ಕನ್ಯಾಕುಮಾರಿ: ವಿದ್ಯಾರ್ಥಿಯೊರ್ವ ಯೂಟ್ಯೂಬ್’ನಲ್ಲಿ ಡಯಟ್ ವಿಡಿಯೋ ನೋಡಿ ಮೂರು ತಿಂಗಳಿಂದ ಊಟ ಮಾಡದೇ ಬರೀ ಜ್ಯೂಸ್ ಕುಡಿದು ಉಸಿರಾಟ ತೊಂದರೆಯಿಂದ ಮೃತಪಟ್ಟ ಘಟನೆ ಕನ್ಯಾಕುಮಾರಿ ಜಿಲ್ಲೆಯ ಕುಳಚಲ್ ಬಳಿಯ ಪರ್ಣಟ್ಟಿವಿಳೈನಲ್ಲಿ ನಡೆದಿದೆ.
ಮೃತಪಟ್ಟ ವಿದ್ಯಾರ್ಥಿ ಪರ್ಣಟ್ಟಿವಿಳೈ ನಿವಾಸಿ ನಾಗರಾಜನ್ ಅವರ ಮಗ ಶಕ್ತೀಶ್ವರ್ (17).
ಶಕ್ತೀಶ್ವರ್ 12ನೇ ತರಗತಿ ಪಾಸಾಗಿ ಇಂಜಿನಿಯರಿಂಗ್ ಕಾಲೇಜಿಗೆ ಸೇರಲು ತಯಾರಾಗಿದ್ದ. ನಿನ್ನೆ ಬೆಳಿಗ್ಗೆ ಮನೆಯಲ್ಲಿದ್ದ ಶಕ್ತೀಶ್ವರ್ ಉಸಿರಾಟದ ತೊಂದರೆಯಿಂದ ಕುಸಿದು ಬಿದ್ದಿದರು. ಆತಂಕಗೊಂಡ ಪೋಷಕರು ಹತ್ತಿರದ ಆಸ್ಪತ್ರೆಗೆ ಕರೆದೊಯ್ದರು. ಅಲ್ಲಿ ವೈದ್ಯರು ಆತ ಈಗಾಗಲೇ ಮೃತಪಟ್ಟಿದ್ದಾಗಿ ತಿಳಿಸಿದರು. ಈ ಘಟನೆಯ ಬಗ್ಗೆ ಪೊಲೀಸರಿಗೆ ಮಾಹಿತಿ ನೀಡಲಾಯಿತು. ಸ್ಥಳಕ್ಕೆ ಆಗಮಿಸಿದ ಪೊಲೀಸರು ಪೋಷಕರನ್ನು ವಿಚಾರಿಸಿದಾಗ ಆಘಾತಕಾರಿ ವಿಷಯ ಬೆಳಕಿಗೆ ಬಂದಿದೆ.
ಯೂಟ್ಯೂಬ್ ನೋಡಿ ಕಠಿಣ ಡಯೆಟ್:
ಶಕ್ತೀಶ್ವರ್ ತನ್ನ ದೇಹದ ತೂಕದಿಂದ ಬಳಲುತ್ತಿದ್ದ. ಕಾಲೇಜಿಗೆ ಹೋಗುವ ಮುನ್ನ ತೂಕ ಇಳಿಸಿಕೊಳ್ಳಲು ಯೂಟ್ಯೂಬ್ ವಿಡಿಯೋ ನೋಡಿ ಕಠಿಣ ಡಯೆಟ್ ಮಾಡುತ್ತಿದ್ದ. ಸುಮಾರು 3 ತಿಂಗಳಿನಿಂದ ಜ್ಯೂಸ್ ಮಾತ್ರ ಕುಡಿದು ವ್ಯಾಯಾಮ ಮಾಡುತ್ತಿದ್ದ. ನಿರಂತರವಾಗಿ ಜ್ಯೂಸ್ ಕುಡಿಯುತ್ತಿದ್ದರಿಂದ ಶೀತದ ಸಮಸ್ಯೆ ಕಾಣಿಸಿಕೊಂಡಿತ್ತು. ಇದರಿಂದ ಉಸಿರಾಡಲು ಕಷ್ಟಪಡುತ್ತಿದ್ದ. ತೀವ್ರ ಶೀತದ ಸಮಸ್ಯೆ ಕಾಣಿಸಿಕೊಂಡು ಉಸಿರಾಟದ ತೊಂದರೆಯಿಂದ ಕುಸಿದು ಬಿದ್ದು ಸಾವನ್ನಪ್ಪಿದ್ದಾನೆ ಎಂದು ತಿಳಿದುಬಂದಿದೆ.
ಶಕ್ತೀಶ್ವರ್ ಮೃತದೇಹವನ್ನು ವಶಪಡಿಸಿಕೊಂಡ ಪೊಲೀಸರು ಮರಣೋತ್ತರ ಪರೀಕ್ಷೆಗಾಗಿ ಆಸಾರಿಪಾಳ್ಯಂ ಸರ್ಕಾರಿ ಆಸ್ಪತ್ರೆಗೆ ಕಳುಹಿಸಿದ್ದಾರೆ. ಮೂರು ತಿಂಗಳಿನಿಂದ ಊಟ ಮಾಡದೆ ಜ್ಯೂಸ್ ಮಾತ್ರ ಕುಡಿದು ವಿದ್ಯಾರ್ಥಿ ಸಾವನ್ನಪ್ಪಿರುವುದು ಆ ಭಾಗದಲ್ಲಿ ದುಃಖವನ್ನುಂಟುಮಾಡಿದೆ.
