ತಮಿಳುನಾಡು: ರಾಜ್ಯದ ನೂತನ ಮುಖ್ಯಮಂತ್ರಿಯಾಗಿ ಸಿ ಜೊಸೆಫ್ ವಿಜಯ್ ಭಾನುವಾರ ಪ್ರಮಾಣ ವಚನ ಸ್ವೀಕರಿಸಿದರು. Tamilaga Vettri Kazhagam (ಟಿವಿಕೆ) ಪಕ್ಷದ ಮುಖ್ಯಸ್ಥರಾಗಿರುವ ವಿಜಯ್ ಅವರ ರಾಜಕೀಯ ಪ್ರವೇಶ ಇದೀಗ ತಮಿಳುನಾಡಿನ ರಾಜಕೀಯ ಇತಿಹಾಸದಲ್ಲಿ ಹೊಸ ಅಧ್ಯಾಯಕ್ಕೆ ಕಾರಣವಾಗಿದೆ.

ಪ್ರಾರ್ಥನೆಯೊಂದಿಗೆ ಆರಂಭವಾದ ಪ್ರಮಾಣ ವಚನ ಸಮಾರಂಭದಲ್ಲಿ ರಾಜ್ಯಪಾಲರು ವಿಜಯ್ ಅವರಿಗೆ ಅಧಿಕಾರ ಮತ್ತು ಗೌಪ್ಯತಾ ಪ್ರಮಾಣ ವಚನ ಬೋಧಿಸಿದರು. “ನಾನು ಸಿ. ಜೋಸೆಫ್ ವಿಜಯ್ ಎನ್ನುವ ನಾನು…” ಎಂದು ಪ್ರಮಾಣ ವಚನ ಆರಂಭಿಸಿದ ವೇಳೆ ಸಭಾಂಗಣದಲ್ಲಿ ಭಾರೀ ಚಪ್ಪಾಳೆ ಮೊಳಗಿತು. ಈ ವೇಳೆ ವಿಜಯ್ ಅವರ ತಂದೆ ನಿರ್ದೇಶಕ S. A. Chandrasekhar ಹಾಗೂ ತಾಯಿ ಗಾಯಕಿ Shoba Chandrasekhar ಭಾವುಕರಾಗಿ ಕೈಮುಗಿದು ಮಗನ ಕ್ಷಣವನ್ನು ಕಣ್ತುಂಬಿಕೊಂಡರು.

2009ರಲ್ಲಿ ಅಭಿಮಾನಿ ಸಂಘಟನೆಯಾಗಿ ಆರಂಭವಾದ ‘ವಿಜಯ್ ಮಕ್ಕಳ್ ಅಯ್ಯಕಂ’ ಮೂಲಕ ಸಮಾಜ ಸೇವೆ ನಡೆಸಿದ್ದ ವಿಜಯ್, ಸುಮಾರು 17 ವರ್ಷಗಳ ರಾಜಕೀಯ ತಯಾರಿಯ ಬಳಿಕ ಮುಖ್ಯಮಂತ್ರಿ ಹುದ್ದೆ ಅಲಂಕರಿಸಿದ್ದಾರೆ. ಅವರ ರಾಜಕೀಯ ಏರಿಕೆ ತಮಿಳುನಾಡಿನ ಸಾಂಪ್ರದಾಯಿಕ ರಾಜಕೀಯ ಲೆಕ್ಕಾಚಾರಗಳನ್ನೇ ಬದಲಿಸಿದೆ ಎಂದು ವಿಶ್ಲೇಷಿಸಲಾಗುತ್ತಿದೆ.

ಭರವಸೆಗಳ ಅನುಷ್ಠಾನವೇ ದೊಡ್ಡ ಸವಾಲು

ಚುನಾವಣೆಯಲ್ಲಿ ವಿಜಯ್ ನೇತೃತ್ವದ ಟಿವಿಕೆ ಹಲವು ಜನಪರ ಭರವಸೆಗಳನ್ನು ಘೋಷಿಸಿತ್ತು. ಮನೆ ಯಜಮಾನಿಯರಿಗೆ ಮಾಸಿಕ ₹2,500 ನೆರವು, ಪ್ರತಿ ಕುಟುಂಬಕ್ಕೆ ವರ್ಷಕ್ಕೆ 6 ಉಚಿತ ಗ್ಯಾಸ್ ಸಿಲಿಂಡರ್, ಬಡ ಹೆಣ್ಮಕ್ಕಳ ಮದುವೆಗೆ 8 ಗ್ರಾಂ ಚಿನ್ನ ಹಾಗೂ ರೇಷ್ಮೆ ಸೀರೆ, ಮಹಿಳಾ ಸಂಘಗಳಿಗೆ ₹5 ಲಕ್ಷ ಬಡ್ಡಿರಹಿತ ಸಾಲ, ಮಹಿಳೆಯರಿಗೆ ಉಚಿತ ಬಸ್ ಪ್ರಯಾಣ, ನವಜಾತ ಶಿಶುಗಳಿಗೆ ಚಿನ್ನದ ಉಂಗುರ ಮತ್ತು ವೆಲ್ಕಮ್ ಕಿಟ್ ನೀಡುವ ಭರವಸೆ ನೀಡಲಾಗಿದೆ.

ಇದಲ್ಲದೆ, ಪ್ರತಿ ಮನೆಗೆ 200 ಯುನಿಟ್ ಉಚಿತ ವಿದ್ಯುತ್, ಉಚಿತ ಕುಡಿಯುವ ನೀರು, ರೈತರ ಸಾಲದ 50% ಮನ್ನಾ, ನಿರುದ್ಯೋಗಿ ಪದವೀಧರರಿಗೆ ₹2 ಸಾವಿರದಿಂದ ₹4 ಸಾವಿರವರೆಗೆ ಧನಸಹಾಯ, 5 ಲಕ್ಷ ಉದ್ಯೋಗ ಸೃಷ್ಟಿ, ವೃದ್ಧರು ಹಾಗೂ ವಿಶೇಷ ಚೇತನರಿಗೆ ಮಾಸಿಕ ₹3 ಸಾವಿರ ಪಿಂಚಣಿ ಮತ್ತು ಪ್ರತಿ ಕುಟುಂಬಕ್ಕೆ ₹25 ಲಕ್ಷ ಉಚಿತ ಆರೋಗ್ಯ ವಿಮೆ ಘೋಷಿಸಲಾಗಿದೆ. ಈ ಎಲ್ಲಾ ಭರವಸೆಗಳನ್ನು ಜಾರಿಗೆ ತರುವುದು ಇದೀಗ ವಿಜಯ್ ಸರ್ಕಾರದ ಮುಂದಿರುವ ಅತಿ ದೊಡ್ಡ ಪರೀಕ್ಷೆಯಾಗಿದೆ.

ಚಿತ್ರರಂಗದ ‘ದಳಪತಿ’ಯಿಂದ ರಾಜಕೀಯ ನಾಯಕನ ತನಕ

1974ರ ಜೂನ್ 22ರಂದು ಚೆನ್ನೈನಲ್ಲಿ ಜನಿಸಿದ ವಿಜಯ್ ಸಿನಿಮಾ ಕುಟುಂಬದಲ್ಲೇ ಬೆಳೆದವರು. ಬಾಲನಟನಾಗಿ 1984ರಲ್ಲಿ ಬಿಡುಗಡೆಯಾದ Vetri ಚಿತ್ರದಲ್ಲಿ ಮೊದಲ ಬಾರಿಗೆ ಅಭಿನಯಿಸಿದ್ದರು. ಬಳಿಕ 18ನೇ ವಯಸ್ಸಿನಲ್ಲಿ Naalaiya Theerpu ಚಿತ್ರದ ಮೂಲಕ ನಾಯಕ ನಟನಾಗಿ ಗುರುತಿಸಿಕೊಂಡರು.

ಇದುವರೆಗೆ ಸುಮಾರು 69ಕ್ಕೂ ಹೆಚ್ಚು ಸಿನಿಮಾಗಳಲ್ಲಿ ನಟಿಸಿರುವ ವಿಜಯ್, ದಕ್ಷಿಣ ಭಾರತದ ಅತ್ಯಂತ ಜನಪ್ರಿಯ ಮತ್ತು ಅತಿ ಹೆಚ್ಚು ಸಂಭಾವನೆ ಪಡೆಯುವ ನಟರಲ್ಲಿ ಒಬ್ಬರಾಗಿದ್ದಾರೆ. ಅಭಿಮಾನಿಗಳಿಂದ ‘ದಳಪತಿ’ ಎಂದು ಕರೆಯಲ್ಪಡುವ ವಿಜಯ್, ಇದೀಗ ರಾಜಕೀಯದಲ್ಲಿಯೂ ಹೊಸ ‘ವಿಜಯ’ ದಾಖಲಿಸಿದ್ದಾರೆ.