ಇತ್ತೀಚಿನ ದಿನಗಳಲ್ಲಿ ಯುವಕ-ಯುವತಿಯರಲ್ಲಿ ಕೂದಲು ಉದುರುವ ಸಮಸ್ಯೆ ಹೆಚ್ಚಾಗುತ್ತಿದ್ದು, ವಿಶೇಷವಾಗಿ ಮಳೆಗಾಲದಲ್ಲಿ ಈ ಸಮಸ್ಯೆ ಮತ್ತಷ್ಟು ತೀವ್ರವಾಗುತ್ತದೆ. ಜೀವನಶೈಲಿಯ ಕೆಲವು ತಪ್ಪು ಅಭ್ಯಾಸಗಳು ಕೂದಲು ಉದುರುವಿಕೆಗೆ ಪ್ರಮುಖ ಕಾರಣವಾಗುತ್ತವೆ ಎಂದು ತಜ್ಞರು ಎಚ್ಚರಿಸಿದ್ದಾರೆ.

ಎಂಬಿಬಿಎಸ್ ವೈದ್ಯೆ ಡಾ. ಅಪರಾಜಿತಾ ಲಂಬಾ ಅವರ ಪ್ರಕಾರ, ಮಳೆಗಾಲದಲ್ಲಿ ಕೂದಲಿಗೆ ಹೆಚ್ಚು ಸಮಯ ಎಣ್ಣೆ ಹಚ್ಚಿಕೊಂಡಿರುವುದು ಹಾಗೂ ಅತಿಯಾಗಿ ಎಣ್ಣೆ ಬಳಸುವುದು ಕೂದಲಿನ ಆರೋಗ್ಯದ ಮೇಲೆ ದುಷ್ಪರಿಣಾಮ ಬೀರುತ್ತದೆ. ಇದರಿಂದ ನೆತ್ತಿಯಲ್ಲಿ ತೇವಾಂಶ ಹೆಚ್ಚಾಗಿ ಕೂದಲಿನ ಕಿರುಚೀಲಗಳಿಗೆ ಹಾನಿಯಾಗುವ ಸಾಧ್ಯತೆ ಇದೆ.

ಕ್ಯಾಸ್ಟರ್ ಆಯಿಲ್ ಎಲ್ಲರಿಗೂ ಸೂಕ್ತವಲ್ಲ

ಈಗಾಗಲೇ ಎಣ್ಣೆಯುಕ್ತ ಕೂದಲು ಹೊಂದಿರುವವರು ಕ್ಯಾಸ್ಟರ್ ಆಯಿಲ್ ಬಳಸುವುದನ್ನು ತಪ್ಪಿಸಬೇಕು ಎಂದು ತಜ್ಞರು ಸಲಹೆ ನೀಡಿದ್ದಾರೆ. ಇದು ಕೂದಲಿಗೆ ಅತಿಯಾದ ತೇವಾಂಶವನ್ನು ನೀಡುವ ಮೂಲಕ ಕೂದಲು ಉದುರುವಿಕೆ ಮತ್ತು ನೆತ್ತಿಯ ಸಮಸ್ಯೆಗಳನ್ನು ಹೆಚ್ಚಿಸಬಹುದು.

ಅತಿಯಾಗಿ ಎಣ್ಣೆ ಹಚ್ಚಬೇಡಿ

ಕೂದಲು ಉದುರುವಿಕೆ ಕಡಿಮೆಯಾಗಲಿ ಎಂಬ ಕಾರಣಕ್ಕೆ ಹೆಚ್ಚಿನ ಪ್ರಮಾಣದಲ್ಲಿ ಎಣ್ಣೆ ಹಚ್ಚುವುದು ಸರಿಯಲ್ಲ. ಮಳೆಗಾಲದಲ್ಲಿ ಕೂದಲು ಸಹಜವಾಗಿಯೇ ತೇವಾಂಶ ಹೊಂದಿರುವುದರಿಂದ ಹೆಚ್ಚುವರಿ ಎಣ್ಣೆ ಕೂದಲಿನ ಬೇರುಗಳಿಗೆ ಹಾನಿ ಉಂಟುಮಾಡಿ ಸಮಸ್ಯೆಯನ್ನು ಮತ್ತಷ್ಟು ಹೆಚ್ಚಿಸಬಹುದು.

ಎಣ್ಣೆಯನ್ನು ಹೆಚ್ಚು ಹೊತ್ತು ಬಿಡುವುದು ತಪ್ಪು

ಎಣ್ಣೆ ಹಚ್ಚಿಕೊಂಡ ಬಳಿಕ ಅದನ್ನು ದಿನಗಟ್ಟಲೆ ತಲೆಯಲ್ಲೇ ಉಳಿಸಬಾರದು. ಎಣ್ಣೆಯನ್ನು ಹಚ್ಚಿದ ನಂತರ ನೆತ್ತಿಗೆ ಮೃದುವಾಗಿ ಮಸಾಜ್ ಮಾಡಿ, ಒಂದು ರಿಂದ ಮೂರು ಗಂಟೆಗಳೊಳಗೆ ತಲೆ ಸ್ನಾನ ಮಾಡುವುದು ಉತ್ತಮ. ಇಲ್ಲವಾದರೆ ಬ್ಯಾಕ್ಟೀರಿಯಾ ಬೆಳವಣಿಗೆಯಾಗಿ ತುರಿಕೆ ಹಾಗೂ ಕೂದಲು ಉದುರುವಿಕೆ ಹೆಚ್ಚಾಗಬಹುದು.

ಮೃದುವಾಗಿ ಮಸಾಜ್ ಮಾಡಿ

ನೆತ್ತಿಗೆ ಸೌಮ್ಯವಾಗಿ ಮಸಾಜ್ ಮಾಡುವುದರಿಂದ ರಕ್ತಸಂಚಾರ ಸುಧಾರಿಸಿ ಕೂದಲಿನ ಬೆಳವಣಿಗೆಗೆ ನೆರವಾಗುತ್ತದೆ. ಆದರೆ ಅತಿಯಾದ ಒತ್ತಡದಿಂದ ಮಸಾಜ್ ಮಾಡಿದರೆ ಕೂದಲಿನ ಕಿರುಚೀಲಗಳಿಗೆ ಹಾನಿಯಾಗುವ ಸಾಧ್ಯತೆ ಇದೆ ಎಂದು ತಜ್ಞರು ಹೇಳಿದ್ದಾರೆ.

ತಲೆ ಸ್ನಾನ ಮಾಡುವುದು ಅಗತ್ಯ

ಎಣ್ಣೆ ಹಚ್ಚಿದ ಬಳಿಕ ಅದನ್ನು ಸಂಪೂರ್ಣವಾಗಿ ತೆಗೆದುಹಾಕಲು ತಲೆ ಸ್ನಾನ ಮಾಡುವುದು ಕಡ್ಡಾಯ. ಎಣ್ಣೆ ಉಳಿದರೆ ಕೂದಲಿನ ಬೇರುಗಳಿಗೆ ಹಾನಿಯಾಗಬಹುದು. ಜೊತೆಗೆ ಅತಿಯಾಗಿ ಶಾಂಪೂ ಬಳಸುವುದನ್ನೂ ತಪ್ಪಿಸಬೇಕು ಎಂದು ಸಲಹೆ ನೀಡಲಾಗಿದೆ. ತಜ್ಞರ ಪ್ರಕಾರ, ಕೇವಲ ಎಣ್ಣೆ ಹಚ್ಚುವುದರಿಂದಲೇ ಕೂದಲು ಬೆಳೆಯುತ್ತದೆ ಎಂಬುದು ತಪ್ಪು ಕಲ್ಪನೆ. ಆರೋಗ್ಯಕರ ಆಹಾರ, ಸರಿಯಾದ ಕೂದಲು ಆರೈಕೆ ಮತ್ತು ಉತ್ತಮ ಜೀವನಶೈಲಿಯೊಂದಿಗೆ ಮಾತ್ರ ಕೂದಲಿನ ಆರೋಗ್ಯವನ್ನು ಕಾಪಾಡಿಕೊಳ್ಳಬಹುದು.