ದುಬೈ: ವೆಸ್ಟ್​ ಇಂಡೀಸ್​ ವಿರುದ್ಧ ಭಾರತ ತಂಡ ಸರಣಿ ಸೋಲು ಅನುಭವಿಸಿದರೂ ತೀರಾ ಕಳಪೆ ಪ್ರದರ್ಶನ ತೋರಿಲ್ಲ. ಇಂದು ಐಸಿಸಿ ಟಿ20 ಶ್ರೇಯಾಂಕ ಪಟ್ಟಿ ಬಿಡುಗಡೆ ಮಾಡಿದ್ದು, ಭಾರತದ ಆಟಗಾರರು ಉತ್ತಮ ಏರಿಕೆ ಕಂಡಿದ್ದಾರೆ.ವಿಂಡೀಸ್​ ಸರಣಿಯ ನಂತರ ಬಿಡುಗಡೆಯಾದ ಐಸಿಸಿ ಟಿ20 ಕ್ರಿಕೆಟ್‌ ಶ್ರೇಯಾಂಕದಲ್ಲಿ ಶುಭ್‌ಮನ್​ ಗಿಲ್​, ತಿಲಕ್​ ವರ್ಮಾ ಮತ್ತು ಜೈಸ್ವಾಲ್​ ಉತ್ತಮ ಏರಿಕೆ ಕಂಡಿದ್ದಾರೆ ಅಗ್ರಸ್ಥಾನದಲ್ಲಿದ್ದ ಸೂರ್ಯ ಕುಮಾರ್ ಯಾದವ್​ ತಮ್ಮ ಸ್ಥಾನವನ್ನು ಸುಭದ್ರವಾಗಿ ಕಾಯ್ದುಕೊಂಡಿದ್ದಾರೆ. ಆರಂಭಿಕ ಆಟಗಾರ ಶುಭ್‌ಮನ್​ ಗಿಲ್​ 25ನೇ ಶ್ರೇಯಾಂಕಕ್ಕೆ ಏರಿದ್ದಾರೆ.

ವೆಸ್ಟ್ ಇಂಡೀಸ್ ವಿರುದ್ಧದ ಸರಣಿ 4ನೇ ಪಂದ್ಯದಲ್ಲಿ 163ರ ಸ್ಟ್ರೈಕ್​ರೇಟ್​ನಲ್ಲಿ ಬ್ಯಾಟ್​ ಬೀಸಿ 77 ರನ್ ಮತ್ತು ಒಟ್ಟಾರೆ ಸಿರೀಸ್​ನಲ್ಲಿ 102 ರನ್ ಕಲೆಹಾಕಿದ ಶುಭ್‌ಮನ್​ ಗಿಲ್​ ಒಮ್ಮೆಗೆ 43 ಸ್ಥಾನಗಳ ಏರಿಕೆ ಕಂಡಿದ್ದಾರೆ. ಅದರಂತೆ ಪ್ರಸ್ತುತ ಶ್ರೇಯಾಂಕ ಪಟ್ಟಿಯಲ್ಲಿ 25ನೇ ಸ್ಥಾನ ಅಲಂಕರಿಸಿದ್ದಾರೆ. ವೆಸ್ಟ್​ ಇಂಡೀಸ್​ ಸರಣಿಯಲ್ಲಿ ಪಾದಾರ್ಪಣೆ ಮಾಡಿ ಗಮನಾರ್ಹ ಪ್ರದರ್ಶನ ನೀಡಿದ ತಿಲಕ್​ ವರ್ಮಾ 46ನೇ ಸ್ಥಾನದಲ್ಲಿದ್ದಾರೆ. ಯುವ ಬ್ಯಾಟರ್​ ಯಶಸ್ವಿ ಜೈಸ್ವಾಲ್‌ಗೆ​ 88ನೇ ಸ್ಥಾನ ಸಿಕ್ಕಿದೆ.

ವಿಂಡೀಸ್‌​ ಸರಣಿಯ ಏಕದಿನ ಪಂದ್ಯದಲ್ಲಿ ಸೂರ್ಯ ಒಳ್ಳೆಯ ಆಟ ಆಡುವಲ್ಲಿ ವಿಫಲವಾದರೂ ಟಿ20ಯಲ್ಲಿ ಕಮ್​ಬ್ಯಾಕ್​ ಮಾಡಿದ್ದಾರೆ. ಮೂರನೇ ಟಿ20 ಪಂದ್ಯದಲ್ಲಿ 44 ಬಾಲ್​ನಲ್ಲಿ 88 ರನ್​ ಗಳಿಸಿ 188ರ ಸ್ಟ್ರೈಕ್​ ರೇಟ್ ಹೊಂದಿದ್ದರು. ಕೊನೆಯ ಪಂದ್ಯದಲ್ಲಿ 45 ಬಾಲ್​ಗೆ 61 ರನ್ ಗಳಿಸಿದ್ದರಿಂದ 135 ಸ್ಟ್ರೈಕ್​ರೇಟ್​ ಹೊಂದಿದ್ದರು. ಐದು ಟಿ20 ಪಂದ್ಯಗಳಲ್ಲಿ ನಾಲ್ಕು ಇನ್ನಿಂಗ್ಸ್​ ಆಡಿರುವ ಸೂರ್ಯ ಎರಡು ಅರ್ಧಶತಕ ಗಳಿಸಿದ್ದರು. ಸರಣಿಯಲ್ಲಿ ಒಟ್ಟು 166 ರನ್​ ಗಳಿಸಿದ್ದಾರೆ. ಈ ಬ್ಯಾಟಿಂಗ್​ ಪ್ರದರ್ಶನದಿಂದಾಗಿ ಐಸಿಸಿ ಶ್ರೇಯಾಂಕದಲ್ಲಿ ಒಂದು ಅಂಕ ಏರಿಕೆ ಕಂಡಿದ್ದಾರೆ, ಅಂದರೆ 907 ರೇಟಿಂಗ್ ಅವರಿಗಿದೆ.

ವೆಸ್ಟ್​ ಇಂಡೀಸ್​ ಟಿ20 ಸರಣಿಯಲ್ಲಿ ಗಾಯದಿಂದ ಒಂದು ಪಂದ್ಯ ಹೊರಗುಳಿದರೂ ಬಾಕಿ ಪಂದ್ಯಗಳಲ್ಲಿ 6 ವಿಕೆಟ್​ ಪಡೆದು ಮಿಂಚಿದ ಕುಲ್​ದೀಪ್ ಯಾದವ್​ 23 ಸ್ಥಾನಗಳ ಸುಧಾರಿಕೆ ಕಂಡು 28ನೇ ಶ್ರೇಯಂಕವನ್ನು ಪಡೆದುಕೊಂಡಿದ್ದಾರೆ. ಉತ್ತಮ ಬೌಲಿಂಗ್​ ಪ್ರರ್ದರ್ಶಿಸಿದ ಅಕೆಲ್ ಹೊಸೈನ್ 11ನೇ ರ್‍ಯಾಂಕಿಂಗ್​ ದೊರೆತಿದೆ.

ಐದನೇ ಟಿ20 ಪಂದ್ಯದಲ್ಲಿ 85 ರನ್​ ಗಳಿಸಿ ಪರಿಣಾಮಕಾರಿ ಬ್ಯಾಟಿಂಗ್​ ಮಾಡಿದ ವೆಸ್ಟ್​ ಇಂಡೀಸ್​ ಆಟಗಾರ ಬ್ರ್ಯಾಂಡನ್ ಕಿಂಗ್ ತಮ್ಮ ವೃತ್ತಿ ಜೀವನದ ಉತ್ತಮ ಶ್ರೇಯಾಂಕ ಪಡೆದುಕೊಂಡಿದ್ದಾರೆ. ಕಿಂಗ್​ಕೊನೆಯ ಇನ್ನಿಂಗ್ಸ್​​ನ ಪ್ರಭಾವದಿಂದ 13ನೇ ರ್‍ಯಾಂಕಿಂಗ್​ ಪಡೆದುಕೊಂಡಿದ್ದಾರೆ. ಇವರು ಸರಣಿಯಲ್ಲಿ ಒಟ್ಟು 173 ರನ್ ಗಳಿಸಿದ್ದಾರೆ. ಸರಣಿಯಲ್ಲಿ 176 ರನ್​ ಗಳಿಸಿದ ವೆಸ್ಟ್​ ಇಂಡೀಸ್​ ಸ್ಫೋಟಕ ಬ್ಯಾಟರ್​ ನಿಕೋಲಸ್​ ಪೂರನ್​ 15ನೇ ಶ್ರೇಯಾಂಕದಲ್ಲಿದ್ದಾರೆ.