writeup: suvarchala bs

ಮಕ್ಕಳ ಮನಸ್ಸು ಹಸಿ ಮಣ್ಣಿನ ಹಾಗೆ. ನಾವು ಅದನ್ನು ಯಾವ ಆಕಾರಕ್ಕೆ ರೂಪಿಸುತ್ತೇವೋ ಹಾಗೇ ಅದು ಗಟ್ಟಿಯಾಗಿ ಮನಸ್ಸು ರೂಪುಗೊಳ್ಳುತ್ತದೆ. ಬಾಲ್ಯದಲ್ಲಿ ಮಕ್ಕಳ ವ್ಯಕ್ತಿತ್ವ ರೂಪುಗೊಳ್ಳುವ ಸಂದರ್ಭದಲ್ಲಿ ಮಕ್ಕಳಿಗೆ ಸಿಗವ ಶಿಕ್ಷಣ, ಸಂಸ್ಕಾರಗಳೇ ಕಡೆಯ ತನಕ ಉಳಿದುಕೊಳ್ಳುತ್ತವೆ. ಹಾಗಾಗೇ ಮಕ್ಕಳಿಗೆ ಒಳ್ಳೆಯ ಮಾನಸಿಕ ಆರೋಗ್ಯ ಸಿಗುವಂತೆ ಪೋಷಕರು ಜಾಗ್ರತೆವಹಿಸಿದರೆ ಮಕ್ಕಳು ಮುಂದೆ ಉತ್ತಮವಾಗಿ ಬದುಕಲು ಸಾಧ್ಯವಾಗುತ್ತದೆ. ಇದು ನಮ್ಮ ಕಳಕಳಿ

ಮಕ್ಕಳ ಮಾನಸಿಕ ಆರೋಗ್ಯಕ್ಕಾಗಿ ಹೀಗೆ ಮಾಡಿ

• ಮಕ್ಕಳ ಮನಸ್ಸನ್ನು ಅರಿತುಕೊಂಡು ಪ್ರೀತಿಯಿಂದಲೇ ಬುದ್ಧಿ ಹೇಳಿ, ತಪ್ಪು ಕೆಲಸ ಮಾಡಿದ ಸಂದರ್ಭದಲ್ಲಿ ಒಂದೇ ಸರ್ತಿ ಬೈದು, ಹೊಡೆದು ಮಾಡುವ‌ ಬದಲು ನಿಧಾನವಾಗಿ ಅರ್ಥ ಮಾಡಿಸಿ ಆಗ ಮಕ್ಕಳು ಬೇಗ ತಪ್ಪನ್ನು ತಿದ್ದಿಕೊಳ್ಳುತ್ತಾರೆ.
• ಮಕ್ಕಳ ಎದುರು ನೀವು ಇತರರಿಗೆ ಬೈಯ್ಯಬೇಡಿ ಅಥವಾ ಅವರನ್ನು ತಿರಸ್ಕಾರ ದೃಷ್ಟಿಯಿಂದ ನೋಡುವುದಾಗಲೀ, ಹಂಗಿಸುವುದನ್ನಾಗಲೀ ಮಾಡಬೇಡಿ. ಮಕ್ಕಳು ಯಾವಾಗಲೂ ಹಿರಿಯರನ್ನು ನೋಡಿ ಕಲಿಯುತ್ತಾರೆ.
• ಇತರ ಮಕ್ಕಳೊಂದಿಗೆ ನಿಮ್ಮ ಮಕ್ಕಳನ್ನು ಹೋಲಿಸಬೇಡಿ. ಪ್ರತಿ ಮಗುವಿಗೂ ಅದರದ್ದೇ ಆದ ವಿಶೇಷ ಸಾಮರ್ಥ್ಯ ಇರುತ್ತದೆ. ಅದನ್ನು ಗುರುತಿಸಿ ಪ್ರೋತ್ಸಾಹಿಸಿ.
• ನೀವೆಷ್ಟೇ ನಿಮ್ಮ ಕೆಲಸಗಳಲ್ಲಿ ಬ್ಯುಸಿ ಇದ್ದರೂ ಮಕ್ಕಳಿಗಾಗಿ ಸ್ವಲ್ಪ ಸಮಯ ಮೀಸಲಿಡಿ. ವಾರಕ್ಕೊಮ್ಮೆಯಾದರೂ ಮಕ್ಕಳನ್ನು ಹೊರಗೆ ಕರೆದೊಯ್ಯಿರಿ. ನೆನಪಿಡಿ ಮಕ್ಕಳಿಗೆ ದುಡ್ಡಿಗಿಂತ ಮುಖ್ಯ ನಿಮ್ಮ ಸಾಮೀಪ್ಯ ಹಾಗೂ ಪ್ರೀತಿ.

• ಮಕ್ಕಳ ಎದುರು ಪೋಷಕರಾದ ನೀವು ಯಾವಾಗಲೂ ಜಗಳವಾಡುತ್ತಿರಬೇಡಿ, ದಾಂಪತ್ಯ ಜೀವನದ ಕುರಿತು ಮಕ್ಕಳ ಮನಸ್ಸಲ್ಲಿ ಜಿಗುಪ್ಸೆ ಮೂಡಬಹುದು. ಭಿನ್ನಾಭಿಪ್ರಾಯಗಳು ಸಹಜ, ಅವುಗಳನ್ನು ಜಾಣ್ಮೆಯಿಂದ ಬಗೆಹರಿಸಿ.
• ಹಿರಿಯರು ಮಾತನಾಡುವಾಗ ಮಕ್ಕಳು ಕೇಳಬಾರದು ಎಂದು ಹೊರಗೆ ಕಳಿಸಬೇಡಿ. ಮಕ್ಕಳ ಕುತೂಹಲ ಹೆಚ್ಚಾಗಿ ಕದ್ದಾಲಿಸುವ ಸ್ವಭಾವ ಬರಬಹುದು. ಅದರ ಬದಲು ಮಕ್ಕಳ ಎದುರು ಮಾತನಾಡುವ ಸೂಕ್ಷ್ಮತೆಯನ್ನು ಹಿರಿಯರಾಗಿ ನೀವು ಅರಿತುಕೊಳ್ಳಿ.
• ಮಕ್ಕಳ ಮೇಲೆ ನಿಮ್ಮೆಲ್ಲಾ ಆಸೆ ಆಕಾಂಕ್ಷೆಗಳನ್ನು ಹೇರಿಕೆ ಮಾಡಬೇಡಿ. ಮಕ್ಕಳ ಆಸಕ್ತಿಯನ್ನು ಗುರುತಿಸಿ ಪ್ರೋತ್ಸಾಹಿಸಿ

ಕೊನೆಯದಾಗಿ ಕೇವಲ ಅಂಕಗಳಿಕೆ, ಹಣಗಳಿಕೆ ಮುಖ್ಯವಲ್ಲ. ನಮಗೇನು ಬೇಕು ಎಂಬುದನ್ನು ಅರಿತುಕೊಳ್ಳುತ್ತಾ ಇದ್ದುದರಲ್ಲಿ ತೃಪ್ತಿ ಕಂಡುಕೊಳ್ಳುತ್ತಾ ನೆಮ್ಮದಿಯ ಬಾಳ್ವೆ ನಡೆಸುವುದೇ ಪರಮ ಸತ್ಯ ಎಂಬುದನ್ನು ಮಕ್ಕಳಿಗೆ ಅರ್ಥ ಮಾಡಿಸಿ. ಮಕ್ಕಳ ಮಾನಸಿಕ, ನೈತಿಕ ಬೆಳವಣಿಗೆಯಲ್ಲಿ ಪೋಷಕರಾಗಿ ನಿಮ್ಮ ಪಾತ್ರ ಬಹಳ ಮಹತ್ವದ್ದು.