ಓವೆಲ್​ (ಲಂಡನ್​): ಅಜಿಂಕ್ಯ ರಹಾನೆ ಹಾಗೂ ಶಾರ್ದೂಲ್​ ಠಾಕೂರ್​ ಅವರ ಅರ್ಧಶತಕದ ನೆರವಿನಿಂದ ಭಾರತ ಅಲ್ಪಮೊತ್ತಕ್ಕೆ ಕುಸಿಯುವ ಭೀತಿಯಿಂದ ತಪ್ಪಿಸಿಕೊಂಡಿತು.ಅಜಿಂಕ್ಯ ರಹಾನೆ ಮತ್ತು ಶಾರ್ದೂಲ್​ ತಾಳ್ಮೆಯ ಜೊತೆಯಾಟದ ನೆರವಿನಿಂದ ಭಾರತ ಮೊದಲ ಇನ್ನಿಂಗ್ಸ್​ನಲ್ಲಿ 296 ರನ್​ ಗಳಿಸಲಷ್ಟೇ ಶಕ್ತವಾಯಿತು.69.4 ಓವರ್‌ಗಳಲ್ಲಿ 296 ರನ್​​ ಗಳಿಸಿ ತಂಡ ಆಲ್​ಔಟಾಗಿದೆ. ಆಸ್ಟ್ರೇಲಿಯಾ 173 ರನ್​ಗಳ ಮುನ್ನಡೆ ಗಳಿಸಿತು.

ಭೋಜನ ವಿರಾಮದಿಂದ ಮರಳಿದ ಕೂಡಲೇ ಅಜಿಂಕ್ಯ ರಹಾನೆ ವಿಕೆಟ್​ ಒಪ್ಪಿಸಿದರು. ಇದರಿಂದಾಗಿ ಅವರು 11 ರನ್‌ಗಳಿಂದ ಶತಕ ವಂಚಿತರಾದರು. ಊಟಕ್ಕೆ ತೆರಳುವ ಮುನ್ನ 122 ಬಾಲ್​ಗೆ 89 ರನ್ ಗಳಿಸಿದ್ದ ರಹಾನೆ, ನಂತರ 7 ಬಾಲ್​ ಎದುರಿಸಿ ವಿಕೆಟ್​ ಕೊಟ್ಟರು. ನಾಯಕ ಪ್ಯಾಟ್ ಕಮಿನ್ಸ್​ ಔಟ್​ ಸ್ವಿಂಗ್‌​ಗೆ ಬೌಂಡರಿ ಗಳಿಸುವ ಭರದಲ್ಲಿ ಮೂರನೇ ಸ್ಟಂಪ್​​ಗೆ ಕ್ಯಾಚ್​ ಕೊಟ್ಟರು. 129 ಬಾಲ್​ ಎದುರಿಸಿದ ರಹಾನೆ ಇನ್ನಿಂಗ್ಸ್‌ನಲ್ಲಿ 11 ಬೌಂಡರಿ ಮತ್ತು 1 ಸಿಕ್ಸ್​ ಸೇರಿತ್ತು.
ನಂತರ ಶಾರ್ದೂಲ್​ ಠಾಕೂರ್ ತಮ್ಮ​ ಇನ್ನಿಂಗ್ಸ್ ಅ​ನ್ನು ಬೌಲರ್​ಗಳ ಜೊತೆ ಸೇರಿ ಮುಂದುವರೆಸಿದರು. ಮೊದಲ ಅವಧಿಯ ಮುಕ್ತಾಯಕ್ಕೆ ಠಾಕೂರ್​ 36 ರನ್​ ಗಳಿಸಿದರು. ನಂತರ ಉಮೇಶ್​ ಯಾದವ್​ ಜೊತೆ ಸೇರಿ ಇನ್ನಿಂಗ್ಸ್​ ಕಟ್ಟಿದ ಅವರು ಅರ್ಧಶತಕ ದಾಖಲಿಸಿದರು. ಓವೆಲ್​ನಲ್ಲಿ ಠಾಕೂರ್​ ಗಳಿಸಿದ ಮೂರನೇ ಅರ್ಧಶತಕ ಮತ್ತು ವೈಯುಕ್ತಿಕ ಇದು ನಾಲ್ಕನೇಯದ್ದಾಗಿದೆ. 109 ಬಾಲ್​ನಲ್ಲಿ 6 ಬೌಂಡರಿಯ ಸಹಾಯದಿಂದ 51 ರನ್ ಗಳಿಸಿ ಶಾರ್ದೂಲ್ ವಿಕೆಟ್​ ಕೊಟ್ಟರು. ​

ನಂತರ ಬ್ಯಾಟಿಂಗ್ ಬಾಲಂಗೋಚಿಗಳಾದ ಯಾದವ್​ 5 ಮತ್ತು ಶಮಿ 13 ರನ್​ ಗಳಿಸಿದರು. ಅಂತಿಮವಾಗಿ ಭಾರತ ಆಸಿಸ್​ ವಿರುದ್ಧ ಮೊದಲ ಇನ್ನಿಂಗ್ಸ್​ನಲ್ಲಿ 296 ರನ್​ ಗಳಿಸಿತು. ಇದೇ ವೇಳೆ 173 ರನ್‌ಗಳ ಹಿನ್ನಡೆ ಅನುಭವಿಸಿತು.

ಭೋಜನ ವಿರಾಮದ ವೇಳೆಗೆ..: ಭಾರತ ಮತ್ತು ಆಸ್ಟ್ರೇಲಿಯಾ ತಂಡಗಳ ನಡುವೆ ನಡೆಯುತ್ತಿರುವ ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್‌ ಪಂದ್ಯದ 3ನೇ ದಿನದ ಮೊದಲ ಅವಧಿಯಲ್ಲಿ ಭಾರತ ತಾಳ್ಮೆಯ ಬ್ಯಾಟಿಂಗ್​ ಮಾಡಿತು. ರಹಾನೆ ಕ್ರೀಸ್‌ನಲ್ಲಿ ಭದ್ರವಾಗಿ ನೆಲೆಯೂರಿದ್ದು ಸೊಗಸಾದ ಅರ್ಧಶತಕ ಗಳಿಸಿದರು. ಈ ಮೂಲಕ ವಿಶ್ವ ಟೆಸ್ಟ್​ ಚಾಂಪಿಯನ್​ಶಿಪ್​ ಫೈನಲ್​ನಲ್ಲಿ ಅರ್ಧಶತಕ ಗಳಿಸಿದ ಭಾರತದ ಮೊದಲ ಬ್ಯಾಟರ್​ ಎಂಬ ದಾಖಲೆಯನ್ನೂ ಅವರು ರಚಿಸಿದರು.

ಮೊದಲ ಸೆಷನ್​ನಲ್ಲಿ ಭಾರತ 1 ವಿಕೆಟ್​ ಕಳೆದುಕೊಂಡು 109 ರನ್​ ಕಲೆಹಾಕಿತು. ಭೋಜನ ವಿರಾಮದ ವೇಳೆಗೆ ತಂಡವು 6 ವಿಕೆಟ್​ ನಷ್ಟಕ್ಕೆ 260 ರನ್ ಸಂಪಾದಿಸಿತು. ಅಜಿಂಕ್ಯಾ ರಹಾನೆ 122 ಬಾಲ್​ನಲ್ಲಿ 89 ರನ್​ ಗಳಿಸಿ ಶತಕದಿಂದ 11 ರನ್​ ದೂರದಲ್ಲಿದ್ದಾರೆ. ಶಾರ್ದೂಲ್​ ಠಾಕೂರ್​ 83 ಎಸೆತದಲ್ಲಿ 36 ರನ್​ ಗಳಿಸಿ ಕ್ರೀಸ್​ನಲ್ಲಿದ್ದಾರೆ.

ಎರಡನೇ ದಿನವಾದ ನಿನ್ನೆ ಭಾರತ, ಬೌಲಿಂಗ್​ನಲ್ಲಿ ಆಸಿಸ್​ನ 7 ವಿಕೆಟ್​ ಉರುಳಿಸಿ 469 ರನ್​ಗೆ ಆಲ್​ಔಟ್​ ಮಾಡಿತ್ತು. ನಂತರ ಮೊದಲ ಇನ್ನಿಂಗ್ಸ್​​ ಆರಂಭಿಸಿದ್ದ ಭಾರತ ಆರಂಭಿಕರಾದ ಶುಭಮನ್​ ಗಿಲ್​ (13), ರೋಹಿತ್​ ಶರ್ಮಾ (15), ವಿರಾಟ್​ ಕೊಹ್ಲಿ (14) ಮತ್ತು ಚೇತೇಶ್ವರ ಪೂಜಾರ (14) ಅವರ ವಿಕೆಟ್​ ಪತನದ ನಂತರ 71 ಕ್ಕೆ ನಾಲ್ಕು ವಿಕೆಟ್​ ಕಳೆದುಕೊಂಡಿತ್ತು. ಜಡೇಜಾ ಮತ್ತು ಅಜಿಂಕ್ಯಾ ರಹಾನೆ ಭಾರತಕ್ಕೆ ಆಸರೆಯಾದರು. ಈ ಜೋಡಿ 50+ ರನ್​ ಜೊತೆಯಾಟ ನೀಡಿತು. ಬಿರುಸಿನ ಬ್ಯಾಟಿಂಗ್ ಮಾಡಿದ ‘ಜಡ್ಡು’ 51 ಬಾಲ್​ನಲ್ಲಿ 48 ರನ್​ ಗಳಿಸಿ ಔಟಾದರು.

ಎರಡನೇ ದಿನದಾಟದ ಅಂತ್ಯಕ್ಕೆ ಭಾರತ 5 ವಿಕೆಟ್​ ಕಳೆದುಕೊಂಡು 151 ರನ್​ ಕಲೆಹಾಕಿತ್ತು. ಕ್ರೀಸ್​ನಲ್ಲಿ ವಿಕೆಟ್​ ಕೀಪರ್​ ಕೆ.ಎಸ್. ಭರತ್​ (5) ಮತ್ತು ಅಜಿಂಕ್ಯಾ ರಹಾನೆ (29) ಇದ್ದರು. ಇಂದು ಪಂದ್ಯ ಆರಂಭವಾಗುತ್ತಿದ್ದಂತೆ ತಂಡವು ಭರತ್​ ವಿಕೆಟ್​ ಕಳೆದುಕೊಂಡಿತು. ಮೊದಲ ಬಾಲ್​ ಎದುರಿಸಿದ ಭರತ್​ ಕ್ಲೀನ್​ ಔಟ್​ ಆದರು. ನಂತರ ಬಂದ ಬೌಲಿಂಗ್ ಆಲ್​ರೌಂಡರ್ ‘ಲಾರ್ಡ್‌’ ಖ್ಯಾತಿಯ​ ಶಾರ್ದೂಲ್​ ಠಾಕೂರ್​ ರಹಾನೆಗೆ ಸಾಥ್​ ನೀಡಿದರು.
5000 ರನ್​ ಪೂರೈಸಿದ ರಹಾನೆ: 70 ರನ್​ ಪೂರೈಸಿದ ಅಜಿಂಕ್ಯಾ ರೆಹಾನೆ ಟೆಸ್ಟ್​ ಕ್ರಿಕೆಟ್​ನಲ್ಲಿ 5000 ಗಡಿ ತಲುಪಿದರು. ಈ ಐದು ಸಾವಿರ ರನ್​ ಪೂರೈಸಿದ ಭಾರತದ 13ನೇ ಆಟಗಾರ ರಹಾನೆಯಾಗಿದ್ದಾರೆ.

ಶತಕದ ಜೊತೆಯಾಟ: ಶಾರ್ದೂಲ್​ ಠಾಕೂರ್​ ಮತ್ತು ಅಜಿಂಕ್ಯಾ ರಹಾನೆ 7ನೇ ವಿಕೆಟ್​ಗೆ 100 ರನ್​ ಜೊತೆಯಾಟವಾಡಿದರು. ಇದು ಇಂಗ್ಲೆಂಡ್‌ನಲ್ಲಿ ಭಾರತದ ಏಳನೇ ಅಥವಾ ಅದಕ್ಕಿಂತ ಕಡಿಮೆ ವಿಕೆಟ್‌ಗೆ ಆರನೇ ಶತಕದ ಜೊತೆಯಾಟವಾಗಿದೆ. ಅವುಗಳಲ್ಲಿ ಎರಡರಲ್ಲಿ ಶಾರ್ದೂಲ್ ಠಾಕೂರ್ ಭಾಗಿಯಾಗಿರುವ ಏಕೈಕ ಬ್ಯಾಟರ್​ ಆಗಿದ್ದಾರೆ. ಅವರು 2021 ರಲ್ಲಿ ಓವಲ್‌ನಲ್ಲಿ ಎರಡನೇ ಇನ್ನಿಂಗ್ಸ್‌ನಲ್ಲಿ ರಿಷಬ್ ಪಂತ್ ಅವರೊಂದಿಗೆ 100 ಜೊತೆಯಾಟ ಮಾಡಿದ್ದರು.

ಡಬ್ಲೂಟಿಸಿ ಫೈನಲ್​ನಲ್ಲಿ ಭಾರತೀಯನ ಮೊದಲ ಅರ್ಧಶತಕ: 18 ತಿಂಗಳ ನಂತರ ಮತ್ತೆ ಟೆಸ್ಟ್​ ಜರ್ಸಿ ತೊಟ್ಟಿರುವ ಅಜಿಂಕ್ಯಾ ರಹಾನೆ ತಮ್ಮ ಅನುಭವವನ್ನು ಓವಲ್​ನಲ್ಲಿ ಸಂಪೂರ್ಣವಾಗಿ ಬಳಸಿಕೊಂಡರು. ಆಸಿಸ್​ನ ವೇಗಿಗಳಿಗೆ ಸಮರ್ಥವಾಗಿ ಉತ್ತರ ಕೊಟ್ಟ ಭಾರತದ ಏಕೈಕ ಬ್ಯಾಟರ್​ ಆದರು. ರಹಾನೆ ಟೆಸ್ಟ್​ ಕ್ರಿಕೆಟ್​ನ 26 ನೇ ಅರ್ಧಶತಕ ದಾಖಲಿಸಿದರು. ವಿಶ್ವ ಟೆಸ್ಟ್​ ಚಾಂಪಿಯನ್​ಶಿಪ್​ ಫೈನಲ್​ನಲ್ಲಿ ಭಾರತದ ಪರ ಅರ್ಧಶತಕ ಗಳಿಸಿದ ಮೊದಲ ಬ್ಯಾಟರ್​ ಎಂಬ ಖ್ಯಾತಿಗೂ ಭಾಜನರಾದರು