ಉಡುಪಿ: ಲೋಕಸಭಾ ಚುನಾವಣೆ ಹಿನ್ನೆಲೆಯಲ್ಲಿ ಮೊದಲ ಹಂತದಲ್ಲಿ ಈಗಾಗಲೇ  ಪಕ್ಷದ 14 ಮಂದಿ ಅಭ್ಯರ್ಥಿಗಳು ಕಣಕ್ಕೆ ಇಳಿದಿದ್ದು, ಎರಡನೆ ಹಂತದಲ್ಲಿ ಮತ್ತೆ 14 ಮಂದಿಯ ಅಭ್ಯರ್ಥಿಯ ಹೆಸರನ್ನು ಎ.7ರ ನಂತರ ಘೋಷಣೆ ಮಾಡಲಾಗುವುದು ಎಂದು ಉತ್ತಮ ಪ್ರಜಾಕೀಯ ಪಕ್ಷದ ಸಂಸ್ಥಾಪಕ, ಚಿತ್ರನಟ ಉಪೇಂದ್ರ ಹೇಳಿದರು.

ಉಡುಪಿಯಲ್ಲಿ ಇಂದು ಮಾಧ್ಯಮದವರೊಂದಿಗೆ ಮಾತನಾಡಿದ ಅವರು, ಪ್ರತಿಯೊಂದು ಕ್ಷೇತ್ರಗಳಿಗೂ ಭೇಟಿ ನೀಡಿ ಅಭ್ಯರ್ಥಿಗಳನ್ನು ಮಾಧ್ಯಮದ ಮೂಲಕ ಜನರಿಗೆ ಪರಿಚಯಿಸಿ ಪಕ್ಷ ವಿಚಾರವನ್ನು ತಿಳಿಸುವ ಕಾರ್ಯ ಮಾಡುತ್ತಿದ್ದೇನೆ. ನಮ್ಮ ಪಕ್ಷ ವಿಭಿನ್ನ ಅಲ್ಲ. ಇಂದಿನ ಸುಳ್ಳಿನ ಪ್ರಪಂಚದಲ್ಲಿ ನಮಗೆ ಸತ್ಯವೇ ವಿಭಿನ್ನವಾಗಿ ಕಾಣುತ್ತಿದೆ. ನಾವು ಸಂವಿಧಾನದಲ್ಲಿರುವುದನ್ನೇ ಮಾತನಾಡುತ್ತಿದ್ದೇವೆ. ಮತದಾನದ ಒಂದು ದಿನ ಮಟ್ಟಿಗೆ ಮಾತ್ರ ಪ್ರಜೆಗಳು ರಾಜರಾಗ ಬಾರದು. ಐದು ವರ್ಷ ಕೂಡ ಅವರ ಮಾತಿಗೆ ಬೆಲೆ ನೀಡುವ ನಿಜವಾದ ಪ್ರಜಾಪ್ರಭುತ್ವ ಈ ದೇಶದಲ್ಲಿ ಬರಬೇಕು ಎಂದರು.

ತೆರಿಗೆ ಪಾವತಿಸುವ ಪ್ರತಿಯೊಬ್ಬರು ಕೂಡ ಸಮಾಜ ಸೇವೆ ಮಾಡುತ್ತಿದ್ದಾರೆ. ಆದುದರಿಂದ ನಮ್ಮ ಮನೋಭಾವವನ್ನು ಬದಲಾಯಿಸಿಕೊಳ್ಳಬೇಕು. ಈ ಮೂಲಕ ರಾಜಕೀಯವೇ ಬದಲಾಗಬೇಕಾಗಿದೆ. ಆಗ ಸರಕಾರದಲ್ಲಿ ತಂತ್ರ ಜ್ಞಾನವನ್ನು ಬಳಸಿ ಸಂಪೂರ್ಣ ಪಾರದರ್ಶಕತೆ ತರಲು ಸಾಧ್ಯ. ಜನರಿಗೆ ಪಾರದರ್ಶಕತೆ, ಉತ್ತರ ನೀಡುವಂತಾದರೆ ಜನರೇ ರಾಜಕೀಯದಲ್ಲಿ ಸೇರಿ ಕೊಳ್ಳುತ್ತಾರೆ. ಅದೇ ರೀತಿ ರಾಜಕೀಯ ಪಕ್ಷಗಳ ಪ್ರಣಾಳಿಕೆಗಳು ನ್ಯಾಯಾಲಯ ದಲ್ಲಿ ನೋಂದಾಣಿಯಾಬೇಕು ಎಂದು ಅವರು ಹೇಳಿದರು.

ಉಡುಪಿ ಚಿಕ್ಕಮಗಳೂರು ಲೋಕಸಭಾ ಕ್ಷೇತ್ರದ ಉತ್ತಮ ಪ್ರಜಾಕೀಯ ಪಕ್ಷದ ಅಭ್ಯರ್ಥಿ ಸುರೇಶ್ ಕುಂದರ್ ಮಾತನಾಡಿ, ರಾಜಕೀಯ ಎಂಬುದು ವ್ಯಾಪರೀಕರಣ ಆಗುತ್ತಿದೆ. ಹಣ, ಜಾತಿ ಬಲವೇ ಮುಖ್ಯವಾಗುತ್ತಿದೆ. ಹಾಗಾಗಿ ನಿಜವಾದ ಅರ್ಹರು ರಾಜಕೀಯಕ್ಕೆ ಬರಲು ಹಿಂದೇಟು ಹಾಕುತ್ತಿದ್ದಾರೆ. ಆದುದರಿಂದ ರಾಜಕೀಯದಲ್ಲಿ ವೃತ್ತಿಪರತೆ ತರ ಬೇಕಾಗಿದೆ. ಸತ್ಯ ಜನರಿಂದ ಜನರಿಗೆ ತಲುಪಬೇಕೆಂದು ಹೇಳಿದರು.

ನಾವು ಸಾಮಾಜಿಕ ಜಾಲ ತಾಣ ಹಾಗೂ ಕರಪತ್ರಗಳನ್ನು ಹಂಚಿ ಪ್ರಚಾರ ಕಾರ್ಯ ನಡೆಸುತ್ತಿದ್ದೇವೆ. ಎಲ್ಲೂ ಸಾರ್ವಜನಿಕ ಸಭೆ, ಸಮಾರಂಭಗಳನ್ನು ನಡೆಸುವುದಿಲ್ಲ. ಬದಲಾವಣೆ ಬಯಸುವ ಜನರಿಗೆ ಅರಿವು ಆಗಿ ಅವರಿಗಾಗಿಯೇ ಮತ ಹಾಕಬೇಕೆ ಹೊರತು ನಮಗಾಗಿ ಅಲ್ಲ. ನಾವು ಅವರ ಪರವಾಗಿ ನಾವು ಕೆಲಸ ಮಾಡುತ್ತೇವೆ. ಹಣದ ಪ್ರತಿನಿಧಿಗಳ ಬದಲು ಜನರ ಪ್ರತಿನಿಧಿಗಳು ಸಂಸತ್ತಿಗೆ ಕಳುಹಿಸಬೇಕು ಎಂದು ಹೇಳಿದರು.