ಮಂಗಳೂರು: ದಕ್ಷಿಣ ರೈಲ್ವೆಯು ಮಂಗಳೂರು ಸೆಂಟ್ರಲ್-ಮಡ್ಗಾಂವ್ ವಂದೇ ಭಾರತ್ ಎಕ್ಸ್‌ಪ್ರೆಸ್‌ನ ಪ್ರಾಯೋಗಿಕ ಓಡಾಟವನ್ನು ಇಂದು (ಡಿಸೆಂಬರ್ 26 ರಂದು) ನಡೆಸಿದೆ.

ಪ್ರಾಯೋಗಿಕ ಚಾಲನೆಯಲ್ಲಿರುವ ರೈಲು ಮಂಗಳೂರು ಸೆಂಟ್ರಲ್‌ನಿಂದ ಬೆಳಿಗ್ಗೆ 8.30 ಕ್ಕೆ ಹೊರಡಲಿದ್ದು, ಹಿಂದಿರುಗುವ ಪ್ರಯಾಣದಲ್ಲಿ ಅದು ಮಧ್ಯಾಹ್ನ 1.45 ಕ್ಕೆ ಮಡಗಾಂವ್‌ನಿಂದ ಮಂಗಳೂರಿಗೆ ಹಿಂತಿರುಗಲಿದೆ.

ಇಂದು ನಡೆಸಿದ ಪರೀಕ್ಷೆಯು ಯಶಸ್ವಿಯಾಗಿದ್ದು ಉಡುಪಿಗೆ 9.50ಕ್ಕೆ ತಲುಪಿದೆ ಹಾಗೂ ಕುಂದಾಪುರ ನಿಲ್ದಾಣವನ್ನು 10.05ಕ್ಕೆ ದಾಟಿದೆ.

ಡಿಸೆಂಬರ್ 30 ರಂದು ಪ್ರಧಾನಿ ನರೇಂದ್ರ ಮೋದಿ ಅವರು ಐದು ಇತರ ರೈಲುಗಳೊಂದಿಗೆ ವರ್ಚುವಲ್ ಮೂಲಕ ನಿಯಮಿತ ಸೇವೆಗೆ ಚಾಲನೆ ನೀಡುವ ನಿರೀಕ್ಷೆಯಿದೆ.

ರೈಲ್ವೆಯಿಂದ ಇನ್ನೂ ದೃಢೀಕರಿಸಲ್ಪಡದ ತಾತ್ಕಾಲಿಕ ವೇಳಾಪಟ್ಟಿಯ ಪ್ರಕಾರ, ಸಾಮಾನ್ಯ ಸೇವೆಯು ಮಂಗಳೂರು ಸೆಂಟ್ರಲ್‌ನಿಂದ ಬೆಳಿಗ್ಗೆ 8.30 ಕ್ಕೆ ಹೊರಟು ಮಧ್ಯಾಹ್ನ 1.05 ಕ್ಕೆ ಮಡಗಾಂವ್ ತಲುಪಲಿದೆ. ಸುಮಾರು 320 ಕಿಮೀ ದೂರದ ಪ್ರಯಾಣದಲ್ಲಿ ಉಡುಪಿ ಮತ್ತು ಕಾರವಾರದಲ್ಲಿ ವಾಣಿಜ್ಯ ನಿಲುಗಡೆಗಳನ್ನು ಹೊಂದಿದೆ.

ಹಿಂದಿರುಗುವ ಪ್ರಯಾಣದಲ್ಲಿ, ವಂದೇ ಭಾರತ್ ಎಕ್ಸ್‌ಪ್ರೆಸ್ ಮಡಗಾಂವ್‌ನಿಂದ ಸಂಜೆ 6.10 ಕ್ಕೆ ಹೊರಡುತ್ತದೆ ಮತ್ತು ರಾತ್ರಿ 10.45ಕ್ಕೆ ಮಂಗಳೂರು ಸೆಂಟ್ರಲ್ ತಲುಪುತ್ತದೆ.