ಬರಹ-ಸುವರ್ಚಲಾ ಬಿ.ಸಂ

ಸಾಮಾನ್ಯವಾಗಿ ನಾವು ಹೊರಗೆ ಹೋಗುವ ಸಂದರ್ಭ ಬಂದಾಗ ಎತ್ತಿಕೊಂಡು ಹೋಗಲು ಹಗುರವೆಂದೋ, ಕಳೆದುಹೋದರೂ ನಷ್ಟವಿಲ್ಲ ಎಂದೋ ಪ್ನಾಸ್ಟಿಕ್ ಬಾಟಲಿಯಲ್ಲಿ ಸಾಮಾನ್ಯವಾಗಿ ನೀರು ತೆಗೆದುಕೊಂಡು ಹೋಗುತ್ತೇವೆ. ಅಲ್ಲದೇ ಅಂಗಡಿಗಳಲ್ಲಿ ಸಿಗುವ ನೀರಿನ ಶೇಖರಿಸಿಟ್ಟ ನೀರಿನ ಬಾಟಲಿಗಳನ್ನು ಖರೀದಿಸುತ್ತೇವೆ.
ಈ ರೀತಿಯ ಅಭ್ಯಾಸವಿದ್ದರೆ ಖಂಡಿತಾ ಬಿಟ್ಟುಬಿಡಿ. ಅನುಕೂಲಕ್ಕಿಂತ ನಮ್ಮ ಆರೋಗ್ಯ ನಮಗೆ ಅತಿಮುಖ್ಯ.

ಪ್ಲಾಸ್ಟಿಕ್ ಬಾಟಲಿಯಲ್ಲಿ ಶೇಖರಿಸಿಟ್ಟ ನೀರನ್ನು ಕುಡಿಯುವುದು ಅತಿ ಅಪಾಯಕಾರಿ ಎಂದು ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಪ್ರಾಧಿಕಾರ(FSSAI) ತಿಳಿಸಿದೆ. ಶೇಖರಿಸಿಡುವ ಮಿನರಲ್ ನೀರಿನಲ್ಲಿ ನಿಜವಾಗಲೂ ದೇಹಕ್ಕೆ ಬೇಕಾದ ಮಿನರಲ್ ಗಳು ಪೂರಕ ಪ್ರಮಾಣದಲ್ಲಿ ಇರುವುದಿಲ್ಲ, ಅಲ್ಲದೇ ಈ ನೀರಿನಲ್ಲಿ ಮೈಕ್ರೋಪ್ಲಾಸ್ಟಿಕ್, ನ್ಯಾನೋ ಪ್ಲಾಸ್ಟಿಕ್ ನ ಅಂಶಗಳು, ಕೊಳಚೆ ನೀರು, ಕ್ರಿಮಿನಾಶಕಗಳಲ್ಲಿ ಇರುವ ಬ್ಯಾಕ್ಟೀರಿಯಾಗಳ ಅಂಶವೂ ಸೇರಿದೆ ಎಂದ ವರದಿ ನಿಜಕ್ಕೂ ಆಘಾತ ತರುತ್ತದೆ.

ನೀರಿನ ವಿಷಯದಲ್ಲಿ ಹೀಗೆ ಮಾಡಿ
ಸ್ಟೀಲ್ ನೀರಿನ ಬಾಟಲಿಗಳು ಪ್ಲಾಸ್ಟಿಕ್ ಬಾಟಲಿಗಿಂತ ತುಸು ದುಬಾರಿ ಎನಿಸಿದರೂ ನಮ್ಮ ಆರೋಗ್ಯ ಮುಖ್ಯ. ಹಾಗಾಗಿ ಕಡಿಮೆ ತೂಕ ಇರುವ ಸ್ಟೀಲ್ ಬಾಟಲಿಯನ್ನು ಕೊಂಡುಕೊಳ್ಳಿ. ಸದಾ ಹೊರಗೆ ಹೋಗುವಾಗ ನಿಮ್ಮ ಬಾಟಲಿಯಲ್ಲಿ ನಿಮ್ಮ ಮನೆಯ ಶುದ್ಧ ನೀರನ್ನೇ ತೆಗೆದುಕೊಂಡುಹೋಗಿ.

ಮದುವೆ ಮುಂತಾದ ಶುಭಸಮಾರಂಭಗಳಿಗೆ ಹೋಗುವಾಗಲೂ ಅಲ್ಲಿ ಕೊಡುವ ಪ್ಲಾಸ್ಟಿಕ್ ಬಾಟಲಿಯನ್ನು ನಿರಾಕರಿಸಿ ನಿಮ್ಮದೇ ಬಾಟಲಿಯ ನೀರು ಕುಡಿಯಿರಿ. ಇದರಿಂದ ಪರಿಸರಕ್ಕೆ ನಮ್ಮ ಕೈಲಾದ ಅಲ್ಪ ಕೊಡುಗೆಯನ್ನು ಕೊಡಬಹುದು.

ತುಂಬಾ ಅನಿವಾರ್ಯವಾಗಿ ನೀರು ಕೊಳ್ಳಲೇ ಬೇಕಾದ ಸಂದರ್ಭ ಬಂದರೆ ಎಕ್ಸ್ಪೈರಿ ದಿನಾಂಕ, fssai ನಿಂದ ಪ್ರಮಾಣೀಕರಿಸಲ್ಪಟ್ಟಿದೆಯೇ ಎಂಬೆಲ್ಲಾ ವಿವರಗಳನ್ನು ಸರಿಯಾಗಿ ಗಮನಿಸಿ. ಇವು ಏಕಬಳಕೆಯ ಪ್ಲಾಸ್ಟಿಕ್ ಬಾಟಲಿ ಆಗಿರೋದ್ರಿಂದ ಖಾಲಿ ಆಗ್ತಿದ್ದಂಗೇ ಕ್ರಷ್ ಮಾಡಿ ಕಸದ ಬುಟ್ಟಿಗೆ ಹಾಕಿ.

ಆಹಾರವಿಲ್ಲದೇ ಒಂದೆರಡು ದಿನ ಹೇಗಾದರೂ ಬದುಕಬಹುದೇನೋ. ಆದರೆ ನೀರಿಲ್ಲದೆ ಬದುಕಲು ತುಂಬಾ ಕಷ್ಟ. ಇಂತಹ ಅತ್ಯಗತ್ಯ ನೀರು ಪ್ಲಾಸ್ಟಿಕ್ ಬಾಟಲಿಯಲ್ಲಿ, ಲೋಟಗಳಲ್ಲಿ ಕುಡಿಯುವ ಮೊದಲು ಯೋಚ್ನೆ ಮಾಡಿ. ಪ್ಲಾಸ್ಟಿಕ್ ಗೆ ಪರ್ಯಾಯವಾಗಿ ಸ್ಟೀಲ್ ಬಾಟಲಿಯನ್ನು ಜೊತೆಗೊಯ್ಯಿರಿ ಈ ಬಾಟಲಿ ಒಳ್ಳೆ ಬಾಳಿಕೆಯೂ ಬರುತ್ತದೆ. ಒಂದು ಪರಿಸರ ಸ್ನೇಹಿ ಅಭ್ಯಾಸವೂ ನಮ್ಮದಾಗುತ್ತದೆ. ಇದು ನಮ್ಮ ಕಾಳಜಿ