ರಾಕಿಂಗ್ ಸ್ಟಾರ್ ಯಶ್, ರಣಬೀರ್ ಕಪೂರ್ ಹಾಗೂ ಸಾಯಿ ಪಲ್ಲವಿ ಅಭಿನಯದ ‘ರಾಮಾಯಣ’ ಸಿನಿಮಾ ಜಾಗತಿಕ ಮಟ್ಟದಲ್ಲಿ ಭಾರಿ ಸದ್ದು ಮಾಡುತ್ತಿದೆ. ನಿತೇಶ್ ತಿವಾರಿ ನಿರ್ದೇಶನದ ಈ ಚಿತ್ರ ಭಾರತೀಯ ಚಿತ್ರರಂಗದ ಗಮನ ಸೆಳೆದಿರುವುದರ ಜತೆಗೆ, ಹಾಲಿವುಡ್ ಸಿನಿಮಾಗಳಿಗೂ ಪೈಪೋಟಿ ನೀಡುತ್ತಿದೆ ಎಂಬ ಸುದ್ದಿ ಹರಿದಾಡುತ್ತಿದೆ.
ಐಎಂಡಿಬಿ (IMDb) ಜಾಗತಿಕ ಟಾಪ್ 10 ಜನಪ್ರಿಯ ಸಿನಿಮಾಗಳ ಪಟ್ಟಿಯಲ್ಲಿ ‘ರಾಮಾಯಣ’ ಮೂರನೇ ಸ್ಥಾನ ಪಡೆದಿದೆ ಎನ್ನಲಾಗಿದೆ. ಖ್ಯಾತ ಹಾಲಿವುಡ್ ನಿರ್ದೇಶಕ ಕ್ರಿಸ್ಟೋಫರ್ ನೋಲನ್ ಅವರ ‘ದಿ ಒಡಿಸ್ಸಿ’ ನಾಲ್ಕನೇ ಸ್ಥಾನದಲ್ಲಿದ್ದು, ಅದಕ್ಕಿಂತ ಮೇಲಿನ ಸ್ಥಾನವನ್ನು ‘ರಾಮಾಯಣ’ ಪಡೆದುಕೊಂಡಿದೆ ಎಂಬುದು ವಿಶೇಷ.
13 ದಿನಗಳಲ್ಲಿ ₹1,483 ಕೋಟಿ ಗಳಿಕೆ
ಬಾಕ್ಸ್ ಆಫೀಸ್ನಲ್ಲೂ ‘ರಾಮಾಯಣ’ ಉತ್ತಮ ಗಳಿಕೆ ದಾಖಲಿಸಿದೆ. ನವೆಂಬರ್ 5ರಂದು ಬಿಡುಗಡೆಯಾದ ಈ ಸಿನಿಮಾ 13 ದಿನಗಳಲ್ಲಿ ಭಾರತದಲ್ಲಿ ₹821.30 ಕೋಟಿ ನಿವ್ವಳ ಕಲೆಕ್ಷನ್ ಮಾಡಿದೆ. ವಿದೇಶಿ ಮಾರುಕಟ್ಟೆಯ ಗಳಿಕೆಯನ್ನೂ ಸೇರಿಸಿ ವಿಶ್ವಾದ್ಯಂತ ಒಟ್ಟು ₹1,483.50 ಕೋಟಿ ಗಳಿಸಿದೆ. ಈ ಮೂಲಕ ₹1,500 ಕೋಟಿ ಗಳಿಕೆಯ ಗಡಿಯನ್ನು ತಲುಪುವ ಸನಿಹದಲ್ಲಿದೆ.
ಈ ಗಳಿಕೆಯೊಂದಿಗೆ ಸಾರ್ವಕಾಲಿಕ ಅತಿ ಹೆಚ್ಚು ಗಳಿಕೆ ಮಾಡಿದ ಭಾರತೀಯ ಸಿನಿಮಾಗಳ ಪಟ್ಟಿಯಲ್ಲಿ ಐದನೇ ಸ್ಥಾನಕ್ಕೇರಿದೆ. ‘ದಂಗಲ್’, ‘ಧುರಂಧರ್ 2’, ‘ಬಾಹುಬಲಿ 2’ ಮತ್ತು ‘ಪುಷ್ಪ 2’ ಸಿನಿಮಾಗಳು ಇದಕ್ಕಿಂತ ಮುಂದಿವೆ.

2028ರ ದೀಪಾವಳಿಗೆ ಎರಡನೇ ಭಾಗ
‘ರಾಮಾಯಣ’ ಎರಡು ಭಾಗಗಳಲ್ಲಿ ಬಿಡುಗಡೆಯಾಗುವ ಯೋಜನೆಯಿದೆ. ಮೊದಲ ಭಾಗದಲ್ಲಿ ಜಟಾಯು ಮತ್ತು ರಾವಣನ ನಡುವಿನ ಕಾಳಗದ ಕಥೆ ಪ್ರಮುಖವಾಗಿದ್ದು, ಎರಡನೇ ಭಾಗದಲ್ಲಿ ಮುಂದಿನ ಕಥೆ ತೆರೆದುಕೊಳ್ಳಲಿದೆ. ಎರಡನೇ ಭಾಗವು 2028ರ ದೀಪಾವಳಿ ಸಂದರ್ಭದಲ್ಲಿ ವಿಶ್ವಾದ್ಯಂತ ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಲಿದೆ ಎಂದು ವರದಿಯಾಗಿದೆ.
ಐಎಂಡಿಬಿ ಜಾಗತಿಕ ಟಾಪ್ 10 ಜನಪ್ರಿಯ ಸಿನಿಮಾಗಳು
- ಯು ಕ್ಯಾನ್ ಸೀ ಎವೆರಿಥಿಂಗ್
- ಎಬೆನೆಜರ್
- ರಾಮಾಯಣ
- ದಿ ಒಡಿಸ್ಸಿ
- ದಿ ಎಂಡ್ ಆಫ್ ಓಕ್ ಸ್ಟ್ರೀಟ್
- ಹಾರ್ಟ್ಲ್ಯಾಂಡ್
- ಹಾರ್ಟ್ ಆಫ್ ದಿ ಬೀಸ್ಟ್
- ವೈಲ್ಡ್ ಹಾರ್ಸ್ ನೈನ್
- ಗಾಡ್ಜಿಲ್ಲಾ ಮೈನಸ್ ಝೀರೋ
- ರೆಸಿಡೆಂಟ್ ಈವಿಲ್















