ಪದೇಪದೇ ಸಂಚಾರ ನಿಯಮ ಉಲ್ಲಂಘಿಸುವ ಚಾಲಕರ ವಿರುದ್ಧ ಕ್ರಮ ಕೈಗೊಳ್ಳಲು ಕೇಂದ್ರ ಸರ್ಕಾರ 2026ರಲ್ಲಿ ಮಹತ್ವದ ನಿಯಮ ಜಾರಿಗೆ ತಂದಿದೆ. ಒಂದು ವರ್ಷದ ಅವಧಿಯಲ್ಲಿ ಐದು ಅಥವಾ ಅದಕ್ಕಿಂತ ಹೆಚ್ಚು ಸಂಚಾರ ಅಪರಾಧಗಳು ಅಥವಾ ಮೋಟಾರು ವಾಹನ ಕಾಯ್ದೆ/ನಿಯಮಗಳ ಉಲ್ಲಂಘನೆ ಮಾಡಿದರೆ, ಚಾಲನಾ ಪರವಾನಗಿಯನ್ನು ಅನರ್ಹಗೊಳಿಸಲು (Disqualification) ಲೈಸೆನ್ಸಿಂಗ್‌ ಪ್ರಾಧಿಕಾರಕ್ಕೆ ಆಧಾರವಾಗಲಿದೆ. ಈ ನಿಯಮವು 2026ರ ಜನವರಿ 1ರಿಂದ ಆರಂಭವಾಗುವ ಒಂದು ವರ್ಷದ ಅವಧಿಗೆ ಅನ್ವಯಿಸುತ್ತದೆ.

ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವಾಲಯವು 2026ರ ಜನವರಿ 20ರಂದು G.S.R. 48(E) ಅಧಿಸೂಚನೆಯ ಮೂಲಕ Central Motor Vehicles (Third Amendment) Rules, 2026 ಅನ್ನು ಪ್ರಕಟಿಸಿದೆ. ಇದರ ಮೂಲಕ Central Motor Vehicles Rules, 1989ರ **Rule 21(1)**ಕ್ಕೆ ಹೊಸ Clause 25 ಸೇರಿಸಲಾಗಿದೆ.

5 ಚಾಲನ್‌ ಬಂದರೆ ತಕ್ಷಣ ಲೈಸೆನ್ಸ್‌ ರದ್ದೇ?

ಹೊಸ ನಿಯಮವು ಒಂದು ವರ್ಷದ ಅವಧಿಯಲ್ಲಿ ಐದು ಅಥವಾ ಹೆಚ್ಚು ಅಪರಾಧಗಳು ಅಥವಾ ನಿಯಮ ಉಲ್ಲಂಘನೆಗಳನ್ನು ಮಾಡಿರುವುದನ್ನು ಲೈಸೆನ್ಸ್‌ ಅನರ್ಹಗೊಳಿಸುವ ಒಂದು ಆಧಾರವಾಗಿ ಸೇರಿಸಿದೆ. ಅಂತಹ ಕ್ರಮವನ್ನು ಸಂಬಂಧಪಟ್ಟ Licensing Authority ಕಾನೂನುಬದ್ಧ ಪ್ರಕ್ರಿಯೆಯ ಮೂಲಕ ಕೈಗೊಳ್ಳುತ್ತದೆ.

ಅಲ್ಲದೆ, ಹಿಂದಿನ ಒಂದು ವರ್ಷದ ಅವಧಿಯಲ್ಲಿ ದಾಖಲಾಗಿರುವ ಅಪರಾಧ ಅಥವಾ ಉಲ್ಲಂಘನೆಯನ್ನು ಮುಂದಿನ ಒಂದು ವರ್ಷದ ಲೆಕ್ಕಕ್ಕೆ ಸೇರಿಸಬಾರದು ಎಂದು ನಿಯಮದಲ್ಲೇ ಸ್ಪಷ್ಟಪಡಿಸಲಾಗಿದೆ

ಇ-ಚಾಲನ್‌ಗಳಿಗೂ ಹೊಸ ವ್ಯವಸ್ಥೆ

2026ರ ತಿದ್ದುಪಡಿಯ ಮೂಲಕ Rule 167ನ್ನೂ ಬದಲಾಯಿಸಲಾಗಿದೆ. ಪೊಲೀಸ್‌ ಅಧಿಕಾರಿ ಅಥವಾ ರಾಜ್ಯ ಸರ್ಕಾರದಿಂದ ಅಧಿಕೃತಗೊಂಡ ಅಧಿಕಾರಿ ಚಾಲನ್‌ ಅನ್ನು ಭೌತಿಕ ಅಥವಾ ಎಲೆಕ್ಟ್ರಾನಿಕ್‌ ರೂಪದಲ್ಲಿ ನೀಡಬಹುದು. ರಾಜ್ಯ ಸರ್ಕಾರಗಳು ಎಲೆಕ್ಟ್ರಾನಿಕ್‌ ಮಾನಿಟರಿಂಗ್‌ ಮತ್ತು ಎನ್‌ಫೋರ್ಸ್‌ಮೆಂಟ್‌ ವ್ಯವಸ್ಥೆಯ ಮೂಲಕ ಚಾಲನ್‌ಗಳನ್ನು ಸ್ವಯಂಚಾಲಿತವಾಗಿ ಸೃಷ್ಟಿಸುವ ವ್ಯವಸ್ಥೆಯನ್ನೂ ಬಳಸಬಹುದು.

ಇದರ ಪರಿಣಾಮವಾಗಿ ವಾಹನ ಮಾಲೀಕರು ತಮ್ಮ ವಾಹನಕ್ಕೆ ಸಂಬಂಧಿಸಿದ ಇ-ಚಾಲನ್‌ಗಳನ್ನು ನಿಯಮಿತವಾಗಿ ಪರಿಶೀಲಿಸುವುದು ಮುಖ್ಯವಾಗಿದೆ.

ಚಾಲನ್‌ ಬಂದರೆ ಏನು ಮಾಡಬೇಕು?

ಚಾಲನ್‌ ಬಂದಾಗ ಅದನ್ನು ನಿರ್ಲಕ್ಷಿಸುವ ಬದಲು:

• ಚಾಲನ್‌ ನಿಮ್ಮ ವಾಹನಕ್ಕೆ ಸಂಬಂಧಿಸಿದ್ದೇ ಎಂದು ಪರಿಶೀಲಿಸಿ.
• ತಪ್ಪಾಗಿ ದಾಖಲಾಗಿದ್ದರೆ ನಿಗದಿತ ಪ್ರಕ್ರಿಯೆಯಲ್ಲಿ ಪ್ರಶ್ನಿಸಿ.
• ಸರಿಯಾದ ಚಾಲನ್‌ ಆಗಿದ್ದರೆ ಸಮಯಕ್ಕೆ ಪಾವತಿಸಿ.
• ನಿಮ್ಮ ವಾಹನದ ಇ-ಚಾಲನ್‌ ದಾಖಲೆಗಳನ್ನು ನಿಯಮಿತವಾಗಿ ಪರಿಶೀಲಿಸಿ.
• ಒಂದೇ ವರ್ಷದ ಅವಧಿಯಲ್ಲಿ ಪದೇಪದೇ ಸಂಚಾರ ನಿಯಮ ಉಲ್ಲಂಘನೆಯಾಗದಂತೆ ಎಚ್ಚರಿಕೆ ವಹಿಸಿ.

2026ರ ತಿದ್ದುಪಡಿಯು ಚಾಲನ್‌ಗಳ ವಿತರಣೆ, ಪಾವತಿ ಮತ್ತು ವಿವಾದ ಪರಿಹಾರಕ್ಕೆ ಸಂಬಂಧಿಸಿದ ಪ್ರಕ್ರಿಯೆಯನ್ನೂ ಬದಲಿಸಿದೆ. ರಾಜ್ಯಗಳು Rule 167ರ ಅಡಿಯಲ್ಲಿ ಚಾಲನ್‌ಗಳನ್ನು ಪ್ರಶ್ನಿಸುವ ಮತ್ತು ಪರಿಹರಿಸುವ ಅಧಿಕಾರಿಗಳನ್ನು ನಿಗದಿಪಡಿಸಬಹುದು.

ಚಾಲಕರು Suspension (ಅಮಾನತು) ಮತ್ತು Disqualification (ಅನರ್ಹತೆ) ಒಂದೇ ಅರ್ಥ ಹೊಂದಿಲ್ಲ ಎಂಬುದನ್ನು ಗಮನಿಸಬೇಕು. ಹೊಸ Rule 21(25) ಒಂದು ವರ್ಷದ ಅವಧಿಯಲ್ಲಿ ಐದು ಅಥವಾ ಹೆಚ್ಚು ಅಪರಾಧ/ಉಲ್ಲಂಘನೆಗಳನ್ನು ಮಾಡಿರುವುದನ್ನು ಲೈಸೆನ್ಸಿಂಗ್‌ ಪ್ರಾಧಿಕಾರವು ಪರವಾನಗಿಯನ್ನು ಅನರ್ಹಗೊಳಿಸಲು ಪರಿಗಣಿಸಬಹುದಾದ ಆಧಾರವಾಗಿ ಸೇರಿಸಿದೆ.

2026ರ ಹೊಸ ನಿಯಮದ ಪ್ರಕಾರ ಒಂದು ವರ್ಷದ ಅವಧಿಯಲ್ಲಿ ಐದು ಅಥವಾ ಹೆಚ್ಚು ಮೋಟಾರು ವಾಹನ ಕಾಯ್ದೆ/ನಿಯಮಗಳ ಉಲ್ಲಂಘನೆಗಳು ನಡೆದರೆ, ಡ್ರೈವಿಂಗ್‌ ಲೈಸೆನ್ಸ್‌ ಅನರ್ಹಗೊಳಿಸುವ ಕ್ರಮಕ್ಕೆ ಒಳಗಾಗುವ ಸಾಧ್ಯತೆ ಇದೆ. ಆದರೆ “5 ಚಾಲನ್‌ = ತಕ್ಷಣ ಲೈಸೆನ್ಸ್‌ ಕ್ಯಾನ್ಸಲ್‌” ಎಂಬುದು ನಿಯಮದ ನಿಖರ ಅರ್ಥವಲ್ಲ. ಕ್ರಮ ಕೈಗೊಳ್ಳುವ ಅಧಿಕಾರ ಸಂಬಂಧಪಟ್ಟ Licensing Authorityಗೆ ಸೇರಿದೆ.