ಇತ್ತೀಚಿನ ಪರಿಕಲ್ಪನಾ ವೀಡಿಯೊದಲ್ಲಿ, ಜೈವಿಕ ತಂತ್ರಜ್ಞಾನಶಾಸ್ತ್ರಜ್ಞ ಮತ್ತು ಚಲನಚಿತ್ರ ನಿರ್ಮಾಪಕ ಹಶೆಮ್ ಅಲ್-ಘೈಲಿ ಅವರು ವಿಶ್ವದ ಮೊದಲ ಕೃತಕ ಗರ್ಭಾಶಯದ ಸೌಲಭ್ಯವಾದ ಎಕ್ಟೋಲೈಫ್‌ನೊಳಗೆ ವಿಚಿತ್ರ ಮತ್ತು ಆಕರ್ಷಕ ಪ್ರವಾಸಕ್ಕೆ ನಮ್ಮನ್ನು ಕರೆದೊಯ್ಯುತ್ತಾರೆ. ಈ ಕೃತಕ ಬುದ್ದಿಮತ್ತೆ-ಚಾಲಿತ ಕಾಲ್ಪನಿಕ ಸಂಕೀರ್ಣವು ಭವಿಷ್ಯದ ಪೋಷಕರಿಗೆ ನೈಸರ್ಗಿಕ ಹೆರಿಗೆಗೆ ಸಂಭಾವ್ಯವಾಗಿ ಸುರಕ್ಷಿತ ಪರ್ಯಾಯವನ್ನು ನೀಡುತ್ತದೆ ಮತ್ತು ಅದಕ್ಕೆ ಸಂಬಂಧಿಸಿದ ಮಾರಣಾಂತಿಕ ತೊಡಕುಗಳನ್ನು ತೆಗೆದುಹಾಕಲಿದೆ.

ವಿಶ್ವ ಆರೋಗ್ಯ ಸಂಸ್ಥೆಯ ಪ್ರಕಾರ, ಸುಮಾರು 300,000 ಮಹಿಳೆಯರು ಗರ್ಭಾವಸ್ಥೆಯ ತೊಂದರೆಗಳಿಂದ ಸಾಯುತ್ತಾರೆ. ಎಕ್ಟೋಲೈಫ್ ಕೃತಕ ಗರ್ಭವನ್ನು ಮಾನವನ ನೋವನ್ನು ನಿವಾರಿಸಲು ಮತ್ತು ಸಿ-ವಿಭಾಗಗಳ ಸಾಧ್ಯತೆಗಳನ್ನು ಕಡಿಮೆ ಮಾಡಲು ವಿನ್ಯಾಸಗೊಳಿಸಲಾಗಿದೆ ಎಂದು ಈ ಪರಿಕಲ್ಪನೆಯನ್ನು ಹುಟ್ಟುಹಾಕಿರುವ ಅಲ್-ಘೈಲಿ ಹೇಳುತ್ತಾರೆ.

ಮಹಿಳೆಯರು ಪ್ರಸವ ವೇದನೆಯನ್ನು ಅನುಭವಿಸುವ ಸಂಕಷ್ಟದಿಂದ ಪಾರುಮಾಡಲಿರುವ ಈ ತಂತ್ರಜ್ಞಾನವು ಗುಂಡಿ ಒತ್ತಿದಾಕ್ಷಣ ಗರ್ಭದಿಂದ ಮಗು ಹೊರಬರುವಂತಹ ವಿಚಿತ್ರ ವಿಧಾನವನ್ನು ಒಳಗೊಳ್ಳಲಿದೆ! ಕ್ಯಾನ್ಸರ್‌ ಅಥವಾ ಇನ್ನಿತರ ಆರೋಗ್ಯ ಸಮಸ್ಯೆಗಳ ನಂತರ ಗರ್ಭಾಶಯವನ್ನು ತೆಗೆದುಹಾಕಿರುವ ಮಹಿಳೆಯರಿಗಾಗಿ ಈ ಯೋಜನೆಯನ್ನು ವಿನ್ಯಾಸಗೊಳಿಸಲಾಗಿದೆ. ಇದಲ್ಲದೆ, ಜನಸಂಖ್ಯೆಯ ಬೆಳವಣಿಗೆಯಲ್ಲಿ ತೀವ್ರ ಕುಸಿತವನ್ನು ಹೊಂದಿರುವ ದೇಶಗಳಲ್ಲಿ ಎಕ್ಟೋಲೈಫ್‌ ಅನ್ನು ನಿಯೋಜಿಸಬಹುದು ಎನ್ನಲಾಗಿದೆ. ಈ ತಂತ್ರಜ್ಞಾನವು ಪರಿಣಾಮಕಾರಿಯಾಗಲಿರುವುದೇ, ಇದರಿಂದ ಮನುಕುಲಕ್ಕೆ ಕೆಡುಕಾಗುವುದೆ ಎನ್ನುವ ಬಗ್ಗೆ ಚರ್ಚೆಗಳಿಗೆ ಇದು ಕಾರಣವಾಗಲಿದೆ.

ಹಶೆಮ್ ಅಲ್-ಘೈಲಿಯವರ ಎಕ್ಟೋಲೈಫ್ 75 ಅತ್ಯಾಧುನಿಕ ಲ್ಯಾಬ್‌ಗಳೊಂದಿಗೆ ಒಂದು ದೊಡ್ಡ ವೈಜ್ಞಾನಿಕ-ಪ್ರೇರಿತ ಸೌಲಭ್ಯವಾಗಿ ಕಾರ್ಯನಿರ್ವಹಿಸಲಿದೆ. ಪ್ರತಿಯೊಂದು ಲ್ಯಾಬ್ ನಲ್ಲಿ 400 ಬೆಳವಣಿಗೆಯ ಪಾಡ್‌ಗಳು ಮಹಿಳೆಯ ಗರ್ಭಕೋಶದ ನಿಖರವಾದ ಪರಿಸ್ಥಿತಿಗಳನ್ನು ಪುನರಾವರ್ತಿಸುವ ಕೃತಕ ಗರ್ಭಾಶಯಗಳನ್ನು ಹೊಂದಲಿವೆ. ಪ್ರತಿ ಸೌಲಭ್ಯವೂ ವರ್ಷಕ್ಕೆ 30,000 ಲ್ಯಾಬ್ ನಲ್ಲಿ ಬೆಳೆದ ಶಿಶುಗಳನ್ನು ಸೋಂಕು ಮುಕ್ತ ವಾತಾವರಣದಲ್ಲಿ ಬೆಳೆಸಿ ಹೆತ್ತು ಕೊಡಲಿವೆ!

ಪ್ರತಿ ಬೆಳವಣಿಗೆಯ ಪಾಡ್ ಹೃದಯ ಬಡಿತ, ಆಮ್ಲಜನಕದ ಶುದ್ಧತ್ವ, ತಾಪಮಾನ, ಉಸಿರಾಟ ಮತ್ತು ರಕ್ತದೊತ್ತಡದಂತಹ ಪ್ರಮುಖ ಚಿಹ್ನೆಗಳನ್ನು ಮೇಲ್ವಿಚಾರಣೆ ಮಾಡುವ ಸಂವೇದಕಗಳನ್ನು ಹೊಂದಿದೆ ಮತ್ತು ಕೃತಕ ಬುದ್ದಿಮತ್ತೆಯ ವ್ಯವಸ್ಥೆಯು ಭೌತಿಕ ಲಕ್ಷಣಗಳನ್ನು ಮೇಲ್ವಿಚಾರಣೆ ಮಾಡುತ್ತದೆ ಮತ್ತು ಯಾವುದೇ ಸಂಭಾವ್ಯ ಆನುವಂಶಿಕ ಅಸಹಜತೆಗಳನ್ನು ಗುರುತಿಸುತ್ತದೆ. ಮಕ್ಕಳ ಬೆಳವಣಿಗೆಯ ಸಂಪೂರ್ಣ ಮತ್ತು ಕ್ಷಣ ಕ್ಷಣದ ಮಾಹಿತಿಯನ್ನು ಅದರ ಜೈವಿಕ ಪೋಷಕರು ತಮ್ಮ ಮನೆಯಲ್ಲಿ ಕುಳಿತು ಮೊಬೈಲ್ ಫೋನ್ ಮೂಲಕ ವೀಕ್ಷಿಸಬಹುದು. ಹೆಚ್ಚು ಧನವಂತರಾಗಿದ್ದರೆ, ಮಗುವನ್ನು ಬೆಳೆಸುವ ಈ ತಂತ್ರಜ್ಞಾನವನ್ನು ತಮ್ಮ ಮನೆಗಳಲ್ಲೇ ಅಳವಡಿಸಿಕೊಳ್ಳಬಹುದು.

ಮಕ್ಕಳಿಲ್ಲದ ದಂಪತಿಗಳಿಗಾಗಿ ಟೆಸ್ಟ್ ಟ್ಯೂಬ್ ಬೇಬಿ ಮತ್ತು ಬಾಡಿಗೆ ತಾಯಂದಿರಂತಹ ವ್ಯವಸ್ಥೆ ಇದ್ದರೂ ಎಕ್ಟೋಲೈಫ್ ನಲ್ಲಿ ತಾಯಿಯ ಗರ್ಭದ ಅವಶ್ಯಕತೆಯೆ ಇರುವುದಿಲ್ಲ. ಸಂಪೂರ್ಣವಾಗಿ ನವೀಕರಿಸಬಹುದಾದ ಇಂಧನಗಳ ಮೂಲಕ ಕೃತಕ ಗರ್ಭಗಳನ್ನು ಫ್ಯಾಕ್ಟರಿ ಮಾದರಿಯಲ್ಲಿ ನಿರ್ಮಿಸಿರುವ ಕಟ್ಟಡಗಳಲ್ಲಿಟ್ಟು ಇದರಲ್ಲಿ ಮಗುವನ್ನು ಪೊಷಿಸಿ ಬೆಳಸಿ ಹೆತ್ತವರಿಗೆ ನೀಡಲಾಗುತ್ತದೆ. ಹೆತ್ತವರು ತಮ್ಮ ಮಕ್ಕಳ ರೂಪ, ಬಣ್ಣ ಗುಣಗಳನ್ನು ಪೂರ್ವನಿರ್ಧರಿಸಿ ತಮ್ಮ ಇಚ್ಛೆಗನುಗುಣವಾದ ಮಕ್ಕಳನ್ನು ಪಡೆಯಬಹುದು.

ಸಂಪೂರ್ಣವಾಗಿ ಯಾವುದೋ ಸೈ-ಫೈ ಸಿನಿಮಾದ ರೀತಿ ಕಾಣುವಂತಹ ಈ ತಂತ್ರಜ್ಞಾನವು ಭವಿಷ್ಯದಲ್ಲಿ ಹೇಗೆ ಕಾರ್ಯರೂಪಕ್ಕೆ ಬರಲಿದೆ ಎನ್ನುವುದನ್ನು ಹೇಳುವುದು ಅಸಾಧ್ಯವಾದರೂ, ಭೂತಕಾಲದಲ್ಲಿ ಈ ರೀತಿ ಗರ್ಭಗಳನ್ನು ಮಡಕೆಯಲ್ಲಿಟ್ಟು ಬೆಳೆಸಿರುವ ದೃಷ್ಟಾಂತ ಮಹಾಭಾರತದಲ್ಲಿ ಉಲ್ಲೇಖವಾಗಿದೆ. ಮಹಾಭಾರತದ ರಚನಾಕಾರರಾದ ವ್ಯಾಸ ಮಹರ್ಷಿಗಳು ಗಾಂಧಾರಿಯ ಗರ್ಭದ ಚೂರುಗಳನ್ನು ಮಡಕೆಯಲ್ಲಿಟ್ಟು ಬೆಳೆಸಿ ಅಕೆಯನ್ನು ನೂರು ಮಕ್ಕಳ ತಾಯಿಯನ್ನಾಗಿಸಿದ ಬಗ್ಗೆ ಕಾವ್ಯದಲ್ಲಿ ಉಲ್ಲೇಖವಿದೆ. ಮೇಲು ನೋಟಕ್ಕೆ ಇದು ಅಸಾಧ್ಯವೆಂಬಂತೆ ಕಂಡರೂ, ಇದೀಗ ಎಕ್ಟೋಲೈಫ್ ತಂತ್ರಜ್ಞಾನದಲ್ಲಿ ಮಕ್ಕಳನ್ನು ಸಂಪೂರ್ಣವಾಗಿ ಕೃತಕ ಗರ್ಭದಲ್ಲಿಟ್ಟು ಮಾನವ ಹಸ್ತಕ್ಷೇಪವಿಲ್ಲದೆಯೆ ಹೆರುವ ಈ ಪ್ರಕ್ರಿಯೆಯನ್ನು ಕಂಡಾಗ ಈ ತಂತ್ರಜ್ಞಾನ ಮೊದಲೇ ಇತ್ತೆ ಎನ್ನುವ ಅನುಮಾನಗಳನ್ನು ಹುಟ್ಟುಹಾಕುತ್ತಿರುವುದಂತು ಸತ್ಯ.

ಕೃಪೆ: ಡಿಸೈನ್ ಬೂಮ್. ಕಾಮ್

ವೀಡಿಯೋ:ಹಶೆಮ್ ಅಲ್ ಘೈಲಿ