ಜೈಲರ್​ ಈ ಹಿಂದಿನ ಬಾಕ್ಸ್​ ಆಫೀಸ್​ ದಾಖಲೆಗಳನ್ನು ಮುರಿದಿದೆ. ಭಾರತದ ಅತ್ಯಂತ ಪ್ರಸಿದ್ಧ ನಟ ರಜನಿಕಾಂತ್​ ಅವರ ಜೈಲರ್​ ಸಿನಿಮಾ ಚಿತ್ರಮಂದಿರಗಳಲ್ಲಿ ಉತ್ತಮ ಪ್ರದರ್ಶನ ಮುಂದುವರಿಸಿದೆ. ನೆಲ್ಸನ್​ ದಿಲೀಪ್​ ಕುಮಾರ್​ ಆಯಕ್ಷನ್​ ಕಟ್​ ಹೇಳಿರುವ ಈ ಸಿನಿಮಾ ಬಾಕ್ಸ್​ ಆಫೀಸ್​ನಲ್ಲಿ ಸಖತ್​ ಸದ್ದು ಮಾಡುತ್ತಿದೆ.ಚೆನ್ನೈನಲ್ಲಿ ಜೈಲರ್​ ಸಿನಿಮಾ ಸಕ್ಸಸ್​ ಸೆಲೆಬ್ರೇಶನ್ ನಡೆದಿದೆ.

ಗಲ್ಲಾಪೆಟ್ಟಿಗೆ ಅಂಕಿ ಅಂಶ ಎಲ್ಲರ ಹುಬ್ಬೇರುವಂತೆ ಮಾಡಿದೆ. ತಲೈವಾ 2 ವರ್ಷಗಳ ಬ್ರೇಕ್​ ಬಳಿಕ ಜೈಲರ್​ನೊಂದಿಗೆ ಪರದೆ ಮೇಲೆ ಬಂದಿದ್ದು, 2023ರ ಬ್ಲಾಕ್​ಬಸ್ಟರ್​ ಚಿತ್ರವಾಗಿ ಹೊರಹೊಮ್ಮಿದೆ. ಈ ಹೊತ್ತಿನಲ್ಲಿ ರಜನಿಕಾಂತ್​ ಮುಖ್ಯಭೂಮಿಕೆಯ ಮುಂದಿನ ಸಿನಿಮಾ ಶೂಟಿಂಗ್​​ ಶುರುವಾಗಿದೆ.

ಜೈಲರ್​ ಸಕ್ಸಸ್​ ಸೆಲೆಬ್ರೇಶನ್: ಜೈಲರ್​ ಈ ಹಿಂದಿನ ಬಾಕ್ಸ್​ ಆಫೀಸ್​ ದಾಖಲೆಗಳನ್ನು ಮುರಿದಿದೆ. ರಜನಿ ಮುಖ್ಯಭೂಮಿಕೆಯ ಈ ಸಿನಿಮಾ ಜಗತ್ತಿನಾದ್ಯಂತ 500 ಕೋಟಿಗೂ ಹೆಚ್ಚು ಸಂಪಾದನೆ ಮಾಡುವಲ್ಲಿ ಯಶ ಕಂಡಿದೆ. ಈ ಸಂಖ್ಯೆ ರಜನಿಕಾಂತ್​ ಅವರ ಸ್ಟಾರ್​ಡಮ್​​ ಎಷ್ಟಿದೆ, ಹೇಗಿದೆ ಎಂಬುದನ್ನು ಒತ್ತಿ ಹೇಳುತ್ತಿದೆ. ಪ್ಯಾನ್​ ಇಂಡಿಯಾ ಸಿನಿಮಾ ಸಿನಿಪ್ರಿಯರಿಂದ ಸಾಕಷ್ಟು ಪ್ರೀತಿ, ಬೆಂಬಲ ಪಡೆಯುತ್ತಿರುವ ಈ ಹೊತ್ತಿನಲ್ಲಿ ನಾಯಕ ನಟ ರಜನಿಕಾಂತ್ ಅವರು ತಮ್ಮ ಚಿತ್ರತಂಡದೊಂದಿಗೆ ಚೆನ್ನೈನಲ್ಲಿ ಸಿನಿಮಾ ಸಕ್ಸಸ್​ನ ಸೆಲೆಬ್ರೇಶನ್​ ಮಾಡಿದ್ದಾರೆ.

ಚಿತ್ರತಂಡದವರೊಂದಿಗೆ ಕೇಕ್​ ಕತ್ತರಿಸಿದ ರಜನಿ: ಹಿರಿಯ ನಟ ರಜನಿಕಾಂತ್​ ಅವರು ತಮ್ಮ ಜೈಲರ್​ ಸಿನಿಮಾ ತೆರೆಕಾಣುವ ಮುನ್ನಾದಿನದಂದು ಆಧ್ಯಾತ್ಮಿಕ ಪ್ರವಾಸ ಕೈಗೊಂಡರು. ಪ್ರಯಾಣದ ವೇಳೆ ಗಣ್ಯರನ್ನೂ ಸಹ ಭೇಟಿ ಆಗಿ ಗಮನ ಸೆಳೆದರು. ಆಧ್ಯಾತ್ಮಿಕ ಪ್ರಯಾಣ ಮುಗಿಸಿ ಇತ್ತೀಚೆಗೆ ಚೆನ್ನೈಗೆ ವಾಪಸ್ಸಾಗಿದ್ದು, ಜೈಲರ್​ ಯಶಸ್ಸನ್ನು ಆಚರಿಸಲು ತಮ್ಮ ತಂಡದೊಂದಿಗೆ ಸೇರಿಕೊಂಡರು. ಜೈಲರ್​ ಸಿನಿಮಾ ನಿರ್ದೇಶಕ ನೆಲ್ಸನ್​ ದಿಲೀಪ್​ ಕುಮಾರ್​, ಸಂಗೀತ ಸಂಯೋಜಕ ಅನಿರುಧ್ ರವಿಚಂದರ್​, ನಟಿ ರಮ್ಯಾ ಕೃಷ್ಣನ್​ ಸೇರಿದಂತೆ ಚಿತ್ರತಂಡದವರು ಸಂಭ್ರಮಾಚರಣೆಯಲ್ಲಿ ಭಾಗಿಯಾಗಿದ್ದರು. 72ರ ಹಿರಿಯ ನಟನ ಸುತ್ತಲೂ ನಗುಮೊಗದಲ್ಲಿ ಚಿತ್ರತಂಡದವರು ಸುತ್ತುವರಿದಿದ್ದರು. ಬಳಿಕ ಕೇಕ್​ ಕತ್ತರಿಸಿ ಸಕ್ಸಸ್​ ಸೆಲೆಬ್ರೇಶನ್​ ಮಾಡಿದ್ದಾರೆ.

ತಲೈವರ್​ 170 ಶೂಟಿಂಗ್​: ಚಿತ್ರಮಂದಿರಗಳಲ್ಲಿ ಜೈಲರ್​ ಉತ್ತಮ ಪ್ರದರ್ಶನ ಮುಂದುವರಿಸಿದೆ. ಈ ಹೊತ್ತಿನಲ್ಲಿ ರಜನಿ ಮುಂದಿನ ಸಿನಿಮಾ ಕೆಲಸ ಶುರು ಮಾಡಿದ್ದಾರೆ. ಜೈ ಭಿಮ್​ ಖ್ಯಾತಿಯ ಟಿಜೆ ಜ್ಞಾನವೆಲ್​​ ನಿರ್ದೇಶನದಲ್ಲಿ ರಜನಿ ಅವರ ಮುಂದಿನ ಸಿನಿಮಾ ಮೂಡಿ ಬರಲಿದೆ. ಸಿನಿಮಾವನ್ನು ಸದ್ಯ ತಲೈವರ್​ 170 ಎಂದು ಹೆಸರಿಸಲಾಗಿದೆ. ತಾತ್ಕಾಲಿಕ ಶೀರ್ಷಿಕೆ ಮೂಲಕ ಸದ್ದು ಮಾಡುತ್ತಿರುವ ಈ ಸಿನಿಮಾದಲ್ಲಿ ಅಮಿತಾಭ್​ ಬಚ್ಚನ್​​, ಮಂಜು ವಾರಿಯರ್​, ಫಹಾದ್​ ಫಾಸಿಲ್​​, ಶರ್ವಾನಂದ್​ ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಲೈಕಾ ಪ್ರೊಡಕ್ಸನ್ಸ್​​ ಈ ಚಿತ್ರವನ್ನು ನಿರ್ಮಾಣ ಮಾಡಲಿದೆ.

2023ರಲ್ಲಿ ಅತಿ ಹೆಚ್ಚು ಕಲೆಕ್ಷನ್​ ಮಾಡಿದ ಸಿನಿಮಾ: ಜೈಲರ್​ 2023 ರಲ್ಲಿ ಅತಿ ಹೆಚ್ಚು ಕಲೆಕ್ಷನ್​ ಮಾಡಿದ ಸಿನಿಮಾವಾಗಿ ಹೊರಹೊಮ್ಮಿದೆ. ಆಯಕ್ಷನ್ ಕಾಮಿಡಿ ಸಿನಿಮಾ ತಮಿಳುನಾಡು ಮಾತ್ರವಲ್ಲದೇ ಕರ್ನಾಟಕ, ಕೇರಳ, ಆಂಧ್ರ ಸೇರಿದಂತೆ ಭಾರತದಾದ್ಯಂತ ಸಖತ್​ ಸದ್ದು ಮಾಡುತ್ತಿದೆ. ಈ ಹಿಂದಿನ ಸಿನಿಮಾದಲ್ಲಿ ಹಿನ್ನಡೆ ಕಂಡಿದ್ದ ನೆಲ್ಸನ್​ ದಿಲೀಪ್​ ಕುಮಾರ್ ಅವರಿಗೆ ಜೈಲರ್​ ಯಶಸ್ಸು ಮುಂದಿನ ಹೆಜ್ಜೆಗೆ ಉತ್ಸಾಹ ತುಂಬಿದೆ.