ಫ್ರೆಂಚ್ ವಿಜ್ಞಾನಿಗಳು ರಷ್ಯಾದಲ್ಲಿ ಹೆಪ್ಪುಗಟ್ಟಿದ ಸರೋವರದ ಅಡಿಯಲ್ಲಿ ಸಮಾಧಿಯಾಗಿದ್ದ 48,500 ವರ್ಷಗಳಷ್ಟು ಹಳೆಯದಾದ “ಜೊಂಬಿ ವೈರಸ್” ಅನ್ನು ಪುನರುಜ್ಜೀವನಗೊಳಿಸಿದ್ದಾರೆ. ನ್ಯೂಯಾರ್ಕ್ ಪೋಸ್ಟ್ ಪ್ರಕಾರ, ಫ್ರೆಂಚ್ ವಿಜ್ಞಾನಿಗಳು ಜೊಂಬಿ ವೈರಸ್ ಅನ್ನು ಪುನರುಜ್ಜೀವನಗೊಳಿಸಿ ಕೋವಿಡ್ ನಂತಹ ಮತ್ತೊಂದು ಜಾಗತಿಕ ಸಾಂಕ್ರಾಮಿಕ ರೋಗದ ಭಯವನ್ನು ಹುಟ್ಟುಹಾಕಿದ್ದಾರೆ.
ನ್ಯೂಯಾರ್ಕ್ ಪೋಸ್ಟ್ ಈ ವೈರಸ್ ಅಧ್ಯಯನವನ್ನು ಉಲ್ಲೇಖಿಸಿದ್ದು, ಇದರ ವಿಮರ್ಷೆ ಇನ್ನೂ ಬಾಕಿ ಇದೆ ಎಂದಿದೆ. ಪ್ರಾಚೀನ ಅಜ್ಞಾತ ವೈರಸ್‌ನ ಪುನರುಜ್ಜೀವನದಿಂದ ಉಂಟಾಗುವ ಸಸ್ಯ, ಪ್ರಾಣಿ ಅಥವಾ ಮಾನವ ರೋಗಗಳ ಸಂದರ್ಭದಲ್ಲಿ ಪರಿಸ್ಥಿತಿಯು ಹೆಚ್ಚು ವಿನಾಶಕಾರಿಯಾಗಬಹುದು ಎಂದು ಅಧ್ಯಯನವು ತಿಳಿಸಿದೆ.
ಪ್ರಾಥಮಿಕ ವರದಿಯ ಪ್ರಕಾರ, ಜಾಗತಿಕ ತಾಪಮಾನವು ಅಗಾಧವಾದ ಪ್ರಮಾಣದ ಹಿಮಗಡ್ಡೆಗಳನ್ನು ಕರಗಿಸುತ್ತಿದೆ. ಆರ್ಕ್ಟಿಕ್ ಮತ್ತು ಅಂಟಾರ್ಕ್ಟಿಕ್ ಪ್ರದೇಶಗಳು ಹಿಮಾವೃತವಾಗಿದ್ದು, ಜಾಗತಿಕ ತಾಪಮಾನ ಮತ್ತು ಹವಾಮಾನ ಬದಲಾವಣೆಯಿಂದ ಈ ಹಿಮವು ಕರಗುತ್ತಿದೆ. ಈ ಹಿಮಾಚ್ಛಾದಿತ ಪ್ರದೇಶಗಳಲ್ಲಿ ಕಳೆದ ಒಂದು ಮಿಲಿಯನ್ ವರ್ಷಗಳಿಂದ ಹೆಪ್ಪುಗಟ್ಟಿರುವ ವೈರಸ್, ಬ್ಯಾಕ್ಟೀರಿಯಾ ಅಥವಾ ಫಂಗಸ್ ನಂತಹ ಪ್ರಾಣಾಂತಿಕ ಸೂಕ್ಷ್ಮಜೀವಿಗಳು ತಣ್ಣನೆ ಮಲಗಿವೆ. ಈ ಸೂಕ್ಷ್ಮ ಜೀವಿಗಳು ಹಿಮದಿಂದ ಹೊರಗೆ ಬಂದಾಗ ಸುತ್ತಲಿನ ಪರಿಸರದ ಜೊತೆ ಯಾವ ರೀತಿ ವರ್ತಿಸಲಿವೆ ಎನ್ನುವುದು ಯಾರಿಗೂ ತಿಳಿದಿಲ್ಲ.
ಈಗ ವಿಜ್ಞಾನಿಗಳು ಹೊರತೆಗೆದ ಪಂಡೋರಾವೈರಸ್ ಯೆಡೋಮಾ 48,500 ವರ್ಷಗಳಷ್ಟು ಹಳೆಯದಾಗಿದೆ ಎನ್ನಲಾಗಿದೆ. ಸೈಬೀರಿಯಾದಲ್ಲಿ 2013 ರಲ್ಲಿ ಈ ವಿಜ್ಞಾನಿಗಳ ತಂಡದಿಂದ ಗುರುತಿಸಲ್ಪಟ್ಟ 30,000 ವರ್ಷಗಳ ಹಿಂದಿನ ವೈರಸ್‌ನ ದಾಖಲೆಯನ್ನು ಈ ಜೊಂಬಿ ವೈರಸ್ ಮುರಿದಿದೆ. ಪಂಡೋರಾವೈರಸ್ ಅನ್ನು ರಷ್ಯಾದ ಯುಕೆಚಿ ಅಲಾಸ್, ಯಾಕುಟಿಯಾದಲ್ಲಿ ಸರೋವರದ ಕೆಳಭಾಗದಲ್ಲಿ ಕಂಡುಹಿಡಿಯಲಾಗಿದೆ. ಇದರ ಜೊತೆಗೆ ಇನ್ನೂ 13 ವೈರಸ್ ಗಳನ್ನು ಗುರುತಿಸಲಾಗಿದೆ. ಇವುಗಳು ಬೃಹತ್ ಗಾತ್ರದ ಆನೆಗಳ ತುಪ್ಪಳದಿಂದ ಹಿಡಿದು ಸೈಬೀರಿಯನ್ ತೋಳದ ಕರುಳಿನವರೆಗೆ ಎಲ್ಲೆಡೆ ಪತ್ತೆಯಾಗಿವೆ.
ಹೊಸ ಸ್ಟ್ರೈನ್ ಅಧ್ಯಯನದಲ್ಲಿ ವಿವರಿಸಿದ 13 ವೈರಸ್‌ಗಳಲ್ಲಿ ಪ್ರತಿಯೊಂದೂ ತನ್ನದೇ ಆದ ಜೀನೋಮ್ ಅನ್ನು ಹೊಂದಿದೆ ಎಂದು ಸೈನ್ಸ್ ಅಲರ್ಟ್ ಹೇಳಿದೆ. ಎಲ್ಲಾ “ಜೊಂಬಿ ವೈರಸ್‌ಗಳು” ಸಾಂಕ್ರಾಮಿಕವಾಗುವ ಸಾಮರ್ಥ್ಯವನ್ನು ಹೊಂದಿವೆ ಮತ್ತು ಅವುಗಳ ಜೀವಂತಿಕೆಯ ಸಂಸ್ಕೃತಿಗಳನ್ನು ಸಂಶೋಧಿಸಿದ ನಂತರ “ಆರೋಗ್ಯ ಅಪಾಯ” ವನ್ನು ಉಂಟುಮಾಡುತ್ತದೆ ಎಂದು ವಿಜ್ಞಾನಿಗಳು ಕಂಡುಹಿಡಿದಿದ್ದಾರೆ.
ದಿನೇ ದಿನೇ ಹಿಮಪದರಗಳು ಕರಗುತ್ತಿರುವುದರಿಂದ ಹೊಸ ಹೊಸ ಸೂಕ್ಷ್ಮಾಣು ಜೀವಿಗಳು ಪ್ರಕೃತಿಗೆ ತೆರೆದುಕೊಳ್ಳಲಿದ್ದು, ಭವಿಷ್ಯದಲ್ಲಿ ಕೋವಿಡ್-ಶೈಲಿಯ ಸಾಂಕ್ರಾಮಿಕ ರೋಗಗಳು ಹೆಚ್ಚು ಸಾಮಾನ್ಯವಾಗಲಿವೆ ಎಂದು ವಿಜ್ಞಾನಿಗಳು ನಂಬಿದ್ದಾರೆ.
