ಚೆನ್ನೈ (ತಮಿಳುನಾಡು): ಏಕದಿನ ಕ್ರಿಕೆಟ್​ ವಿಶ್ವಕಪ್​ ಟೂರ್ನಿಯಲ್ಲಿ ಭಾರತ ತಂಡ ಇಂದು ತನ್ನ ಮೊದಲ ಪಂದ್ಯವನ್ನು ಆಸ್ಪ್ರೇಲಿಯಾ ವಿರುದ್ಧ ಆಡುತ್ತಿದೆ.ಟಾಸ್​ ಗೆದ್ದು ಬ್ಯಾಟಿಂಗ್​ಗೆ ಇಳಿದ ಆಸ್ಟ್ರೇಲಿಯಾಕ್ಕೆ ಹೊಸ ಬಾಲ್​ನಲ್ಲಿ ಬುಮ್ರಾ ಆರಂಭಿಕ ಆಘಾತವನ್ನು ನೀಡಿದರೆ, ನಂತರ ಪಿಚ್​ಗೆ ಸೆಟ್​ ಆಗಿ ಅರ್ಧಶತಕದತ್ತ ಮುನ್ನುಗ್ಗುತ್ತಿದ್ದ ವಾರ್ನರ್​​ನ್ನು ಕುಲ್ದೀಪ್ ಕಾಡಿದರು. ಏಕದಿನ ಕ್ರಿಕೆಟ್​ ವಿಶ್ವಕಪ್​ ಟೂರ್ನಿಯ ಐದನೇ ಪಂದ್ಯದಲ್ಲಿ ಇಂದು ಭಾರತ ಹಾಗೂ ಆಸ್ಪ್ರೇಲಿಯಾ ಮುಖಾಮುಖಿಯಾಗಿವೆ.

5 ರನ್​ ಗಳಿಸಿದ್ದ ಆಸ್ಟ್ರೇಲಿಯಾಕ್ಕೆ ಬುಮ್ರಾ ಶಾಕ್​ ಕೊಟ್ಟರು. ನಂತರ ಎರಡನೇ ವಿಕೆಟ್​ ವಾರ್ನರ್​ ಮತ್ತು ಸ್ಮಿತ್​ ತಮ್ಮ ಅನುಭವದ ಮೂಲಕ ಭಾರತೀಯ ಸ್ಪಿನ್​ ಹಾಗೂ ಸ್ಪೀಡ್​ ದಾಳಿಯನ್ನು ಸಮರ್ಥವಾಗಿ ಎದುರಿಸಿದರು. ಎರಡನೇ ವಿಕೆಟ್​ಗೆ ಈ ಜೋಡಿ 69 ರನ್​ ಜೊತೆಯಾಟವನ್ನು ಮಾಡಿತು. 52 ಬಾಲ್​ ಎದುರಿಸಿದ 6 ಬೌಂಡರಿಯಿಂದ 41 ರನ್​ ಗಳಿಸಿದ್ದ ವಾರ್ನರ್​ ವಿಕೆಟ್​ನಿಂದ ಪಾಲುದಾರಿಕೆ ಅಂತ್ಯವಾಯಿತು.ಪಂದ್ಯದ ಮೂರನೇ ಓವರ್​ನಲ್ಲಿ ಸ್ಲಿಪ್​ ಕ್ಯಾಚ್​ ಕೊಟ್ಟು ಮಾರ್ಷ್​ ಶೂನ್ಯಕ್ಕೆ ವಿಕೆಟ್​ ಒಪ್ಪಿಸಿದರು. 17ನೇ ಓವರ್​ನಲ್ಲಿ ಕುಲ್ದೀಪ್​ ಬಾಲ್​ನಲ್ಲಿ ಬೌಲರ್​ಗೆ ಕ್ಯಾಚ್​ ಕೊಟ್ಟು 41 ರನ್​ ಗಳಿಸಿದ್ದ ವಾರ್ನರ್​ ಔಟ್​ ಆದರು. ಕ್ರೀಸ್​ನಲ್ಲಿ ಮಾರ್ನಸ್​ ಲಬುಶೇನ್​ ಮತ್ತು ಸ್ಮಿತ್​ ಜೊತೆಯಾಟ ಮುಂದುವರೆದಿದ್ದು, 25 ಓವರ್​ಗೆ ಆಸ್ಟ್ರೇಲಿಯಾ 2 ವಿಕೆಟ್​ ನಷ್ಟಕ್ಕೆ 102 ರನ್​ ಕಲೆಹಾಕಿದೆ.

ಉಭಯ ತಂಡಗಳ ಮಾಹಿತಿ ಇಂತಿದೆ:

ಆಸ್ಟ್ರೇಲಿಯಾ: ಡೇವಿಡ್ ವಾರ್ನರ್, ಮಿಚೆಲ್ ಮಾರ್ಷ್, ಸ್ಟೀವನ್ ಸ್ಮಿತ್, ಮಾರ್ನಸ್ ಲ್ಯಾಬುಸ್ಚಾಗ್ನೆ, ಕ್ಯಾಮೆರಾನ್ ಗ್ರೀನ್, ಅಲೆಕ್ಸ್ ಕ್ಯಾರಿ (ವಿಕೆಟ್​ ಕೀಪರ್), ಗ್ಲೆನ್ ಮ್ಯಾಕ್ಸ್‌ವೆಲ್, ಪ್ಯಾಟ್ ಕಮಿನ್ಸ್ (ನಾಯಕ), ಮಿಚೆಲ್ ಸ್ಟಾರ್ಕ್, ಜೋಶ್ ಹ್ಯಾಜಲ್‌ವುಡ್, ಆಯಡಮ್ ಝಂಪಾ
ಭಾರತ: ರೋಹಿತ್ ಶರ್ಮಾ (ನಾಯಕ), ಇಶಾನ್ ಕಿಶನ್, ವಿರಾಟ್ ಕೊಹ್ಲಿ, ಶ್ರೇಯಸ್ ಅಯ್ಯರ್, ಕೆ.ಎಲ್.ರಾಹುಲ್ (ವಿಕೆಟ್​ ಕೀಪರ್​), ಹಾರ್ದಿಕ್ ಪಾಂಡ್ಯ, ರವೀಂದ್ರ ಜಡೇಜಾ, ರವಿಚಂದ್ರನ್ ಅಶ್ವಿನ್, ಕುಲದೀಪ್ ಯಾದವ್, ಜಸ್ಪ್ರೀತ್ ಬುಮ್ರಾ, ಮೊಹಮ್ಮದ್ ಸಿರಾಜ್

ವಾರ್ನರ್​ ದಾಖಲೆ: ಏಕದಿನ ವಿಶ್ವಕಪ್​ನಲ್ಲಿ 19 ಪಂದ್ಯದಿಂದ 1000 ರನ್​ ಗಡಿ ಮುಟ್ಟಿದ ದಾಖಲೆಯನ್ನು ವಾರ್ನರ್​ ಚೆಪಾಕ್​ ಪಂದ್ಯದಲ್ಲಿ ಮಾಡಿದ್ದಾರೆ. ಕಡಿಮೆ ಪಂದ್ಯದಲ್ಲಿ ಈ ಸಾಧನೆ ಮಾಡಿದ ಆಟಗಾರ ಎಂಬ ಖ್ಯಾತಿಯೂ ಅವರ ಪಾಲಿನದ್ದಾಗಿದೆ. 20 ಪಂದ್ಯಗಳಲ್ಲಿ ಸಚಿನ್​ ತೆಂಡೂಲ್ಕರ್​, ಎಬಿ ಡಿವಿಲಿಯರ್ಸ್, 21 ಪಂದ್ಯಗಳಲ್ಲಿ ವಿವಿ ರಿಚರ್ಡ್ಸ್​​, ಸೌರವ್ ಗಂಗೂಲಿ ಈ ಸಾಧನೆಯನ್ನು ಮಾಡಿದ್ದಾರೆ.​ ​