ನಗೋಯಾ: ಜಪಾನ್‌ನ ಒಕಜಾಕಿಯಲ್ಲಿ ನಡೆದ ಏಷ್ಯನ್ ಕ್ರೀಡಾಕೂಟದಲ್ಲಿ, ಭಾರತದ 17 ವರ್ಷದ ಬಿಲ್ಲುಗಾರ್ತಿ ಕುಂಕುಮ್ ಮೊಹೋದ್ (Kumkum Mohod) ಅವರು ಮಹಿಳೆಯರ ವೈಯಕ್ತಿಕ ರಿಕರ್ವ್ ವಿಭಾಗದಲ್ಲಿ (Recurve Individual) ಚಿನ್ನದ ಪದಕ ಗೆಲ್ಲುವ ಮೂಲಕ ಇತಿಹಾಸ ನಿರ್ಮಿಸಿದರು.

ಈ ವಿಭಾಗದಲ್ಲಿ ಭಾರತದ ಮೊದಲ ಚಾಂಪಿಯನ್ ಎಂಬ ಹೆಗ್ಗಳಿಕೆಗೂ ಅವರು ಪಾತ್ರರಾಗಿದ್ದಾರೆ. ಐದು ಸೆಟ್‌ಗಳ ಪಂದ್ಯವು 5-5 ಸಮಬಲದಲ್ಲಿ ಅಂತ್ಯಗೊಂಡ ನಂತರ, ‘ಶೂಟ್-ಆಫ್’ನಲ್ಲಿ (ಒಂದೇ ಬಾಣದ ನಿರ್ಣಾಯಕ ಸುತ್ತು) ದಕ್ಷಿಣ ಕೊರಿಯಾದ ಯೆಜಿನ್ ಓ ಅವರನ್ನು 6-5 ಅಂತರದಿಂದ ಸೋಲಿಸಿ ಮೊಹೋದ್‌ ಜಯಗಳಿಸಿದರು. 

ಏಷ್ಯನ್ ಗೇಮ್ಸ್‌ನ ಚಿನ್ನದ ಪದಕಕ್ಕಾಗಿ ನಡೆದ ನಿರ್ಣಾಯಕ ಹಣಾಹಣಿಯಲ್ಲಿ (ಶೂಟ್-ಆಫ್), ಎದುರಾಳಿ ‘ಓ’ (Oh) ಅವರು 8 ಅಂಕಗಳನ್ನು ಗಳಿಸಿದರು. ಇದಕ್ಕೆ ಪ್ರತಿಯಾಗಿ ಭಾರತದ ಮೊಹೋದ್ ಅವರು ಅತ್ಯಂತ ಸಂಯಮದಿಂದ 10 ಅಂಕಗಳನ್ನು ಗಳಿಸುವ ಮೂಲಕ ಪ್ರಶಸ್ತಿಯನ್ನು ಮುಡಿಗೇರಿಸಿಕೊಂಡರು. ಭಾರತೀಯ ಬಿಲ್ಲುಗಾರಿಕೆಗೆ ಐತಿಹಾಸಿಕ ಗೆಲುವನ್ನು ತಂದುಕೊಟ್ಟರು.

ಈಗಾಗಲೇ 77 ಪದಕಗಳನ್ನು ಗೆದ್ದಿರುವ ಭಾರತೀಯ ತಂಡವು, ಶನಿವಾರ ನಡೆಯಲಿರುವ ಕ್ರೀಡಾಕೂಟದ ಅಂತಿಮ ದಿನದಂದು ಅತ್ಯುತ್ತಮ ಸಾಧನೆಯೊಂದಿಗೆ ಅಭಿಯಾನವನ್ನು ಮುಕ್ತಾಯಗೊಳಿಸುವ ಗುರಿ ಹೊಂದಿದೆ.

ಗಾಲ್ಫ್‌ನಲ್ಲಿ ಪ್ರಣವಿ ಉರ್ಸ್ ಐತಿಹಾಸಿಕ ಚಿನ್ನದ ಪದಕದತ್ತ ದಾಪುಗಾಲು ಹಾಕುತ್ತಿದ್ದರೆ, ಭಾರತ ಮತ್ತು ಪಾಕಿಸ್ತಾನ ನಡುವಿನ ಪುರುಷರ ಕ್ರಿಕೆಟ್ ಫೈನಲ್ ಹಾಗೂ ಮಲೇಷ್ಯಾ ವಿರುದ್ಧ ಪುರುಷರ ಹಾಕಿ ತಂಡ ಆಡಲಿರುವ ಚಿನ್ನದ ಪದಕದ ನಿರ್ಣಾಯಕ ಪಂದ್ಯದತ್ತ ಎಲ್ಲರ ಕಣ್ಣು ನೆಟ್ಟಿದೆ.

ಪ್ರಸ್ತುತ ಪದಕ ಪಟ್ಟಿಯಲ್ಲಿ 5ನೇ ಸ್ಥಾನದಲ್ಲಿರುವ ಭಾರತ, ಕ್ರೀಡಾಕೂಟದ ಈ ಅಂತಿಮ ಹಂತದಲ್ಲಿ ಅಗ್ರ ನಾಲ್ಕು ಸ್ಥಾನಗಳೊಳಗೆ ಪ್ರವೇಶಿಸಲು ಭಾರಿ ಪ್ರಯತ್ನ ನಡೆಸಲಿದೆ.