ಪ್ರಯಾಗರಾಜ್: ಅಖಿಲ ಭಾರತೀಯ ಅಖಾಡಾ ಪರಿಷತ್ತಿನ ಅಧ್ಯಕ್ಷ ಮಹಂತ್ ನರೇಂದ್ರ ಗಿರಿ ಮಹಾರಾಜ್ ಅವರು ಸಂಶಯಾಸ್ಪದ ರೀತಿಯಲ್ಲಿ ಸಾವನ್ನಪ್ಪಿದ್ದು, ಅವರ ಮೃತದೇಹ ಪ್ರಯಾಗರಾಜ್ ನ ಮಹಾಂತ್ ಬಘಂಬರಿ ಗಡ್ಡಿ ಆಶ್ರಮದಲ್ಲಿ ನೇಣು ಬಿಗಿದ ಸ್ಥಿತಿಯಲ್ಲಿ ಪತ್ತೆಯಾಗಿದೆ.
ನರೇಂದ್ರ ಗಿರಿಯ ಅವರ ಸಾವಿನ ಬಗ್ಗೆ ಹಲವು ಅನುಮಾನಗಳು ಮೂಡಿದ್ದು, ಘಟನಾ ಸ್ಥಳದಲ್ಲಿ ಡೆತ್ ನೋಟ್ ದೊರೆತಿದೆ. ಮೇಲ್ನೋಟಕ್ಕೆ ಆತ್ಮಹತ್ಯೆ ಎಂದು ಗೊತ್ತಾಗಿದ್ದು, ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.
ಡೆತ್ ನೋಟ್ ನಲ್ಲಿ ಹಲವು ವಿಚಾರಗಳನ್ನು ಉಲ್ಲೇಖಿಸಲಾಗಿದೆ. 7-8 ಪುಟಗಳಿರುವ ಡೆತ್ ನೋಟ್ ನಲ್ಲಿ ಆನಂದ್ ಗಿರಿ ಸೇರಿದಂತೆ ಹಲವು ಶಿಷ್ಯರ ಹೆಸರುಗಳನ್ನು ಉಲ್ಲೇಖಿಸಲಾಗಿದೆ. ಆಶ್ರಮಕ್ಕೆ ಸಂಬಂಧಪಟ್ಟಂತೆ ಕೆಲವೊಂದು ವಿಚಾರಗಳಿಂದ ನರೇಂದ್ರ ಗಿರಿ ಮಹಾರಾಜ್ ಅಸಮಾಧನಗೊಂಡಿದ್ದರು ಎನ್ನುವ ವಿಚಾರ ಡೆತ್ ನೋಟ್ ನಿಂದ ಬೆಳಕಿಗೆ ಬಂದಿದೆ.
