ಚೆನ್ನೈ (ತಮಿಳುನಾಡು): ಕನ್ನಡ, ತೆಲುಗು ಹಾಗೂ ತಮಿಳು ಸೇರಿದಂತೆ ವಿವಿಧ ಭಾಷೆಗಳ ಸಿನಿಮಾಗಳಲ್ಲಿ ಅಭಿನಯಿಸಿರುವ ಜಯಪ್ರದಾ, ಸಂಸತ್ ಸದಸ್ಯರಾಗಿದ್ದರು. ಚೆನ್ನೈನಲ್ಲಿ ರಾಮಕುಮಾರ್, ರಾಜ್​ಬಾಬು ಎಂಬವರೊಂದಿಗೆ ಸೇರಿ ಚಿತ್ರಮಂದಿರವನ್ನು ನಡೆಸುತ್ತಿರುವ ಇವರು, ಕಾರ್ಮಿಕರಿಂದ ಸಂಗ್ರಹಿಸಿದ ಇಎಸ್​ಐ ಹಣವನ್ನು ರಾಜ್ಯ ವಿಮಾ ನಿಗಮಕ್ಕೆ ಪಾವತಿಸದ ಆರೋಪ ಎದುರಿಸುತ್ತಿದ್ದಾರೆ.ಖ್ಯಾತ ನಟಿ ಜಯಪ್ರದಾ ಅವರಿಗೆ ಕೆಳ ಹಂತದ ನ್ಯಾಯಾಲಯ ವಿಧಿಸಿದ್ದ 6 ತಿಂಗಳ ಜೈಲು ಶಿಕ್ಷೆಯನ್ನು ಮದ್ರಾಸ್​ ಹೈಕೋರ್ಟ್ ಇಂದು (ಶುಕ್ರವಾರ)​ ಖಚಿತಪಡಿಸಿತು.15 ದಿನದಲ್ಲಿ ಎಗ್ಮೋರ್ ಕೋರ್ಟ್‌ಗೆ ಶರಣಾಗುವಂತೆ ಹಾಗೂ 20 ಲಕ್ಷ ರೂ. ಠೇವಣಿ ಇಡುವಂತೆ ಸೂಚಿಸಿದೆ.ಇಎಸ್​ಐ ಪ್ರಕರಣದಲ್ಲಿ ನಟಿ ಜಯಪ್ರದಾ ಅವರಿಗೆ 6 ತಿಂಗಳ ಜೈಲು ಶಿಕ್ಷೆಯನ್ನು ಮದ್ರಾಸ್​ ಹೈಕೋರ್ಟ್​ ಖಚಿತಪಡಿಸಿದೆ.

ಜಯಪ್ರದಾ ಪರ ವಾದ ಮಂಡಿಸಿದ ವಕೀಲರು, ”ಕಾರ್ಮಿಕರಿಗೇಕೆ ಹಣ ಪಾವತಿಯಾಗಿಲ್ಲ ಎಂಬ ಕುರಿತು ಇಎಸ್‌ಐ ಯಾವುದೇ ವಿವರಣೆ ಸ್ವೀಕರಿಸಿಲ್ಲ. ಯಾವುದೇ ನೊಟೀಸ್ ಕಳುಹಿಸದೇ ನೇರವಾಗಿ ಇಎಸ್​ಐ ಪರವಾಗಿ ಪ್ರಕರಣ ದಾಖಲಿಸಲಾಗಿದೆ” ಎಂದು ಹೇಳಿದರು. ಆದರೆ, ಇಂದಿನ ವಿಚಾರಣೆ ವೇಳೆ, ಕಾರ್ಮಿಕರ ಇಎಸ್‌ಐ ಹಣ ಪಾವತಿಸುವ ಬಗ್ಗೆ ಜಯಪ್ರದಾ ಕಡೆ ವಕೀಲರು, ಯಾವುದೇ ವರದಿ ಸಲ್ಲಿಸದ ಕಾರಣ ನ್ಯಾಯಾಲಯವು ಅರ್ಜಿ ವಜಾಗೊಳಿಸಿತು. ಇದೇ ವೇಳೆ, ತನ್ನ ಶಿಕ್ಷೆಯನ್ನು ಪ್ರಶ್ನಿಸಿ ಪ್ರಧಾನ ಸತ್ರ ನ್ಯಾಯಾಲಯಕ್ಕೆ ಹೋಗುವಂತೆ ಜಯಪ್ರದಾ ಅವರಿಗೆ ಉಚ್ಛ ನ್ಯಾಯಾಲಯವು ನಿರ್ದೇಶನ ನೀಡಿ, 15 ದಿನದಲ್ಲಿ ಎಗ್ಮೋರ್ ಕೋರ್ಟ್‌ಗೆ ಶರಣಾಗಿ 20 ಲಕ್ಷ ರೂ. ಠೇವಣಿ ಇಡುವಂತೆ ಆದೇಶಿಸಿತು.ಇಎಸ್​ಐ ಕಂಪನಿ ಕಡೆಯಿಂದ ಇಗ್ಮೋರ್​ ಕೋರ್ಟ್​ನಲ್ಲಿ ಐದು ಪ್ರಕರಣಗಳು ದಾಖಲಾಗಿವೆ. ಆಗಸ್ಟ್​ 10ರಂದು ಜಯಪ್ರದಾ ಸೇರಿದಂತೆ ಮೂವರಿಗೆ ಜಾಮೀನುರಹಿತ 6 ತಿಂಗಳ ಜೈಲು ಶಿಕ್ಷೆ ಹಾಗೂ 5 ಸಾವಿರ ರೂ. ದಂಡವನ್ನು ಕೋರ್ಟ್​ ವಿಧಿಸಿತ್ತು. ಈ ಆದೇಶ ಪ್ರಶ್ನಿಸಿ ಜಯಪ್ರದಾ ಹೈಕೋರ್ಟ್​ನಲ್ಲಿ ಅರ್ಜಿ ಸಲ್ಲಿಸಿದ್ದರು. ಈ ಹಿಂದೆ ಕಾರ್ಮಿಕರ ಇಎಸ್‌ಐ ಹಣವನ್ನು ಹಿಂದಿರುಗಿಸಿದರೆ ಶಿಕ್ಷೆ ರದ್ದುಪಡಿಸುವುದಾಗಿ ಹೈಕೋರ್ಟ್​ ಹೇಳಿತ್ತು.

ಇಎಸ್​ಐ ಹಣ ಪಾವತಿಯಾಗದ ಕಾರಣ ಕಾರ್ಮಿಕರಿಗೆ ತೊಂದರೆಯಾಗಿದೆ. ಈ ಸಂಬಂಧ ಹಲವು ಬಾರಿ ನೊಟೀಸ್‌ಗಳನ್ನು ಕಳುಹಿಸಿದ್ದರೂ ಯಾವುದೇ ಸ್ಪಂದನೆ ಸಿಕ್ಕಿಲ್ಲ ಎಂದು ಇಎಸ್​ಐ ಕಂಪನಿಯವರು ಹೇಳಿದ್ದರು. ಹೀಗಾಗಿ ಕೊನೆಗೆ ಎಗ್ಮೋರ್​ ನ್ಯಾಯಾಲಯದಲ್ಲಿ ದಾವೆ ಹೂಡಲಾಗಿದೆ ಎಂದು ಈ ಹಿಂದೆ ವಿಚಾರಣೆಯಲ್ಲಿ ಇಎಸ್​ಐ ಪರ ವಕೀಲರು ತಿಳಿಸಿದ್ದರು. ಆಗ ವಾದ ಹಾಗೂ ಪ್ರತಿವಾದ ಆಲಿಸಿದ್ದ ಕಳೆ ಹಂತದ ನ್ಯಾಯಾಲಯವು ಜಯಪ್ರದಾ, ರಾಮಕುಮಾರ್, ರಾಜ್​ಬಾಬು ಅವರಿಗೆ ಶಿಕ್ಷೆಯನ್ನು ವಿಧಿಸಿ ಆದೇಶಿಸಿತ್ತು.
ಪ್ರಕರಣದ ಹಿನ್ನೆಲೆ ಹೀಗಿದೆ..: ಚೆನ್ನೈನ ಅಣ್ಣಾ ಸಲೈನಲ್ಲಿ ಜಯಪ್ರದಾ, ರಾಮಕುಮಾರ್, ರಾಜ್​ಬಾಬು ಸೇರಿಕೊಂಡು ಚಿತ್ರಮಂದಿರ ನಡೆಸುತ್ತಿದ್ದಾರೆ. ಇಲ್ಲಿನ ಕಾರ್ಮಿಕರಿಂದ 1991ರ ನವೆಂಬರ್‌ನಿಂದ 2002ರವರೆಗೆ 8.17 ಲಕ್ಷ ರೂ., 2002ರಿಂದ 2005ರವರೆಗೆ 1.58 ಲಕ್ಷ ರೂ., 2003ರಿಂದ 2003ರವರೆಗೆ 1.58 ಲಕ್ಷ ರೂ.ಗಳನ್ನು ಸಂಗ್ರಹಿಸಿ, ಅದನ್ನು ರಾಜ್ಯ ವಿಮಾ ನಿಗಮಕ್ಕೆ ಪಾವತಿಸದ ಆರೋಪ ಪ್ರಕರಣ ಇದಾಗಿದೆ.