ಆರ್ಟೊಕಾರ್ಪಸ್ ಹೆಟೆರೊಫಿಲ್ಲಸ್ ಎಂಬ ವೈಜ್ಞಾನಿಕ ಹೆಸರು ಹೊಂದಿರುವ ಹಲಸು ಉಷ್ಣವಲಯದ ದೇಶಗಳಾದ ಆಫ್ರಿಕಾ, ಏಷ್ಯಾ ಮತ್ತು ದಕ್ಷಿಣ ಅಮೆರಿಕಾ ದೇಶಗಳಲ್ಲಿ ಯಥೇಚ್ಛವಾಗಿ ಬೆಳೆಯುತ್ತವೆ.

ಪ್ರಾಚೀನ ಕಾಲದಿಂದಲೂ ಮಾನವನ ಆಹಾರದ ಭಾಗವಾಗಿರುವ ಹಲಸಿನ ಹಣ್ಣನ್ನು ಸಂಸ್ಕೃತದಲ್ಲಿ ಪಾನಸ ಫಲ ಎಂದು ಕರೆಯಲಾಗುತ್ತದೆ. ಹಲಸು ಬಾಂಗ್ಲಾದೇಶ ಮತ್ತು ಶ್ರೀಲಂಕಾದ ರಾಷ್ಟ್ರೀಯ ಹಣ್ಣಾಗಿದ್ದರೆ, ಭಾರತದ ಕೇರಳ ಮತ್ತು ತಮಿಳುನಾಡಿನಲ್ಲಿ ರಾಜ್ಯ ಹಣ್ಣು ಎನ್ನುವ ಹೆಗ್ಗಳಿಕೆ ಹೊಂದಿದೆ.

ಆಯುರ್ವೇದವು ಹಲಸಿನ ಹಣ್ಣಿಗೆ ಹೆಚ್ಚಿನ ಪ್ರಾಮುಖ್ಯತೆಯನ್ನು ನೀಡುತ್ತದೆ. ಇದು ದೇಹದಲ್ಲಿ ಪಿತ್ತ ಮತ್ತು ವಾತ ದೋಷವನ್ನು ಕಡಿಮೆ ಮಾಡಲು ಸಹಾಯ ಮಾಡುತ್ತದೆ. ಇದು ವೀರ್ಯ ಉತ್ಪಾದನೆಗೆ ಸಹಾಯ ಮಾಡುತ್ತದಲ್ಲದೆ, ದೇಹ ಶಕ್ತಿಯನ್ನು ಹೆಚ್ಚಿಸುತ್ತದೆ ಮತ್ತು ಪೌಷ್ಟಿಕತೆ ನೀಡುತ್ತದೆ. ತರಕಾರಿಯಾಗಿ ಬಳಸಲಾಗುವ ಹಸಿ ಹಲಸಿನಲ್ಲಿ ನಾರು ಸಮೃದ್ಧವಾಗಿದೆ. ಮಧುಮೇಹವನ್ನು ಕಡಿಮೆ ಮಾಡಲು ಮತ್ತು ಕಾಲಾನಂತರದಲ್ಲಿ ಸ್ಥಿರವಾದ ಜೀರ್ಣಕ್ರಿಯೆಯನ್ನು ಸ್ಥಾಪಿಸುವಲ್ಲಿ ಬಹಳ ಪರಿಣಾಮಕಾರಿಯಾಗಿದೆ. ಹಲಸಿನ ಹಣ್ಣಿನ ಎಲೆಗಳೊಂದಿಗೆ ಕುದಿಸಿದ ನೀರನ್ನು ಸ್ನಾನಕ್ಕೆ ಬಳಸಿದಲ್ಲಿ ದೇಹದಲ್ಲಿನ ವಾತ ದೋಷ ಕಡಿಮೆಯಾಗುತ್ತದೆ.

ಹಲಸಿನ ಹಣ್ಣಿನಲ್ಲಿ ಜೀವಸತ್ವಗಳು, ಖನಿಜಗಳು, ಕಬ್ಬಿಣ, ಕ್ಯಾಲ್ಸಿಯಂ ಮತ್ತು ಪೊಟ್ಯಾಸಿಯಮ್ ಸಮೃದ್ಧವಾಗಿದೆ. ಹಲಸು ಜೀರ್ಣಕ್ರಿಯೆಯನ್ನು ವೇಗಗೊಳಿಸುತ್ತದೆ ಮತ್ತು ನಿರ್ಜಲೀಕರಣವನ್ನು ತಡೆಯುತ್ತದೆ. ಕರುಳಿನ ಕ್ಯಾನ್ಸರ್ ತಡೆಗಟ್ಟಲು ಇದು ಉತ್ತಮ ಹಣ್ಣು.

ಅಮೇರಿಕಾದ ಕೃಷಿ ಇಲಾಖೆಯ ಪ್ರಕಾರ ಒಂದು ಕಪ್ ಕತ್ತರಿಸಿದ ಹಲಸಿನ ಹಣ್ಣು 157 ಕ್ಯಾಲೋರಿಗಳು, 1 ಗ್ರಾಂ (ಗ್ರಾಂ) ಕೊಬ್ಬು, 38 ಗ್ರಾಂ ಕಾರ್ಬೋಹೈಡ್ರೇಟ್ಗಳು, 2.8 ಗ್ರಾಂ ಪ್ರೋಟೀನ್ ಮತ್ತು 2.5 ಗ್ರಾಂ ನಾರಿನಂಶವನ್ನು ನೀಡುತ್ತದೆ. ಇತರ ಹಣ್ಣುಗಳಿಗಿಂತ ಭಿನ್ನವಾಗಿ, ಹಲಸಿನ ಹಣ್ಣು ವಿಟಮಿನ್ ಬಿ 6, ನಿಯಾಸಿನ್, ರಿಬೋಫ್ಲಾವಿನ್ ಮತ್ತು ಫೋಲಿಕ್ ಆಮ್ಲವನ್ನು ಒಳಗೊಂಡಂತೆ ಬಿ ಜೀವಸತ್ವಗಳನ್ನು ಹೊಂದಿರುತ್ತದೆ, ಇದು ಆರೋಗ್ಯಕರ ನರಮಂಡಲಕ್ಕೆ ಮುಖ್ಯವಾಗಿದೆ.

ದೇಹದ ಉರಿಯೂತ ಕಡಿಮೆ ಮಾಡುವುದು, ಆರೋಗ್ಯಕರ ಚರ್ಮ ಮತ್ತು ಹೃದಯ, ತೂಕ ಇಳಿಸುವಿಕೆ ಮುಂತಾದ ಆರೋಗ್ಯ ಪ್ರಯೋಜನಗಳು ಹಲಸಿನ ಹಣ್ಣಿನಿಂದ ದೊರೆಯುತ್ತದೆ.

ಹಲಸಿನ ಹಣ್ಣಿನ ಅತಿ ಸೇವನೆಯಿಂದ ಹೊಟ್ಟೆ ಉಬ್ಬುವುದು, ಅತಿಸಾರ ಮತ್ತು ವಾಕರಿಕೆ ಮುಂತಾದ ಗ್ಯಾಸ್ಟ್ರಿಕ್ ಸಮಸ್ಯೆಗಳು ಉಂಟಾಗಬಹುದು. ಹಾಗಾಗಿ, ಹಲಸಿನ ಹಣ್ಣನ್ನು ತಿನ್ನುವಾಗ ಜಾಗ್ರತೆ ವಹಿಸಬೇಕು. ಇಂತಹ ಪರಿಸ್ಥಿತಿಯಲ್ಲಿ ಆಯುರ್ವೇದವು ಒಣ ಶುಂಠಿಯ ಸಣ್ಣ ತುಂಡುಗಳನ್ನು ತೆಗೆದುಕೊಳ್ಳುವಂತೆ ಸಲಹೆ ನೀಡುತ್ತದೆ. ಮಾಗಿದ ಸಿಹಿಯಾದ ಹಲಸು ಮಧುಮೇಹದಂತಹ ರೋಗಗಳಿಗೆ ವರ್ಜ್ಯವಾಗಿದೆ.

ವಿ.ಸೂ: ಈ ಲೇಖನ ಕೇವಲ ಮಾಹಿತಿಗಾಗಿ ಮಾತ್ರ. ಸೇವನೆಯ ಮೊದಲು ತಜ್ಞರ ಬಳಿ ಸಮಾಲೋಚನೆ ನಡೆಸುವುದು ಒಳಿತು.