ನವದೆಹಲಿ: ದೆಹಲಿ ವಿಶ್ವವಿದ್ಯಾಲಯದ ವಿದ್ಯಾರ್ಥಿ ಒಕ್ಕೂಟದ (DUSU) ಚುನಾವಣೆಯಲ್ಲಿ ನಾಲ್ಕು ಸೆಂಟ್ರಲ್ ಪ್ಯಾನಲ್ ಹುದ್ದೆಗಳ ಪೈಕಿ ಮೂರರಲ್ಲಿ ಅಖಿಲ ಭಾರತೀಯ ವಿದ್ಯಾರ್ಥಿ ಪರಿಷತ್ (ABVP) ಗೆಲುವು ಸಾಧಿಸಿದೆ. ಶನಿವಾರ ಸಂಜೆ ಮತ ಎಣಿಕೆ ಮುಕ್ತಾಯಗೊಂಡಾಗ ಎಬಿವಿಪಿಯ ತುಷಾರ್ ದೇಧಾ ಡಿಯುಎಸ್‌ಯು ಅಧ್ಯಕ್ಷ ಸ್ಥಾನವನ್ನು ಗೆದ್ದಿದ್ದು ವಿದ್ಯಾರ್ಥಿ ಸಂಘದ ಕಾರ್ಯದರ್ಶಿಯಾಗಿ ಎಬಿವಿಪಿಯ ಅಪರಾಜಿತಾ ಹಾಗೂ ಜಂಟಿ ಕಾರ್ಯದರ್ಶಿಯಾಗಿ ಸಚಿನ್ ಬೈಸ್ಲಾ ಆಯ್ಕೆಯಾಗಿದ್ದಾರೆ.

ಏತನ್ಮಧ್ಯೆ, NSUI ಅಭ್ಯರ್ಥಿ ಅಭಿ ದಹಿಯಾ ಉಪಾಧ್ಯಕ್ಷ ಸ್ಥಾನವನ್ನು ಗೆದ್ದಿದ್ದಾರೆ. ಶುಕ್ರವಾರ ವಿದ್ಯಾರ್ಥಿ ಸಂಘದ ಚುನಾವಣೆ ನಡೆಯಿತು. DUSU ಚುನಾವಣೆಗಳು ಯಾವಾಗಲೂ ABVP ಮತ್ತು NSUI ನಡುವೆ ನೇರ ಹೋರಾಟವನ್ನು ಕಂಡಿವೆ. ಚುನಾವಣೆಯಲ್ಲಿ ನಾಲ್ಕು ಸ್ಥಾನಗಳಿಗೆ 24 ಅಭ್ಯರ್ಥಿಗಳು ಕಣದಲ್ಲಿದ್ದರು.

ಕೇಂದ್ರೀಯ ಸಮಿತಿಗಾಗಿ 52 ಕಾಲೇಜುಗಳು ಮತ್ತು ವಿಭಾಗಗಳಲ್ಲಿನ ಚುನಾವಣೆಗಳನ್ನು ಇವಿಎಂಗಳ ಮೂಲಕ ನಡೆಸಲಾಯಿತು ಮತ್ತು ಕಾಲೇಜು ಯೂನಿಯನ್ ಚುನಾವಣೆಗಳಿಗೆ ಮತದಾನವು ಪೇಪರ್ ಬ್ಯಾಲೆಟ್‌ಗಳಲ್ಲಿ ನಡೆಯಿತು.

ವಿಶ್ವವಿದ್ಯಾನಿಲಯವು ಶೇಕಡಾ 42 ರಷ್ಟು ಮತದಾನವನ್ನು ದಾಖಲಿಸಿದೆ. DUSU ಚುನಾವಣೆಯಲ್ಲಿ ಸುಮಾರು ಒಂದು ಲಕ್ಷ ವಿದ್ಯಾರ್ಥಿಗಳು ಮತ ಚಲಾಯಿಸಲು ಅರ್ಹರಾಗಿದ್ದರು.