ಸ್ಯಾನ್ ಫ್ರಾನ್ಸಿಸ್ಕೋ: ಟ್ವಿಟರ್ಗೆ ಎಕ್ಸ್ ಎಂದು ಮರುನಾಮಕರಣ ಮಾಡಿದ ಕೆಲವೇ ವಾರಗಳ ನಂತರ ಮಸ್ಕ್ ಟ್ವಿಟರ್ ಹೆಸರು ಲೋಗೊ ಇರುವ ಎಲ್ಲ ವಸ್ತುಗಳನ್ನು ಕಚೇರಿಯಿಂದ ಆಚೆ ದಬ್ಬುತ್ತಿದ್ದಾರೆ. ‘ಟ್ವಿಟರ್ ರೀಬ್ರಾಂಡಿಂಗ್: ಸ್ಮರಣಿಕೆಗಳು, ಕಲಾತ್ಮಕ ವಸ್ತುಗಳು, ಕಚೇರಿ ಸ್ವತ್ತುಗಳು ಮತ್ತು ಇನ್ನೂ ಹಲವಾರು ವಸ್ತುಗಳ ಹರಾಜು!’ (‘Twitter Rebranding: Online Auction Featuring Memorabilia, Art, Office Assets & More!’) ಎಂಬ ಹರಾಜು ಬಿಡ್ಡಿಂಗ್ ಸೆಪ್ಟೆಂಬರ್ 12 ರಂದು ಪ್ರಾರಂಭವಾಗಲಿದ್ದು, ಎರಡು ದಿನಗಳಲ್ಲಿ ಮುಗಿಸಲು ಯೋಜಿಸಲಾಗಿದೆ ಎಂದು ವರದಿಯಾಗಿದೆ
ತಂತ್ರಜ್ಞಾನ ಉದ್ಯಮದ ಬಿಲಿಯನೇರ್ ಎಲೋನ್ ಮಸ್ಕ್ ಟ್ವಿಟರ್ ಕಟ್ಟಡದಲ್ಲಿನ ಲೋಗೊಗಳು ಮತ್ತು ವಸ್ತುಗಳನ್ನು ಹರಾಜಿಗೆ ಇಟ್ಟಿದ್ದಾರೆ.ಟ್ವಿಟರ್ ಕಂಪನಿಯ ಹೆಸರನ್ನು ಎಕ್ಸ್ ಎಂದು ಬದಲಾಯಿಸಿದ ನಂತರ ಎಲೋನ್ ಮಸ್ಕ್ ಟ್ವಿಟರ್ ಕಚೇರಿಯಲ್ಲಿನ ಹಳೆಯ ಲೋಗೊಗಳು ಮತ್ತು ವಸ್ತುಗಳನ್ನು ಹರಾಜಿಗಿಟ್ಟಿದ್ದಾರೆ.
ಪ್ರತಿ ವಸ್ತುವಿಗೆ ಕನಿಷ್ಠ ಬಿಡ್ $ 25 ಆಗಿದೆ ಎಂದು ಈ ವಸ್ತುಗಳನ್ನು ಹರಾಜು ಹಾಕುತ್ತಿರುವ ಸಂಸ್ಥೆ ಹೆರಿಟೇಜ್ ಗ್ಲೋಬಲ್ ಪಾರ್ಟನರ್ಸ್ ಹೇಳಿದೆ. ಕಾಫಿ ಟೇಬಲ್ಗಳು, ದೊಡ್ಡ ಪಕ್ಷಿ ಪಂಜರಗಳು ಮತ್ತು ವೈರಲ್ ಆದ ಚಿತ್ರಗಳ ತೈಲ ವರ್ಣಚಿತ್ರಗಳು ಹರಾಜಿಗಿಟ್ಟಿರುವ 584 ವಸ್ತುಗಳಲ್ಲಿ ಸೇರಿವೆ. ಸಾಕಷ್ಟು ಮೇಜು ಮತ್ತು ಕುರ್ಚಿಗಳು, ಡಿಜೆ ಬೂತ್ ಮತ್ತು ಮ್ಯೂಸಿಕ್ ಬ್ಯಾಂಡ್ನ ಹಲವಾರು ಸಂಗೀತ ವಾದ್ಯಗಳು ಕೂಡ ಹರಾಜಿನ ಪಟ್ಟಿಯಲ್ಲಿವೆ.
ಟ್ವಿಟರ್ ಎಕ್ಸ್ ಎಂದು ಬದಲಾಗಿದ್ದು ಏಕೆ?: ಟ್ವಿಟರ್ಗೆ X ಎಂದು ಮರುನಾಮಕರಣ ಮಾಡಿದ್ದು ಏಕೆ ಎಂಬ ಬಗ್ಗೆ ಸಿಇಒ ಲಿಂಡಾ ಯಕ್ಕರಿನೊ ಮಾತನಾಡಿದ್ದಾರೆ. “ಎಲೋನ್ ಬಹಳ ಸಮಯದಿಂದ ಎಕ್ಸ್ ಎಂಬ ಎಲ್ಲವನ್ನೂ ಒಳಗೊಂಡಿರುವ ಅಪ್ಲಿಕೇಶನ್ ತಯಾರಿಸುವ ಬಗ್ಗೆ ಹೇಳುತ್ತಿದ್ದರು. ನಾನು ಕಂಪನಿಗೆ ಸೇರುವ ಸಮಯದಲ್ಲಿ ಟ್ವಿಟರ್ ಅನ್ನು ಎಕ್ಸ್ ಆಗಿ ಪರಿವರ್ತಿಸಲು ಎಲೋನ್ ಅವರೊಂದಿಗೆ ಕೆಲಸ ಮಾಡಲು ಸೇರುತ್ತಿದ್ದೇನೆ ಎಂದು ನನಗೆ ತಿಳಿಸಲಾಗಿತ್ತು” ಎಂದು ಲಿಂಡಾ ತಿಳಿಸಿದರು.
ಮಸ್ಕ್ ಅವರ ನೇತೃತ್ವದಲ್ಲಿ ಕಂಪನಿಯಲ್ಲಿ ತಮಗಿರುವ ಅಧಿಕಾರ ವ್ಯಾಪ್ತಿಯ ಬಗ್ಗೆಯೂ ಲಿಂಡಾ ಮಾತನಾಡಿದರು. ಮಸ್ಕ್ ಉತ್ಪನ್ನ ವಿನ್ಯಾಸ ಮತ್ತು ತಾಂತ್ರಿಕ ನಾವೀನ್ಯತೆಯನ್ನು ನೋಡಿಕೊಳ್ಳುತ್ತಿದ್ದರೆ, ತಾನು ಕಂಪನಿಯ ಕಾರ್ಯಾಚರಣೆಗಳು, ಪಾಲುದಾರಿಕೆ, ಕಾನೂನು ವಿಷಯಗಳು, ಮಾರಾಟ ಮತ್ತು ಹಣಕಾಸು ಮೇಲ್ವಿಚಾರಣೆಯನ್ನು ನೋಡಿಕೊಳ್ಳುತ್ತಿರುವುದಾಗಿ ಹೇಳಿದರು.ವೈರಲ್ ಆದ ಚಿತ್ರಗಳ ಎರಡು ತೈಲ ವರ್ಣಚಿತ್ರಗಳು ಸಹ ಹರಾಜಿಗಿವೆ. ಇವುಗಳ ಪೈಕಿ ಮೊದಲನೆಯದು 2014 ರ ಅಕಾಡೆಮಿ ಪ್ರಶಸ್ತಿ ಸಮಾರಂಭದಲ್ಲಿ ತೆಗೆದ ಎಲೆನ್ ಡಿಜೆನೆರೆಸ್ ಅವರ ಸ್ಟಾರ್-ಸ್ಟಡ್ ಸೆಲ್ಫಿಯಾಗಿದೆ ಎಂದು ವರದಿ ತಿಳಿಸಿದೆ. ಎರಡನೇಯದು ಅಮೆರಿಕದ ಮಾಜಿ ಅಧ್ಯಕ್ಷ ಬರಾಕ್ ಒಬಾಮಾ ಅವರು ನವೆಂಬರ್ 2012 ರಲ್ಲಿ ಮರು ಆಯ್ಕೆಯಾದ ನಂತರ ಪೋಸ್ಟ್ ಮಾಡಿದ ಚಿತ್ರ. ಇದು ಆ ಸಮಯದಲ್ಲಿ ಟ್ವಿಟರ್ನಲ್ಲಿ ಅತ್ಯಧಿಕ ಲೈಕ್ ಪಡೆದ ಟ್ವೀಟ್ ಆಗಿತ್ತು.ಸದ್ಯ ಸ್ಯಾನ್ ಫ್ರಾನ್ಸಿಸ್ಕೊದ 10ನೇ ಬೀದಿಯಲ್ಲಿರುವ ಟ್ವಿಟರ್ ಪ್ರಧಾನ ಕಚೇರಿಯ ಮೇಲಿರುವ ಪಕ್ಷಿಯ ಚಿತ್ರದ ಬೋರ್ಡ್ ಅನ್ನು ಕೂಡ ಹರಾಜಿಗಿಡಲಾಗಿದೆ. “ಪಕ್ಷಿಯು ಈಗಲೂ ಕಟ್ಟಡದ ಒಂದು ಬದಿಯಲ್ಲಿ ಕುಳಿತಿದೆ. ಅಲ್ಲಿಂದ ತೆರವುಗೊಳಿಸಿ ತೆಗೆದುಕೊಂಡು ಹೋಗಲು ಎಸ್‌ಎಫ್ ಪರವಾನಗಿ ಪಡೆದ ಕಂಪನಿಯನ್ನು ನೇಮಿಸಿಕೊಳ್ಳುವುದು ಖರೀದಿದಾರರ ಜವಾಬ್ದಾರಿಯಾಗಿರುತ್ತದೆ” ಎಂದು ಹರಾಜಿನಲ್ಲಿ ಉಲ್ಲೇಖಿಸಲಾಗಿದೆ.
