ನವದೆಹಲಿ: ಇರಾನ್‌ನ ಚಬಹಾರ್ ಬಂದರನ್ನು ಸ್ವಾಧೀನಪಡಿಸಿಕೊಂಡಿರುವ ಭಾರತ ಇದೀಗ ಮ್ಯಾನ್ಮಾರ್‌ನಲ್ಲಿ ಸಿಟ್ವೆ ಎಂಬ ಎರಡನೇ ಸಾಗರೋತ್ತರ ಬಂದರನ್ನು ನಿರ್ವಹಿಸುವ ಹಕ್ಕನ್ನು ಪಡೆದುಕೊಂಡಿದೆ. ವಿದೇಶಾಂಗ ವ್ಯವಹಾರಗಳ ಸಚಿವಾಲಯ (MEA) ಭಾರತ ಪೋರ್ಟ್ಸ್ ಗ್ಲೋಬಲ್ (IPGL)ಗೆ ಕಲಾದನ್ ನದಿಯಲ್ಲಿರುವ ಸಂಪೂರ್ಣ ಬಂದರಿನ ಕಾರ್ಯಾಚರಣೆಯನ್ನು ಸ್ವಾಧೀನಪಡಿಸಿಕೊಳ್ಳಲು ಪ್ರಸ್ತಾವನೆಯನ್ನು ಅನುಮೋದಿಸಿದೆ.

IPGL ಎಂಬುದು ಬಂದರುಗಳು, ಹಡಗು ಮತ್ತು ಜಲಮಾರ್ಗಗಳ ಸಚಿವಾಲಯದ 100 ಪ್ರತಿಶತ ಒಡೆತನದ ಕಂಪನಿಯಾಗಿದೆ.

ಹಿಂದೂ ಮಹಾಸಾಗರದಲ್ಲಿ, ಚೀನಾ ಮತ್ತು ಭಾರತವು ತಮ್ಮ ಆರ್ಥಿಕ ಪ್ರಭಾವವನ್ನು ವಿಸ್ತರಿಸಲು ಹೋರಾಟದಲ್ಲಿ ತೊಡಗಿವೆ. ಈ ಪೈಪೋಟಿಯಲ್ಲಿ ಬಂದರುಗಳು ಹೆಚ್ಚು ಮಹತ್ವ ಪಡೆದಿವೆ. ಚೀನಾ, ನಿರ್ದಿಷ್ಟವಾಗಿ, ಶ್ರೀಲಂಕಾದ ಹಂಬಂತೋಟಾ ಮತ್ತು ಆಫ್ರಿಕಾದ ಜಿಬೌಟಿಯಂತಹ ಪ್ರದೇಶದ ವಿವಿಧ ದೇಶಗಳಲ್ಲಿನ ಹಲವಾರು ಬಂದರುಗಳಲ್ಲಿ ತನ್ನ ಕಾರ್ಯಾಚರಣೆಯ ಹಕ್ಕುಗಳನ್ನು ಪಡೆಯಲು ಆಕ್ರಮಣಕಾರಿಯಾಗಿ ಪ್ರಯತ್ನಿಸುತ್ತಿದೆ. ತಮ್ಮ ಬಂದರುಗಳಲ್ಲಿ ಹೂಡಿಕೆ ಮಾಡಲು ಮಾಲ್ಡೀವ್ಸ್ ಮತ್ತು ಬಾಂಗ್ಲಾದೇಶವನ್ನು ಕೂಡಾ ಅದು ಸಂಪರ್ಕಿಸಿದೆ. ಇವೆಲ್ಲವೂ ಭಾರತಕ್ಕೆ ಗಂಭೀರ ಕಳವಳವನ್ನು ಉಂಟುಮಾಡಿವೆ.

ಸಿಟ್ವೆ ಕಳೆದ ವರ್ಷ ಮೇ ತಿಂಗಳಲ್ಲಿ ಭಾರತದಿಂದ ಸರಕುಗಳನ್ನು ಸ್ವೀಕರಿಸಲು ಪ್ರಾರಂಭಿದೆ. ಕೋಲ್ಕತ್ತಾದ ಶ್ಯಾಮ ಪ್ರಸಾದ್ ಮುಖರ್ಜಿ ಬಂದರಿನಿಂದ ಮ್ಯಾನ್ಮಾರ್‌ನ ಸೂಕ್ಷ್ಮ ಪ್ರದೇಶ ರಾಖೈನ್ ರಾಜ್ಯದ ಬಂದರಿಗೆ ಮೊದಲ ಸರಕು ಸಾಗಣೆ ನಡೆದಿದೆ. ಬಾಂಗ್ಲಾದೇಶವನ್ನು ಬೈಪಾಸ್ ಮಾಡುವ ಮೂಲಕ ಆಂಧ್ರಪ್ರದೇಶದ ವೈಜಾಗ್ ಮತ್ತು ಪಶ್ಚಿಮ ಬಂಗಾಳದ ಕೋಲ್ಕತ್ತಾದಿಂದ ಈಶಾನ್ಯ ರಾಜ್ಯಗಳಿಗೆ ಸರಕು ತಲುಪಿಸಲು ಈ ಬಂದರು ಗಮನಾರ್ಹ ಸಂಪರ್ಕ ಪ್ರಯೋಜನವನ್ನು ನೀಡುತ್ತದೆ.