ವಿಶ್ವ ಚೆಸ್ ಚಾಂಪಿಯನ್ ಮ್ಯಾಗ್ನಸ್ ಕಾರ್ಲ್‌ಸೆನ್‌ ಅನ್ನು ಮೂರನೆ ಬಾರಿ ಸೋಲಿಸಿದ 17 ವರ್ಷದ ಆರ್ ಪ್ರಗ್ನಾನಂದ

ಸೋಮವಾರ ಬೆಳಗ್ಗೆ ಮಿಯಾಮಿಯಲ್ಲಿ ನಡೆದ ಅಂತಾರಾಷ್ಟ್ರೀಯ ಚೆಸ್ ಚಾಂಪಿಯನ್‌ಶಿಪ್‌ನ ಎಫ್‌ಟಿಎಕ್ಸ್ ಕ್ರಿಪ್ಟೋ ಕಪ್‌ನ ಕೊನೆಯ ಸುತ್ತಿನಲ್ಲಿ ಭಾರತೀಯ ಚೆಸ್ ಮಾಸ್ಟರ್ ಆರ್ ಪ್ರಗ್ನಾನಂದ ವಿಶ್ವ ಚಾಂಪಿಯನ್ ಮ್ಯಾಗ್ನಸ್ ಕಾರ್ಲ್‌ಸೆನ್ ಅವರನ್ನು ಸೋಲಿಸಿದ್ದಾನೆ. ಆದರೆ ಈ ಗೆಲುವಿನ ಹೊರತಾಗಿಯೂ, 17 ವರ್ಷದ ಚೆಸ್ ಆಟಗಾರ ಚಾಂಪಿಯನ್‌ಶಿಪ್‌ನಲ್ಲಿ ಎರಡನೇ ಸ್ಥಾನವನ್ನು ಗಳಿಸಿದ್ದಾನೆ ಏಕೆಂದರೆ, ಹಿಂದಿನ ಆಟಗಳ ಆಧಾರದಲ್ಲಿ ಕಾರ್ಲ್‌ಸೆನ್ ಹೆಚ್ಚಿನ ಸ್ಕೋರ್ ಹೊಂದಿದ್ದರು.

ನಿಯಮಿತ ಆಟದ ಕೊನೆಯಲ್ಲಿ ಸ್ಕೋರ್ 2-2 ರಲ್ಲಿ ಸಮವಾದ ನಂತರ ಪ್ರಗ್ನಾನಂದ ಕಾರ್ಲ್‌ಸೆನ್‌ ನನ್ನು ಬ್ಲಿಟ್ಜ್ ಟೈ ಬ್ರೇಕ್‌ನಲ್ಲಿ ಸೋಲಿಸಿದನು. ಈ ವರ್ಷದ ಫೆಬ್ರವರಿಯಲ್ಲಿ ಆನ್‌ಲೈನ್ ಚೆಸ್ ಪಂದ್ಯದಲ್ಲಿ ವಿಶ್ವ ಚಾಂಪಿಯನ್ ಕಾರ್ಲ್‌ಸೆನ್ ಅವರನ್ನು ಸೋಲಿಸಿದ ನಂತರ ಪ್ರಗ್ನಾನಂದ ಮುನ್ನಲೆಗೆ ಬಂದಿದ್ದನು. ಕೇವಲ 16 ವರ್ಷದವನಿದ್ದಾಗ ಏರ್‌ಥಿಂಗ್ಸ್ ಮಾಸ್ಟರ್ಸ್ ಕ್ಷಿಪ್ರ ಚೆಸ್ ಸ್ಪರ್ಧೆಯಲ್ಲಿ, ಕಾರ್ಲ್‌ಸನ್ ಪ್ರಗ್ನಾನಂದಾ ವಿರುದ್ಧ ಸೋತಿದ್ದರು. ಇದಲ್ಲದೆ, ಈ ವರ್ಷದ ಮೇನಲ್ಲಿ, ಚೆಸ್ಸಬಲ್ ಮಾಸ್ಟರ್ಸ್ ಆನ್‌ಲೈನ್ ರಾಪಿಡ್ ಚೆಸ್ ಪಂದ್ಯಾವಳಿಯಲ್ಲಿಯೂ ಪ್ರಗ್ನಾನಂದ ಕಾರ್ಲ್‌ಸೆನ್ ಅವರನ್ನು ಸೋಲಿಸಿದ್ದನು. ಇದೀಗ ಎಫ್‌ಟಿಎಕ್ಸ್ ಕ್ರಿಪ್ಟೋ ಕಪ್‌ ನ ಕೊನೆಯ ಸುತ್ತಿನಲ್ಲೂ ವಿಶ್ವ ಚಾಂಪಿಯನ್ ಅನ್ನು ಸೋಲಿಸುವ ಮೂಲಕ ತಾನು ಯಾರಿಗೂ ಕಮ್ಮಿ ಇಲ್ಲ ಎಂದು ಈ ಪೋರ ಜಗತ್ತಿಗೆ ತೋರಿಸಿದ್ದಾನೆ.

ಎಫ್‌ಟಿಎಕ್ಸ್ ಕ್ರಿಪ್ಟೋ ಕಪ್ ಚೆಸ್‌ ಇದು ವಾರ್ಷಿಕ ಸರ್ಕ್ಯೂಟ್‌ನ ಮೆಲ್ಟ್‌ವಾಟರ್ ಚಾಂಪಿಯನ್ಸ್ ಚೆಸ್ ಟೂರ್‌ನ 2022 ರ ಋತುವಿಗಾಗಿ ಮಿಯಾಮಿಯಲ್ಲಿ ನಡೆಯುತ್ತಿರುವ ಲೈವ್ ಚೆಸ್ ಚಾಂಪಿಯನ್‌ಶಿಪ್ ಈವೆಂಟ್ ಆಗಿದೆ. ಈವೆಂಟ್ ಅನ್ನು ಎಫ್‌ಟಿಎಕ್ಸ್ ಕ್ರಿಪ್ಟೋ ಎಕ್ಸ್ ಚೇಂಜ್ ವತಿಯಿಂದ ಆಯೋಜಿಸಲಾಗಿದೆ. ಈವೆಂಟ್‌ನಲ್ಲಿ ಪ್ರತಿ ಪಂದ್ಯದ ಗೆಲುವು $7,500 ಬಹುಮಾನವನ್ನು ಹೊಂದಿರುತ್ತದೆ. ಪ್ರತಿ ಪಂದ್ಯವನ್ನು ನಾಲ್ಕು ಕ್ಷಿಪ್ರ ಆಟಗಳಲ್ಲಿ, 2-2 ಡ್ರಾದ ಸಂದರ್ಭದಲ್ಲಿ ಬ್ಲಿಟ್ಜ್ ಟೈ-ಬ್ರೇಕ್ಗಳೊಂದಿಗೆ ಆಡಲಾಗುತ್ತದೆ.