ಮನೆಯಲ್ಲಿರುವ ಹಳೆಯ ಚಿನ್ನವನ್ನು ಮಾರದೇ, ಲಾಕರ್‌ನಲ್ಲಿ ಇಡದೇ ಅದರಿಂದಲೇ ಆದಾಯ ಗಳಿಸುವ ಅವಕಾಶವನ್ನು ಕೇಂದ್ರ ಸರ್ಕಾರ ಕಲ್ಪಿಸಲು ಮುಂದಾಗಿದೆ. ‘ಚಿನ್ನ ನಗದೀಕರಣ ಯೋಜನೆ’ (Gold Monetisation Scheme)ಗೆ ಹೊಸ ರೂಪ ನೀಡಲು ಸರ್ಕಾರ ಸಿದ್ಧತೆ ನಡೆಸಿದ್ದು, ಶೀಘ್ರದಲ್ಲೇ ಅಧಿಕೃತ ಘೋಷಣೆ ಮಾಡುವ ನಿರೀಕ್ಷೆಯಿದೆ.

ದೇಶದಲ್ಲಿ ಚಿನ್ನದ ಆಮದು ಪ್ರಮಾಣವನ್ನು ಕಡಿಮೆ ಮಾಡುವ ಉದ್ದೇಶದಿಂದ ಈ ಯೋಜನೆಯನ್ನು ರೂಪಿಸಲಾಗುತ್ತಿದೆ. ಭಾರತೀಯರ ಮನೆಗಳಲ್ಲಿ ಅಪಾರ ಪ್ರಮಾಣದ ಚಿನ್ನ ಬಳಕೆಯಾಗದೆ ಉಳಿದಿದ್ದು, ಅದರ ಒಂದು ಭಾಗವನ್ನು ಆರ್ಥಿಕ ಚಟುವಟಿಕೆಗೆ ತರಲು ಸರ್ಕಾರ ಮುಂದಾಗಿದೆ. ಆಭರಣ ಉದ್ಯಮಕ್ಕೆ ಚಿನ್ನದ ಲಭ್ಯತೆ ಹೆಚ್ಚಿಸುವುದರ ಜೊತೆಗೆ ವಿದೇಶಿ ವಿನಿಮಯ ವೆಚ್ಚವನ್ನೂ ಕಡಿಮೆ ಮಾಡುವುದು ಈ ಯೋಜನೆಯ ಪ್ರಮುಖ ಗುರಿಯಾಗಿದೆ.

ಹೇಗೆ ಕಾರ್ಯನಿರ್ವಹಿಸಲಿದೆ?

ಹೊಸ ಯೋಜನೆಯಡಿ ಮಾನ್ಯತೆ ಪಡೆದ ಚಿನ್ನದ ವ್ಯಾಪಾರಿಗಳು ಹಾಗೂ ಜುವೆಲ್ಲರಿ ಸಂಸ್ಥೆಗಳು ‘ಚಿನ್ನ ಸಂಗ್ರಹ ಪಾಲುದಾರರಾಗಿ’ ಕಾರ್ಯನಿರ್ವಹಿಸಲಿವೆ. ಗ್ರಾಹಕರು ತಮ್ಮ ಮನೆಯ ಸಮೀಪದ ಅಧಿಕೃತ ಕೇಂದ್ರದಲ್ಲಿ ಹಳೆಯ ಚಿನ್ನವನ್ನು ಠೇವಣಿ ಇಡಬಹುದು.

ಠೇವಣಿ ಇಟ್ಟ ಚಿನ್ನವನ್ನು ಶುದ್ಧೀಕರಿಸಿ ಅದರಲ್ಲಿರುವ ಶುದ್ಧ ಚಿನ್ನದ ಪ್ರಮಾಣವನ್ನು ದಾಖಲಿಸಲಾಗುತ್ತದೆ. ಉದಾಹರಣೆಗೆ, 100 ಗ್ರಾಂ ಆಭರಣದಲ್ಲಿ 90 ಗ್ರಾಂ ಶುದ್ಧ ಚಿನ್ನ ಇದ್ದರೆ, ಅದನ್ನೇ ಠೇವಣಿಯಾಗಿ ಪರಿಗಣಿಸಲಾಗುತ್ತದೆ.

ಠೇವಣಿ ಅವಧಿ ಪೂರ್ಣಗೊಂಡ ಬಳಿಕ ಗ್ರಾಹಕರಿಗೆ ಅವರು ನೀಡಿದ ಆಭರಣವೇ ಮರಳಿ ಸಿಗುವುದಿಲ್ಲ. ಬದಲಾಗಿ, ಶುದ್ಧ ಚಿನ್ನದ ಬಿಸ್ಕತ್, ನಾಣ್ಯ ಅಥವಾ ಅದಕ್ಕೆ ಸಮನಾದ ನಗದು ಮೊತ್ತದ ಜೊತೆಗೆ ಬಡ್ಡಿಯನ್ನೂ ನೀಡಲಾಗುತ್ತದೆ.

ಎಷ್ಟು ಬಡ್ಡಿ ಸಿಗಲಿದೆ?

ಈ ಯೋಜನೆಯಡಿ ವಾರ್ಷಿಕ ಶೇ. 2.25ರಿಂದ ಶೇ. 2.50ರವರೆಗೆ ಬಡ್ಡಿ ನೀಡುವ ಪ್ರಸ್ತಾವನೆ ಇದೆ. ಹೀಗಾಗಿ ಮನೆಯಲ್ಲಿ ಬಳಸದೆ ಇಟ್ಟಿರುವ ಚಿನ್ನದಿಂದಲೂ ಆದಾಯ ಗಳಿಸುವ ಅವಕಾಶ ಗ್ರಾಹಕರಿಗೆ ದೊರೆಯಲಿದೆ.

ಗ್ರಾಹಕರಿಗೆ ಆಗುವ ಲಾಭಗಳು

• ಬಳಸದೆ ಇರುವ ಚಿನ್ನದಿಂದ ವರ್ಷಕ್ಕೆ ಶೇ.2.25ರಿಂದ ಶೇ.2.50ರವರೆಗೆ ಬಡ್ಡಿ ಗಳಿಸಬಹುದು.
• ಮನೆಯಲ್ಲಿಟ್ಟರೆ ಕಳ್ಳತನದ ಭಯ, ಬ್ಯಾಂಕ್ ಲಾಕರ್‌ನಲ್ಲಿ ಇಟ್ಟರೆ ಲಾಕರ್ ಶುಲ್ಕದ ಚಿಂತೆ ತಪ್ಪುತ್ತದೆ.
• ಅವಧಿ ಪೂರ್ಣಗೊಂಡ ಬಳಿಕ ಶುದ್ಧ ಚಿನ್ನ ಅಥವಾ ನಗದು ರೂಪದಲ್ಲಿ ಹಣ ಪಡೆಯುವ ಆಯ್ಕೆ ಇರುತ್ತದೆ.
• ಹಳೆಯ ಚಿನ್ನದ ಖರೀದಿ ಬಿಲ್ ಅಥವಾ ದಾಖಲೆಗಳಿಲ್ಲದಿದ್ದರೂ ಠೇವಣಿ ಇಡುವ ಅವಕಾಶ ನೀಡುವ ಬಗ್ಗೆ ಸರ್ಕಾರ ಪರಿಶೀಲನೆ ನಡೆಸುತ್ತಿದೆ.

ಸರ್ಕಾರಕ್ಕೆ ಏನು ಲಾಭ?

ಈ ಯೋಜನೆಯಿಂದ ದೇಶದ ಚಿನ್ನದ ಆಮದು ಪ್ರಮಾಣ ಕಡಿಮೆಯಾಗಲಿದ್ದು, ವಿದೇಶಿ ವಿನಿಮಯ ವೆಚ್ಚದಲ್ಲಿ ಉಳಿತಾಯವಾಗಲಿದೆ. ಮತ್ತೊಂದೆಡೆ ಆಭರಣ ಉದ್ಯಮಕ್ಕೆ ದೇಶೀಯವಾಗಿ ಚಿನ್ನ ಲಭ್ಯವಾಗುವುದರಿಂದ ಉದ್ಯಮಕ್ಕೂ ಉತ್ತೇಜನ ಸಿಗಲಿದೆ.

ಪ್ರಮುಖ ಅಂಕಿಅಂಶಗಳು

• ಭಾರತೀಯರ ಮನೆಗಳಲ್ಲಿ ಅಂದಾಜು 25,000ರಿಂದ 35,000 ಟನ್ ಚಿನ್ನವಿದೆ.
• ಸುಮಾರು 1,000 ಟನ್ ಚಿನ್ನವನ್ನು ಮಾರುಕಟ್ಟೆಗೆ ತರಲು ಸರ್ಕಾರ ಗುರಿ ಹೊಂದಿದೆ.
• ಒಟ್ಟು ಚಿನ್ನದ ಕೇವಲ ಶೇ.5ರಷ್ಟು ಈ ಯೋಜನೆಗೆ ಬಂದರೂ ಸುಮಾರು ₹8.57 ಲಕ್ಷ ಕೋಟಿ ಮೌಲ್ಯದ ಚಿನ್ನ ಆರ್ಥಿಕ ಚಟುವಟಿಕೆಗೆ ಸೇರುವ ಸಾಧ್ಯತೆ ಇದೆ.