ಚೆನ್ನೈ: ಭಾನುವಾರ ಪ್ರಧಾನಿ ನರೇಂದ್ರ ಮೋದಿ ದಿ ಎಲಿಫೆಂಟ್ ವಿಸ್ಪರರ್ಸ್ ದಂಪತಿಗಳನ್ನು ತೆಪ್ಪಕ್ಕಾಡು ಆನೆ ಶಿಬಿರದಲ್ಲಿ ಭೇಟಿ ಮಾಡಿದರು. ಆಸ್ಕರ್ ಪ್ರಶಸ್ತಿ ವಿಜೇತ ಡಾಕ್ಯುಮೆಂಟರಿ ‘ದಿ ಎಲಿಫೆಂಟ್ ವಿಸ್ಪರರ್ಸ್’ ನ ತಾರೆಗಳಾದ ಬೊಮ್ಮನ್ ಮತ್ತು ಬೆಳ್ಳಿ ದಂಪತಿಯನ್ನು ಪ್ರಧಾನಿ ಮೋದಿ ಭೇಟಿ ಮಾಡಿದರು. ಅವರು ರಘು ಆನೆಯನ್ನೂ ಭೇಟಿ ಮಾಡಿದರು.
ಬೊಮ್ಮಿ ಮತ್ತು ರಘು ಅವರೊಂದಿಗೆ ಅದ್ಭುತವಾದ ಬೊಮ್ಮನ್ ಮತ್ತು ಬೆಳ್ಳಿಯನ್ನು ಭೇಟಿಯಾಗಿರುವುದು ತುಂಬಾಸಂತೋಷವಾಗಿದೆ ಎಂದು ಪ್ರಧಾನಿ ಮೋದಿ ಟ್ವಿಟರ್‌ನಲ್ಲಿ ಬರೆದು ಚಿತ್ರವನ್ನು ಹಂಚಿಕೊಂಡಿದ್ದಾರೆ.
ಚೆನ್ನೈ ಭೇಟಿಯಲ್ಲಿದ್ದ ಮೋದಿ ಅಲ್ಲಿನ ಮದುಮಲೈ ಹುಲಿ ಸಂರಕ್ಷಿತಾರಣ್ಯದಲ್ಲಿ ಬೊಮ್ಮನ್, ಬೆಳ್ಳಿ ಜೊತೆ ಬೊಮ್ಮಿ ಮತ್ತು ರಘು ಆನೆ ಪರಿವಾರವನ್ನು ಭೇಟಿ ಮಾಡಿದ್ದಾರೆ.
ನಮ್ಮ ಪ್ರಧಾನಿಯಂತಹ ದೊಡ್ಡ ವ್ಯಕ್ತಿತ್ವ ನಮ್ಮನ್ನು ಬಂದು ಭೇಟಿಯಾಗಿರುವುದು ನಮಗೆ ಅತೀವ ಸಂತಸ ತಂದಿದೆ. ಇಲ್ಲಿಯವರೆಗೆ ಆನೆಗಳನ್ನು ನೋಡಿಕೊಳ್ಳುವುದು ನಮ್ಮ ಕೆಲಸವಾಗಿತ್ತು. ಇದು ನಮ್ಮ ಜೀವನದ ಭಾಗವಾಗಿದೆ ಮತ್ತು ನಾವು ಹಲವಾರು ವರ್ಷಗಳಿಂದ ಈ ರೀತಿ ಬದುಕುತ್ತಿದ್ದೇವೆ ಆದರೆ ಈಗ ಅಂತಹ ಮಹಾನ್ ವ್ಯಕ್ತಿತ್ವದಿಂದ ಮನ್ನಣೆ ಪಡೆಯುವುದು ನಮಗೆ ತುಂಬಾ ಸ್ಫೂರ್ತಿ ನೀಡುತ್ತದೆ ಎಂದು ಬೆಳ್ಳಿ ಮಾಧ್ಯಮ ಪ್ರತಿನಿಧಿಗಳಲ್ಲಿ ತಮ್ಮ ಪ್ರತಿಕ್ರಿಯೆಯನ್ನು ಹಂಚಿಕೊಂಡಿದ್ದಾರೆ.
