ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿ ಅವರು ತಮ್ಮ ಜನ್ಮದಿನವಾದ ಸೆ.17 ರಂದು ‘ಚೀತಾ ಮರು ಪರಿಚಯ’ ಯೋಜನೆಗೆ ಚಾಲನೆ ನೀಡಲಿದ್ದಾರೆ. ಒಡಿಶಾ ರಾಜಧಾನಿ ಭುವನೇಶ್ವರದಲ್ಲಿ ನಡೆಯುತ್ತಿರುವ ಮೃಗಾಲಯ ನಿರ್ದೇಶಕರ ರಾಷ್ಟ್ರೀಯ ಸಮ್ಮೇಳನದ ಉದ್ಘಾಟನಾ ಸಮಾರಂಭದಲ್ಲಿ ಈ ವಿಷಯವನ್ನು ಬಹಿರಂಗಪಡಿಸಲಾಗಿದೆ. ಈ ಉದ್ದೇಶಕ್ಕಾಗಿ ನಮೀಬಿಯಾದಿಂದ ಚಿರತೆಯನ್ನು ತರಲಾಗುವುದು ಎಂದು ಕೇಂದ್ರ ಪರಿಸರ, ಅರಣ್ಯ ಮತ್ತು ಹವಾಮಾನ ಬದಲಾವಣೆ ಸಚಿವ ಭೂಪೇಂದರ್ ಯಾದವ್ ಹೇಳಿದ್ದಾರೆ.

1950 ರ ದಶಕದಲ್ಲಿ ಭಾರತದಿಂದ ಕಣ್ಮರೆಯಾದ ನಂತರ ಚಿರತೆಯನ್ನು ಮರು-ಪರಿಚಯಿಸುತ್ತಿರುವುದು ಇದೇ ಮೊದಲು ಎಂದು ಎ.ಐ.ಆರ್ ವರದಿಗಾರರು ವರದಿ ಮಾಡಿದ್ದಾರೆ. ಈ ಸಂದರ್ಭದಲ್ಲಿ ಯುವ ಪೀಳಿಗೆಯನ್ನು ಕಾಡು ಪ್ರಾಣಿಗಳ ಪ್ರಪಂಚದೊಂದಿಗೆ ಸಂಪರ್ಕಿಸುವ ಅಗತ್ಯದ ಬಗ್ಗೆ ಸಚಿವರು ಒತ್ತಿ ಹೇಳಿದರು.

ಮೃಗಾಲಯವನ್ನು ಕಾಡು ಪ್ರಾಣಿಗಳ ಬಗ್ಗೆ ಜನರಿಗೆ ಶಿಕ್ಷಣ ನೀಡುವ ಸ್ಥಳವನ್ನಾಗಿ ಮಾಡಲು ಮೃಗಾಲಯದ ಅಧಿಕಾರಿಗಳಿಗೆ ಕರೆ ನೀಡಿದ ಸಚಿವರು, ಮೃಗಾಲಯಗಳು ಜನರಿಗೆ-ವಿಶೇಷವಾಗಿ ನಮ್ಮ ಸಮಾಜದ ಕಡಿಮೆ ಮತ್ತು ಮಧ್ಯಮ-ಆದಾಯದ ಸ್ತರಗಳ ಜನರ ಸಂತೋಷವನ್ನು ಹೆಚ್ಚಿಸುವಲ್ಲಿ ಕಾರ್ಯನಿರ್ವಹಿಸುತ್ತವೆ. ಮೃಗಾಲಯಗಳು ಒತ್ತಡವನ್ನು ನಿವಾರಿಸುವ ಸ್ಥಳಗಳಾಗಿವೆ ಮತ್ತು ಇದನ್ನು ಗುರುತಿಸುವ ಅಗತ್ಯವಿದೆ ಎಂದು ಅವರು ಹೇಳಿದರು.

ಚೀತಾ ಮರು ಪರಿಚಯ ಯೋಜನೆ

1952ರಲ್ಲಿ ಏಷ್ಯಾ ತಳಿಯ ಚೀತಾಗಳು ಭಾರತದಿಂದ ಕಣ್ಮರೆಯಾಗಿವೆ ಎಂದು ಅಧಿಕೃತವಾಗಿ ಘೋಷಣೆ ಮಾಡಲಾಗಿತ್ತು. ಇದೇ ಮೊದಲ ಬಾರಿಗೆ ಭಾರತದ ತಜ್ಞರ ತಂಡವು ನಮೀಬಿಯಾಕ್ಕೆ ತೆರಳಿ ಚೀತಾಗಳ ಬಗ್ಗೆ ಮತ್ತು ಅವುಗಳ ಆವಾಸ ಸ್ಥಾನಗಳ ಬಗ್ಗೆ ಸಂಶೋಧನೆ ನಡೆಸಿವೆ. ಡೌನ್ ಟು ಅರ್ಥ್ ವರದಿಗಳ ಪ್ರಕಾರ, ಚಿರತೆಗಳನ್ನು ಮಧ್ಯಪ್ರದೇಶದ ಶಿಯೋಪುರ್ ಮತ್ತು ಮೊರೆನಾ ಜಿಲ್ಲೆಗಳ ಕುನೋ-ಪಾಲ್ಪುರ್ ರಾಷ್ಟ್ರೀಯ ಉದ್ಯಾನವನಕ್ಕೆ ತರಲಾಗುವುದು. ತಮ್ಮ ಸುತ್ತಮುತ್ತಲಿನ ಪ್ರದೇಶಗಳಿಗೆ ಒಗ್ಗಿಕೊಳ್ಳಲು ಅವುಗಳನ್ನು ತಾತ್ಕಾಲಿಕವಾಗಿ ಈ ಆವರಣದಲ್ಲಿ ಇರಿಸಲಾಗುತ್ತದೆ.

ಇದಕ್ಕೂ ಮುಂಚೆ ಇರಾನ್ ನಿಂದ ಏಷ್ಯಾದ ಚೀತಾಗಳನ್ನು ಕರೆತರುವ ಪ್ರಯತ್ನ ಮಾಡಲಾಗಿದ್ದು, ಜಗತ್ತಿನಲ್ಲಿ ಕೇವಲ 12 ಏಷ್ಯಾದ ಚೀತಾಗಳು ಮಾತ್ರ ಇವೆ ಎನ್ನುವ ಕಾರಣಕ್ಕಾಗಿ ಇರಾನ್ ಸರಕಾರ ಚೀತಾಗಳನ್ನು ನೀಡಲು ನಿರಾಕರಿಸಿತ್ತು. ತದನಂತನ ಭಾರತ ಸರಕಾರವು ದ.ಆಫ್ರಿಕಾ ಮತ್ತು ನಮೀಬಿಯಾ ಜೊತೆ ಚೀತಾ ಮರು ಪರಿಚಯ ಯೋಜನೆಗೆ ಸಹಕಾರ ಕೋರಿದ್ದು ಅಲ್ಲಿನ ಸರಕಾರದಿಂದ ಸಕಾರಾತ್ಮಕ ಉತ್ತರ ದೊರೆತ ಬಳಿಕ ಮತ್ತು 2020 ರಲ್ಲಿ ಸುಪ್ರೀಂ ಕೋರ್ಟ್ ಚಿರತೆಗಳನ್ನು ಆಫ್ರಿಕಾದಿಂದ ಭಾರತಕ್ಕೆ ಸ್ಥಳಾಂತರಿಸಲು ಒಪ್ಪಿಕೊಂಡ ಬಳಿಕ ಚೀತಾ ಮರು ಪರಿಚಯ ಯೋಜನೆಗೆ ಚಾಲನೆ ನೀಡಲಾಗಿದೆ.