ ಕಾರ್ಯನಿರ್ವಹಣಾಧಿಕಾರಿ ಎಂ.ಪಿ. ರಾಮನಾಥ್ ಶೆಟ್ಟಿ ತಿಳಿಸಿರುವುದಾಗಿ ಮಾಧ್ಯಮ ವರದಿಯಾಗಿದೆ.

ಈ ಹಿಂದೆ ಬಬಿಯಾ ಮೊಸಳೆ ಇಲ್ಲಿನ ಆಕರ್ಷಣೆಯ ಕೇಂದ್ರವಾಗಿದ್ದು, ವರುಷದ ಹಿಂದೆ ಮೊಸಳೆಯು ದೈವಾಧೀನವಾಗಿತ್ತು. ಆದರೆ ಇದೀಗ ಮರಿ ಮೊಸಳೆಯೊಂದು ಪ್ರತ್ಯಕ್ಷವಾಗಿದ್ದು, ಸಾವಿರಾರು ಭಕ್ತರನ್ನು ಮತ್ತೊಮ್ಮೆ ಕ್ಷೇತ್ರದೆಡೆಗೆ ಆಕರ್ಷಿಸುತ್ತಿದೆ. ಮೊಸಳೆಯು ದಿನಕ್ಕೊಂದು ಬಾರಿ ಪ್ರತ್ಯಕ್ಷವಾಗುತ್ತಿದ್ದು ಮತ್ತೆ ಗುಹೆಗೆ ತೆರಳುತ್ತಿದೆ ಎನ್ನಲಾಗಿದೆ.

ದೇವಳದ ತಂತ್ರಿಗಳು ಮತ್ತು ಆಡಳಿತ ಮಂಡಳಿಯವರು ಸೇರಿ ಮೊಸಳೆಗೆ ನಾಮಕರಣ ಮತ್ತು ನೈವೇದ್ಯ ಮುಂತಾದವುಗಳನ್ನು ನಿರ್ಧರಿಸಲಿದ್ದಾರೆ ಎಂದು ಜೀರ್ಣೋದ್ಧಾರ ಸಮಿತಿ ಕಾರ್ಯದರ್ಶಿ ಎಂ.ವಿ ಮಹಾಲಿಂಗೇಶ್ವರ ಭಟ್ ತಿಳಿಸಿದ್ದಾರೆ.