ಕಾರ್ಕಳ: ಅತ್ತೂರು ಪರ್ಪಲೆಗಿರಿಯಲ್ಲಿ ಶ್ರೀ ಕಲ್ಕುಡ-ಕಲ್ಲುರ್ಟಿ-ತೂಕತ್ತರಿ ದೈವದ ನೇಮೋತ್ಸವ ಫೆ. 14ರಂದು ನಡೆಯಲಿದೆ.

ಅಂದು ಬೆಳಿಗ್ಗೆ 7.30ಕ್ಕೆ ಮಹಾಮೃತ್ಯುಂಜಯ ಹೋಮ, ಶತ ನಾರಿಕೇಳ ಹೋಮ ಮತ್ತು ರುದ್ರ ಹೋಮಕ್ಕೆ ಸಂಕಲ್ಪ, 8 ಗಂಟೆಗೆ ದೈವಗಳ ಪ್ರತಿಷ್ಠಾ ವಿಧಿ ಆರಂಭವಾಗಲಿದೆ. 9ಗಂಟೆಗೆ ಪ್ರಧಾನ ಸಾನಿಧ್ಯ ಸಂಕಲ್ಪಿತ ಪ್ರಾಕೃತಿಕ ಜಲಶಿಲೆಗಳ ಭವ್ಯ ಶೋಭಾಯಾತ್ರೆ, 10.30ಕ್ಕೆ ಶ್ರೀ ಕಲ್ಕುಡ ಕಲ್ಲುರ್ಟಿ ತೂಕತ್ತರಿ ದೈವಗಳ ಬಾಲಾಲಯ ಪ್ರತಿಷ್ಠೆ ನೆರವೇರಲಿದೆ.

ಬೆಳಿಗ್ಗೆ 11.30ಕ್ಕೆ ರುದ್ರಹೋಮ, ಶತ ನಾರಿಕೇಳ ಹೋಮ ಮತ್ತು ಮಹಾಮೃತ್ಯುಂಜಯ ಯಾಗದ ಪೂರ್ಣಾಹುತಿ ಜರಗಲಿದೆ. 12.30ಕ್ಕೆ ಪಲ್ಲಪೂಜೆ ಬಳಿಕ ಅನ್ನಸಂತರ್ಪಣೆ ನಡೆಯಲಿದೆ. ಸಂಜೆ 6.30ಕ್ಕೆ ದೈವಗಳ ಭಂಡಾರ ಹೊರಡುವುದು. 9 ಗಂಟೆಗೆ ದೈವಗಳ ನೇಮೋತ್ಸವ ಆರಂಭವಾಗಲಿದೆ ಎಂದು ಹಿಂದೂ ಜಾಗರಣ ವೇದಿಕೆಯ ಪ್ರಕಟಣೆ ತಿಳಿಸಿದೆ.

ಆನಂದ ಗುರೂಜಿ ಭೇಟಿ:
ಮಹರ್ಷಿ ವಾಣಿ ಕಾರ್ಯಕ್ರಮದ ಖ್ಯಾತಿಯ ಮಹರ್ಷಿ ಆನಂದ ಗುರೂಜಿ ಅವರು ಫೆ. 14ರ ರಾತ್ರಿ 7 ಗಂಟೆಗೆ ಕ್ಷೇತ್ರಕ್ಕೆ ಭೇಟಿ ನೀಡಲಿದ್ದಾರೆ. 7:30ರಿಂದ ಆನಂದ ಗುರೂಜಿ ಆಶೀರ್ವಚನ ನೀಡಲಿರುವರು. ವಿವಿಧ ಕ್ಷೇತ್ರದ ಮಠಾಧೀಶರು, ಅವಿಭಜಿತ ದ.ಕ. ಜಿಲ್ಲೆಯ ಸಂಸದರು, ಶಾಸಕರು ಕಾರ್ಯಕ್ರಮದಲ್ಲಿ ಪಾಲ್ಗೊಳ್ಳಲಿದ್ದಾರೆ ಎಂದು ಹಿಜಾವೇ ತಿಳಿಸಿದೆ.