ನವದೆಹಲಿ: ದೇಶದಲ್ಲಿ ಆನ್ಲೈನ್ ತ್ವರಿತ ವಿತರಣಾ ಸೇವೆಗಳ ಬಳಕೆ ದಿನದಿಂದ ದಿನಕ್ಕೆ ಹೆಚ್ಚುತ್ತಿರುವ ನಡುವೆಯೇ, ಹಾಳಾದ ಹಾಗೂ ಅವಧಿ ಮೀರಿದ ಆಹಾರ ಉತ್ಪನ್ನಗಳ ವಿತರಣೆಗೆ ಸಂಬಂಧಿಸಿದ ದೂರುಗಳ ಹಿನ್ನೆಲೆಯಲ್ಲಿ ಸ್ವಿಗ್ಗಿಯ ಇನ್ಸ್ಟಾಮಾರ್ಟ್ಗೆ ಭಾರತೀಯ ಆಹಾರ ಸುರಕ್ಷತೆ ಮತ್ತು ಮಾನದಂಡಗಳ ಪ್ರಾಧಿಕಾರ (FSSAI) ಬಿಗ್ ಶಾಕ್ ನೀಡಿದೆ.
FSSAI, ಆಹಾರ ಸುರಕ್ಷತೆ ಮತ್ತು ಮಾನದಂಡಗಳ ಕಾಯ್ದೆ–2006ರ ಅಡಿಯಲ್ಲಿ ಉಲ್ಲಂಘನೆಗಳ ಆರೋಪಕ್ಕೆ ಸಂಬಂಧಿಸಿ ಸ್ವಿಗ್ಗಿ ಇನ್ಸ್ಟಾಮಾರ್ಟ್ಗೆ ಒಟ್ಟು 9 ನೋಟಿಸ್ಗಳನ್ನು ಜಾರಿಗೊಳಿಸಿದೆ. ಈ ಕುರಿತು ಸಂಸ್ಥೆ ತನ್ನ ‘ಎಕ್ಸ್’ (ಹಿಂದಿನ ಟ್ವಿಟ್ಟರ್) ಖಾತೆಯ ಮೂಲಕ ಮಾಹಿತಿ ನೀಡಿದೆ.
ಏನು ಆರೋಪ?
ಗ್ರಾಹಕರು ಸಲ್ಲಿಸಿರುವ ದೂರುಗಳ ಪ್ರಕಾರ, ಇನ್ಸ್ಟಾಮಾರ್ಟ್ ಮೂಲಕ ಹಾಳಾದ, ಕೊಳೆತ, ಅವಧಿ ಮೀರಿದ ಹಾಗೂ ಸುರಕ್ಷತೆಯಿಲ್ಲದ ಆಹಾರ ಉತ್ಪನ್ನಗಳನ್ನು ತಲುಪಿಸಲಾಗಿದೆ. ಮಕ್ಕಳ ಪೌಷ್ಟಿಕಾಂಶ ಆಹಾರ, ಹಾಲು, ಮೊಟ್ಟೆ ಸೇರಿದಂತೆ ಹಲವು ವಸ್ತುಗಳು ಹಾನಿಗೊಳಗಾದ ಸ್ಥಿತಿಯಲ್ಲಿ ವಿತರಿಸಲಾಗಿದೆ ಎಂಬ ಆರೋಪ ಕೇಳಿಬಂದಿದೆ.
ಇದಲ್ಲದೆ, ಕೆಲವು ಉತ್ಪನ್ನಗಳಲ್ಲಿ ಉಲ್ಲೇಖಿಸಿದ್ದ FSSAI ಪರವಾನಗಿ ಸಂಖ್ಯೆಗಳು ತಪ್ಪಾಗಿದ್ದವು ಅಥವಾ ಅಮಾನ್ಯವಾಗಿದ್ದವು. ಕೆಲವು ಆಹಾರ ವ್ಯವಹಾರಗಳನ್ನು ನೋಂದಾಯಿತ ಹೆಸರಿನ ಬದಲು ಬೇರೆ ಹೆಸರಿನಲ್ಲಿ ಪಟ್ಟಿ ಮಾಡಲಾಗಿತ್ತು ಎಂಬುದೂ ತನಿಖೆಯಲ್ಲಿ ಬೆಳಕಿಗೆ ಬಂದಿದೆ.
ಹಾಳಾದ ಉತ್ಪನ್ನವನ್ನು ಗ್ರಾಹಕರು ಹಿಂತಿರುಗಿಸಿದ ಬಳಿಕ ಅದನ್ನೇ ಮತ್ತೊಬ್ಬರಿಗೆ ಮರು ವಿತರಣೆ ಮಾಡಲಾಗಿದೆ ಎಂಬ ಗಂಭೀರ ಆರೋಪವೂ ಕೇಳಿಬಂದಿದೆ. ಗ್ರಾಹಕರ ದೂರುಗಳಿಗೆ ಸಮರ್ಪಕ ಪರಿಹಾರ ನೀಡದೆ ಕೇವಲ ಮರುಪಾವತಿಗೆ ಮಾತ್ರ ಸೀಮಿತವಾಗಿರುವುದಾಗಿ ದೂರಿನಲ್ಲಿ ಉಲ್ಲೇಖಿಸಲಾಗಿದೆ.
FSSAI ಸೂಚನೆ
ಈ ಎಲ್ಲಾ ಆರೋಪಗಳಿಗೆ ಸಂಬಂಧಿಸಿದಂತೆ ವಿವರವಾದ ಸ್ಪಷ್ಟೀಕರಣ ವರದಿ ಸಲ್ಲಿಸುವಂತೆ FSSAI ಸ್ವಿಗ್ಗಿ ಇನ್ಸ್ಟಾಮಾರ್ಟ್ಗೆ ಸೂಚಿಸಿದೆ. ವರದಿ ಸಲ್ಲಿಸದಿದ್ದರೆ ಕಾನೂನು ಕ್ರಮ ಕೈಗೊಳ್ಳಲಾಗುವುದು ಎಂದು ಎಚ್ಚರಿಕೆ ನೀಡಿದೆ.
ಆಹಾರ ಸುರಕ್ಷತೆ, ಗುಣಮಟ್ಟ ನಿಯಂತ್ರಣ, ಗ್ರಾಹಕರ ದೂರು ಪರಿಹಾರ ವ್ಯವಸ್ಥೆ ಹಾಗೂ ಮಾರಾಟಗಾರರ ಆನ್ಬೋರ್ಡಿಂಗ್ ಪ್ರಕ್ರಿಯೆಯಲ್ಲಿ ಗಂಭೀರ ಲೋಪಗಳಿರುವ ಸಾಧ್ಯತೆಗಳನ್ನೂ FSSAI ಉಲ್ಲೇಖಿಸಿದೆ.
ಸ್ವಿಗ್ಗಿ ಪ್ರತಿಕ್ರಿಯೆ
ಈ ಕುರಿತು ಪ್ರತಿಕ್ರಿಯಿಸಿರುವ ಸ್ವಿಗ್ಗಿ ಇನ್ಸ್ಟಾಮಾರ್ಟ್ ವಕ್ತಾರರು, “FSSAI ಗುರುತಿಸಿರುವ ಉತ್ಪನ್ನಗಳನ್ನು ಪರಿಶೀಲಿಸುತ್ತಿದ್ದೇವೆ. ಸಮಸ್ಯೆ ಪರಿಹರಿಸಲು ಸಂಬಂಧಿತ ಅಧಿಕಾರಿಗಳೊಂದಿಗೆ ನಿರಂತರ ಸಂಪರ್ಕದಲ್ಲಿದ್ದೇವೆ” ಎಂದು ತಿಳಿಸಿದ್ದಾರೆ.
ಗ್ರಾಹಕರು ಎಚ್ಚರ ವಹಿಸಬೇಕು
ತ್ವರಿತ ವಿತರಣಾ ಸೇವೆಗಳು ಅನುಕೂಲಕರವಾಗಿದ್ದರೂ, ಆಹಾರ ಸುರಕ್ಷತೆಯ ವಿಚಾರದಲ್ಲಿ ಗ್ರಾಹಕರು ಹೆಚ್ಚಿನ ಎಚ್ಚರಿಕೆ ವಹಿಸುವುದು ಅಗತ್ಯ. ಆಹಾರ ಉತ್ಪನ್ನಗಳನ್ನು ಖರೀದಿಸುವಾಗ FSSAI ಲೋಗೋ, ಉತ್ಪಾದನೆ ಹಾಗೂ ಅವಧಿ ಮುಕ್ತಾಯ ದಿನಾಂಕ, ಪ್ಯಾಕೇಜಿಂಗ್ ಗುಣಮಟ್ಟವನ್ನು ಪರಿಶೀಲಿಸಬೇಕು. ಹಾಳಾದ ಅಥವಾ ಅವಧಿ ಮೀರಿದ ಉತ್ಪನ್ನಗಳು ಬಂದಲ್ಲಿ ತಕ್ಷಣ ಸಂಬಂಧಿತ ಕಂಪನಿ ಹಾಗೂ FSSAIಗೆ ದೂರು ಸಲ್ಲಿಸುವುದು ಸೂಕ್ತ.
ಈ ಪ್ರಕರಣವು ತ್ವರಿತ ವಿತರಣಾ ಕ್ಷೇತ್ರದಲ್ಲಿರುವ ಇತರ ಕಂಪನಿಗಳಿಗೂ ಎಚ್ಚರಿಕೆಯ ಸಂದೇಶವಾಗಿದ್ದು, ಆಹಾರ ಸುರಕ್ಷತಾ ಮಾನದಂಡಗಳನ್ನು ಕಟ್ಟುನಿಟ್ಟಾಗಿ ಪಾಲಿಸುವ ಅಗತ್ಯವನ್ನು ಮತ್ತೊಮ್ಮೆ ನೆನಪಿಸಿದೆ.
