ಕೊಲಂಬೊ (ಶ್ರೀಲಂಕಾ): ನಾಯಕ ಶಕೀಬ್​ ಅಲ್​ ಹಸನ್​ ಮತ್ತು ತೌಹೀದ್ ಹೃದಯೋಯ್ ಅವರ ಅರ್ಧಶತಕದ ನೆರವಿನಿಂದ ಭಾರತದ ವಿರುದ್ಧ ಬಾಂಗ್ಲಾದೇಶ ನಿಗದಿತ 50 ಓವರ್‌ಗಳ ಅಂತ್ಯಕ್ಕೆ 8 ವಿಕೆಟ್​ ಕಳೆದುಕೊಂಡು 265 ರನ್​ ಕಲೆಹಾಕಿತು.
ಟಾಸ್​ ಗೆದ್ದು ಬೌಲಿಂಗ್​ ಆಯ್ದುಕೊಂಡ ಭಾರತ ಈಗಾಗಲೇ ಫೈನಲ್‌ಗೇರಿದ್ದು, ಪ್ರಮುಖ ಆಟಗಾರರಿಗೆ ವಿಶ್ರಾಂತಿ​ ನೀಡಿ ಐದು ಬದಲಾವಣೆಯೊಂದಿಗೆ ಮೈದಾನಕ್ಕಿಳಿದಿದೆ. ಬೌಲಿಂಗ್​ನಲ್ಲಿಂದು ತಂಡ ಸಾಧಾರಣ ಪ್ರದರ್ಶನ ನೀಡಿತು. ಬಾಂಗ್ಲಾ ಮೇಲೆ ಆರಂಭಿಕ ಓವರ್​ಗಳಲ್ಲಿ ಯಶ ಕಂಡ ಬೌಲರ್​ಗಳು ನಂತರ ಕೊಂಚ ಮಂಕಾದರು. ಮಧ್ಯಮ ಕ್ರಮಾಂಕದಲ್ಲಿ ಬಾಂಗ್ಲಾ ನಾಯಕ ಶಕೀಬ್​ ಮತ್ತು ಹೃದಯೋಯ್ ಉತ್ತಮ ಜೊತೆಯಾಟ ನೀಡಿದರು.

ಲಿಟ್ಟನ್ ದಾಸ್ ತಾವು ಎದುರಿಸಿದ ಶಮಿ ಅವರ ಎರಡನೇ ಎಸೆತದಲ್ಲಿ ಶೂನ್ಯಕ್ಕೆ ಕ್ಲೀನ್ ಬೌಲ್ಡ್​ ಆದರು. ಈ ಬೆನ್ನಲ್ಲೇ ಏಕದಿನ ತಂಡಕ್ಕೆ ಪಾದಾರ್ಪಣೆ ಮಾಡಿರುವ ತಂಝಿದ್ ಹಸನ್ ಸಹ ವಿಕೆಟ್​ ಕೊಟ್ಟರು. ಮೂರನೇ ಬ್ಯಾಟರ್​ ಅನಾಮುಲ್ ಹಕ್ 6ನೇ ಓವರ್​ನಲ್ಲಿ ಕ್ಯಾಚಿತ್ತು ಪೆವಿಲಿಯನ್​ ಸೇರಿದರು. ಬಾಂಗ್ಲಾ 6ನೇ ಓವರ್ ವೇಳೆಗೆ 28 ರನ್​ಗಳಿಗೆ 3 ವಿಕೆಟ್​ ಕಳೆದುಕೊಂಡು ಸಂಕಷ್ಟದಲ್ಲಿತ್ತು. ಈ ವೇಳೆ ನಾಯಕ ಶಕೀಬ್​ ಮತ್ತು ಮೆಹಿದಿ ಹಸನ್ ಮಿರಾಜ್ ತಂಡಕ್ಕೆ ಕೊಂಚ ಜೊತೆಯಾಟ ಮಾಡಿದರು. ಆದರೆ ಮಿರಾಜ್ ಹೋರಾಟ ಅಕ್ಷರ್ ಪಟೇಲ್​ ಬೌಲಿಂಗ್​ ಮುಂದೆ ಹೆಚ್ಚು ಹೊತ್ತು ನಡೆಯಲಿಲ್ಲ.ಷ್ಯಾಕಪ್​ನ ಸೂಪರ್​ ಫೋರ್​ ಹಂತದ ಅಂತಿಮ ಪಂದ್ಯ ನಡೆಯುತ್ತಿದ್ದು, ಬಾಂಗ್ಲಾದೇಶ ತಂಡ ಭಾರತಕ್ಕೆ 266 ರನ್‌ಗಳ​ ಗುರಿ ನೀಡಿದೆ. 3 ಮತ್ತು 4ನೇ ಸ್ಥಾನದಲ್ಲಿ ಪ್ರಮುಖ ಬದಲಾವಣೆ ಮಾಡಿಕೊಂಡಿರುವ ಭಾರತ ತಂಡ 266 ರನ್​ ಗುರಿ ಬೆನ್ನತ್ತಬೇಕಿದೆ.

200ನೇ ವಿಕೆಟ್​ ಪಡೆದ ಜಡೇಜಾ: ಅನುಭವಿ ಆಲ್​ರೌಂಡರ್​ ರವೀಂದ್ರ ಜಡೇಜಾ ಏಕದಿನ ಕ್ರಿಕೆಟ್​ನಲ್ಲಿ 200 ವಿಕೆಟ್​ ಪಡೆದ ಸಾಧನೆ ಮಾಡಿದ್ದಾರೆ. ಈ ಮೈಲುಗಲ್ಲು ತಲುಪಿದ 7ನೇ ಭಾರತೀಯ ಬೌಲರ್​ ಆಗಿದ್ದಾರೆ. ಅಲ್ಲದೇ ಬ್ಯಾಟಿಂಗ್​ನಲ್ಲಿ 2,500 ರನ್​ ಮತ್ತು 200 ವಿಕೆಟ್​ ಗಳಿಸಿದ ಸಾಧನೆ ಮಾಡಿದ ಎರಡನೇ ಆಟಗಾರನೂ ಹೌದು. ಕಪಿಲ್​ ದೇವ್​ ಈ ದಾಖಲೆಗೈದ ಮೊದಲ ಭಾರತೀಯ ಕ್ರಿಕೆಟಿಗ.
ಸಂಕ್ಷಿಪ್ತ ಸ್ಕೋರ್​: ಬಾಂಗ್ಲಾದೇಶ – 2 ಶಕೀಬ್​ ಅಲ್​ ಹಸನ್​ – 80 (85), ತೌಹಿದ್ ಹೃದಯೋಯ್ – 54 (81), ನಸುಮ್ ಅಹ್ಮದ್ – 44 (45), ಶಾರ್ದೂಲ್​ ಠಾಕೂರ್​ – 65/3, ಶಮಿ – 32/2.

ಬಾಂಗ್ಲಾ ಪರ ಶಕೀಬ್ ಅಲ್ ಹಸನ್ ಮತ್ತು ತೌಹೀದ್ ಹೃದಯೋಯ್ ಉತ್ತಮ ಕಮ್​ಬ್ಯಾಕ್​ ಮಾಡಿದರು. ಈ ಜೋಡಿ 4ನೇ ವಿಕೆಟ್​ಗೆ 101 ರನ್​ ಭರ್ಜರಿ ಜೊತೆಯಾಟವಾಡಿತು. ಇದರಿಂದ 150ರೊಳಗೆ ಸರ್ವಪತನ ಆಗುವ ಸಾಧ್ಯತೆಯಲ್ಲಿದ್ದ ಬಾಂಗ್ಲಾ 250 ಗಡಿ ದಾಟಿತು. ಈ ಇಬ್ಬರು ಬ್ಯಾಟರ್​​ಗಳಲ್ಲದೇ ಕೆಳ ಕ್ರಮಾಂಕದಲ್ಲಿ ನಸುಮ್ ಅಹ್ಮದ್ ಮತ್ತು ಮಹಿದಿ ಹಸನ್ ಉತ್ತಮ ಇನ್ನಿಂಗ್ಸ್ ಕಟ್ಟಿದರು. ಇವರ ಅಂತಿಮ ಓವರ್​ಗಳ ಹೋರಾಟಕ್ಕೆ ತಂಡದ ಬಲ ನೀಡಿತು.