ದಸರಾ-ದೀಪಾವಳಿ ಹಬ್ಬದ ಸೀಸನ್‌ ಆರಂಭಕ್ಕೂ ಮುನ್ನವೇ ಗ್ರಾಹಕರಿಗೆ ಬೆಲೆ ಏರಿಕೆಯ ಬಿಸಿ ತಟ್ಟುವ ಸಾಧ್ಯತೆಯಿದೆ. ಅಕ್ಟೋಬರ್‌ 1ರಿಂದ AC, LED TV, ವಾಷಿಂಗ್‌ ಮಷಿನ್‌, ಫ್ರಿಜ್‌ ಸೇರಿದಂತೆ ಹಲವು ಗೃಹೋಪಯೋಗಿ ಹಾಗೂ ಎಲೆಕ್ಟ್ರಾನಿಕ್ಸ್‌ ಉತ್ಪನ್ನಗಳ ಬೆಲೆ ಶೇ.5ರಿಂದ 8ರವರೆಗೆ ಏರಿಕೆಯಾಗುವ ಸಾಧ್ಯತೆ ಇದೆ ಎಂದು ಉದ್ಯಮ ವಲಯದ ಮೂಲಗಳು ತಿಳಿಸಿವೆ.

ತಾಮ್ರ, ಅಲ್ಯೂಮಿನಿಯಂ, ಉಕ್ಕು ಸೇರಿದಂತೆ ಪ್ರಮುಖ ಕಚ್ಚಾ ವಸ್ತುಗಳ ಬೆಲೆ ಏರಿಕೆ, ಸಾಗಣೆ ವೆಚ್ಚ ಹೆಚ್ಚಳ ಹಾಗೂ ಕರೆನ್ಸಿ ವಿನಿಮಯ ದರದಲ್ಲಿನ ಏರಿಳಿತ ದರ ಹೆಚ್ಚಳಕ್ಕೆ ಪ್ರಮುಖ ಕಾರಣಗಳಾಗಿವೆ. 2026ರಲ್ಲಿ ಎಲೆಕ್ಟ್ರಾನಿಕ್ಸ್‌ ಮತ್ತು ಅಪ್ಲಯನ್ಸ್‌ ಉದ್ಯಮದಲ್ಲಿ ನಡೆಯುತ್ತಿರುವ ಮೂರನೇ ಸುತ್ತಿನ ಬೆಲೆ ಏರಿಕೆ ಇದಾಗಿದೆ ಎಂದು ವರದಿಯಾಗಿದೆ.

ಯಾವ ಉತ್ಪನ್ನದ ಬೆಲೆ ಎಷ್ಟು ಏರಿಕೆ?

ACಗಳ ಬೆಲೆ ಶೇ.5ರಿಂದ 8ರವರೆಗೆ ಹೆಚ್ಚಾಗುವ ನಿರೀಕ್ಷೆಯಿದೆ. ವಾಷಿಂಗ್‌ ಮಷಿನ್‌, ಫ್ರಿಜ್‌ ಮತ್ತು LED TVಗಳ ಬೆಲೆಯಲ್ಲಿ ಶೇ.3ರಿಂದ 4ರವರೆಗೆ ಹೆಚ್ಚಳವಾಗುವ ಸಾಧ್ಯತೆಯಿದೆ.

Blue Star, Godrej, Haier, Daikin ಹಾಗೂ Super Plastronics ಸೇರಿದಂತೆ ಹಲವು ಕಂಪನಿಗಳು ವಿವಿಧ ಉತ್ಪನ್ನಗಳ ಬೆಲೆ ಹೆಚ್ಚಳವನ್ನು ಈಗಾಗಲೇ ಘೋಷಿಸಿವೆ ಅಥವಾ ಖಚಿತಪಡಿಸಿವೆ. Panasonic ಬೆಲೆ ಏರಿಕೆ ಕುರಿತು ಇನ್ನೂ ಪರಿಶೀಲನೆ ನಡೆಸುತ್ತಿದೆ ಎಂದು ವರದಿಯಾಗಿದೆ.

ಕಚ್ಚಾ ವಸ್ತುಗಳ ಬೆಲೆ ಏರಿಕೆ

Blue Star ವ್ಯವಸ್ಥಾಪಕ ನಿರ್ದೇಶಕ ಬಿ. ತ್ಯಾಗರಾಜನ್‌ ಅವರ ಪ್ರಕಾರ, ಕಚ್ಚಾ ವಸ್ತುಗಳ ಬೆಲೆ ಏರಿಕೆಯಿಂದ AC ಮತ್ತು ಡೀಪ್‌ ಫ್ರೀಜರ್‌ಗಳ ಬೆಲೆ ಈಗಾಗಲೇ ಶೇ.5ರಿಂದ 8ರವರೆಗೆ ಹೆಚ್ಚಾಗಿದೆ. ಈ ವರ್ಷ ಕಂಪನಿ ಕೈಗೊಂಡಿರುವ ಮೂರನೇ ಬೆಲೆ ಏರಿಕೆ ಇದಾಗಿದೆ.

ಕಳೆದ ವರ್ಷದ ಹಬ್ಬದ ಸೀಸನ್‌ಗೆ ಹೋಲಿಸಿದರೆ ಉತ್ಪಾದನಾ ವೆಚ್ಚ ಸುಮಾರು ಶೇ.15ರಷ್ಟು ಹೆಚ್ಚಾಗಿದೆ. ಆದರೆ GST ಪ್ರಯೋಜನದಿಂದ ಗ್ರಾಹಕರ ಮೇಲಿನ ಒಟ್ಟಾರೆ ಪರಿಣಾಮ ಸುಮಾರು ಶೇ.5ರಷ್ಟು ಇರಬಹುದು ಎಂದು ಅವರು ಹೇಳಿದ್ದಾರೆ.

Godrej Enterprises Groupನ ಅಪ್ಲಯನ್ಸಸ್ ವಿಭಾಗದ ಮುಖ್ಯಸ್ಥ ಕಮಲ್‌ ನಂದಿ, ಸರಕುಗಳ ಬೆಲೆ ಹಿಂದಿನ ಪರಿಷ್ಕರಣೆಯ ಬಳಿಕ ಶೇ.8ರಿಂದ 10ರವರೆಗೆ ಹೆಚ್ಚಾಗಿರುವ ಹಿನ್ನೆಲೆಯಲ್ಲಿ ಮತ್ತೊಂದು ಸುತ್ತಿನ ಬೆಲೆ ಏರಿಕೆ ಅನಿವಾರ್ಯವಾಗಬಹುದು ಎಂದು ತಿಳಿಸಿದ್ದಾರೆ.

ದೀಪಾವಳಿವರೆಗೂ ಹಳೆಯ ದರದ ಸ್ಟಾಕ್?

ಬೆಲೆ ಏರಿಕೆಯ ನಡುವೆಯೂ ದೀಪಾವಳಿವರೆಗೆ ಕೆಲವು ಉತ್ಪನ್ನಗಳು ಹಳೆಯ ದರದಲ್ಲೇ ಗ್ರಾಹಕರಿಗೆ ಲಭ್ಯವಾಗುವ ಸಾಧ್ಯತೆಯಿದೆ. ಬೆಲೆ ಏರಿಕೆಗೆ ಮುನ್ನವೇ ಡೀಲರ್‌ಗಳು ಮತ್ತು ವಿತರಕರು ಹೆಚ್ಚಿನ ಪ್ರಮಾಣದಲ್ಲಿ ಉತ್ಪನ್ನಗಳನ್ನು ಖರೀದಿಸಿ ಸಂಗ್ರಹಿಸಿಕೊಂಡಿರುವುದು ಇದಕ್ಕೆ ಕಾರಣ.

ಈ ಹಳೆಯ ದರದ ಸ್ಟಾಕ್‌ ಸುಮಾರು ಒಂದು ತಿಂಗಳಿಂದ ಒಂದೂವರೆ ತಿಂಗಳವರೆಗೆ ಸಾಕಾಗಬಹುದು. ಹೀಗಾಗಿ ದೀಪಾವಳಿಯವರೆಗೂ ಹಳೆಯ ದರದ ಉತ್ಪನ್ನಗಳು ಮಾರುಕಟ್ಟೆಯಲ್ಲಿ ಲಭ್ಯವಾಗುವ ಸಾಧ್ಯತೆಯಿದ್ದು, ನಂತರ ಹೊಸ ದರಗಳು ಸಂಪೂರ್ಣವಾಗಿ ಜಾರಿಗೆ ಬರುವ ನಿರೀಕ್ಷೆಯಿದೆ.

ಜನವರಿವರೆಗೆ ಮತ್ತಷ್ಟು ಬೆಲೆ ಏರಿಕೆ ಸಾಧ್ಯತೆ

Haier India ಅಧ್ಯಕ್ಷ ಎನ್‌.ಎಸ್‌. ಸತೀಶ್‌ ಅವರ ಪ್ರಕಾರ, ಅಕ್ಟೋಬರ್‌ 1ರಿಂದ ACಗಳ ಬೆಲೆಯನ್ನು ಸುಮಾರು ಶೇ.5ರಷ್ಟು ಹೆಚ್ಚಿಸಲು ಕಂಪನಿ ನಿರ್ಧರಿಸಿದೆ. LED TV ಮತ್ತು ವಾಷಿಂಗ್‌ ಮಷಿನ್‌ಗಳ ಬೆಲೆಯಲ್ಲೂ ಶೇ.2ರಿಂದ 3ರವರೆಗೆ ಏರಿಕೆಯಾಗಬಹುದು.

ಇನ್‌ಪುಟ್‌ ವೆಚ್ಚಗಳು ಇದೇ ರೀತಿಯಲ್ಲಿ ಮುಂದುವರಿದರೆ ದೀಪಾವಳಿ ನಂತರ ಹಾಗೂ ಜನವರಿಯಲ್ಲೂ ಮತ್ತಷ್ಟು ಬೆಲೆ ಏರಿಕೆ ಮಾಡುವ ಸಾಧ್ಯತೆಯಿದೆ. ಅಕ್ಟೋಬರ್‌ನಿಂದ ಜನವರಿವರೆಗೆ ಒಟ್ಟು ಸುಮಾರು ಶೇ.15ರಷ್ಟು ಹೆಚ್ಚಳವಾಗುವ ಸಾಧ್ಯತೆಯಿದೆ ಎಂದು ಅವರು ಹೇಳಿದ್ದಾರೆ.

AC ತಯಾರಿಕೆಯಲ್ಲಿ ಪ್ರಮುಖ ಕಚ್ಚಾ ವಸ್ತುವಾಗಿರುವ ತಾಮ್ರದ ಬೆಲೆ ಕೂಡ ಗಣನೀಯವಾಗಿ ಏರಿಕೆಯಾಗಿದೆ. ಕಳೆದ ವರ್ಷ ಪ್ರತಿ ಮೆಟ್ರಿಕ್‌ ಟನ್‌ಗೆ 8,000-9,000 ಡಾಲರ್‌ ಇದ್ದ ತಾಮ್ರದ ಬೆಲೆ ಈಗ ಸುಮಾರು 14,500 ಡಾಲರ್‌ಗೆ ತಲುಪಿದೆ. ಒಂದು AC ತಯಾರಿಸಲು ಸುಮಾರು 3ರಿಂದ 4 ಕೆಜಿ ತಾಮ್ರ ಅಗತ್ಯವಿದೆ ಎಂದು ಅವರು ತಿಳಿಸಿದ್ದಾರೆ.

ದೀಪಾವಳಿ ಖರೀದಿಗೆ ಹೊಡೆತ?

ಓಣಂನಿಂದ ದಸರಾ ಹಾಗೂ ದೀಪಾವಳಿವರೆಗೆ ಇರುವ ಹಬ್ಬದ ಅವಧಿ ಅಪ್ಲಯನ್ಸ್‌ ತಯಾರಕರ ವಾರ್ಷಿಕ ಮಾರಾಟದಲ್ಲಿ ಸುಮಾರು 30ರಿಂದ 40 ಪ್ರತಿಶತ ಪಾಲು ಹೊಂದಿದೆ. ಈ ಅವಧಿಯಲ್ಲೇ ಬೆಲೆ ಏರಿಕೆಯಾಗುತ್ತಿರುವುದು ಗ್ರಾಹಕರ ಖರೀದಿ ವೆಚ್ಚದ ಮೇಲೆ ಪರಿಣಾಮ ಬೀರುವ ಸಾಧ್ಯತೆಯಿದೆ.

Daikin India ಸೆಪ್ಟೆಂಬರ್‌ 16ರಿಂದಲೇ ಉತ್ಪನ್ನಗಳ ಬೆಲೆಯನ್ನು ಶೇ.8ರಿಂದ 10ರವರೆಗೆ ಹೆಚ್ಚಿಸಿದೆ ಎಂದು ವರದಿಯಾಗಿದೆ. ತಾಮ್ರದ ಬೆಲೆ ಏರಿಕೆ, ಡಾಲರ್‌ ಬಲಗೊಳ್ಳುತ್ತಿರುವುದು ಹಾಗೂ ಇತರ ಸರಕುಗಳ ಬೆಲೆ ಹೆಚ್ಚಳದಿಂದ ಉತ್ಪಾದನಾ ವೆಚ್ಚದ ಒತ್ತಡ ಹೆಚ್ಚಾಗಿದೆ ಎಂದು ಕಂಪನಿ ತಿಳಿಸಿದೆ.

ಇನ್ನು Thomson, Kodak ಮತ್ತು Blaupunkt ಬ್ರ್ಯಾಂಡ್‌ಗಳ TVಗಳನ್ನು ಮಾರಾಟ ಮಾಡುವ Super Plastronics, ಅಕ್ಟೋಬರ್‌ ನಂತರ TV ಬೆಲೆಗಳನ್ನು ಸುಮಾರು ಶೇ.7ರಷ್ಟು ಹೆಚ್ಚಿಸಲು ಮುಂದಾಗಿದೆ. ಇತರ ಅಪ್ಲಯನ್ಸ್‌ಗಳ ಬೆಲೆ ಈಗಾಗಲೇ ಶೇ.4ರಿಂದ 5ರವರೆಗೆ ಏರಿಕೆಯಾಗಿದೆ.

ಸಾಗಣೆ ವೆಚ್ಚ ಹಾಗೂ ಪೂರೈಕೆ ಸರಪಳಿ ಸಮಸ್ಯೆಗಳು ಮುಂದುವರಿದರೆ ದೀಪಾವಳಿ ನಂತರ TVಗಳ ಬೆಲೆಯಲ್ಲಿ ಮತ್ತಷ್ಟು ಏರಿಕೆಯಾಗಬಹುದು ಎಂದು ಉದ್ಯಮ ವಲಯದವರು ಹೇಳಿದ್ದಾರೆ. ಸಣ್ಣ ಗಾತ್ರದ TVಗಳ ಬೆಲೆ ಶೇ.20ರವರೆಗೆ ಹಾಗೂ ದೊಡ್ಡ ಗಾತ್ರದ TVಗಳ ಬೆಲೆ ಶೇ.10ರವರೆಗೆ ಹೆಚ್ಚಾಗುವ ಸಾಧ್ಯತೆಯಿದೆ ಎಂದು Videotex ನಿರ್ದೇಶಕ ಅರ್ಜುನ್‌ ಬಜಾಜ್‌ ತಿಳಿಸಿದ್ದಾರೆ.