ಸ್ಯಾನ್ ಫ್ರಾನ್ಸಿಸ್ಕೋ (ಅಮೆರಿಕ) : ಸುಮಾರು 36 ವರ್ಷಗಳ ಹಿಂದೆ ಮತ್ತೊಬ್ಬ ಸಾಫ್ಟವೇರ್​ ಎಂಜಿನಿಯರ್​ ಜೊತೆಗೂಡಿ ಪವರ್ ಪಾಯಿಂಟ್ ಸಾಫ್ಟ್ ವೇರ್ ಅನ್ನು ರಚಿಸಿದ್ದ ಡೆನ್ನಿಸ್ ಆಸ್ಟಿನ್ ಅವರು ಅಮೆರಿಕದಲ್ಲಿ ನಿಧನರಾಗಿದ್ದಾರೆ.ಎಂಎಸ್​ ಪವರ್​ ಪಾಯಿಂಟ್​ ಸಾಫ್ಟ್​ವೇರ್ ತಯಾರಿಸಿದ ಡೆನ್ನಿಸ್ ಆಸ್ಟಿನ್ 76ನೇ ವಯಸ್ಸಿನಲ್ಲಿ ಅಮೆರಿಕದಲ್ಲಿ ನಿಧನರಾಗಿದ್ದಾರೆ. 76 ವರ್ಷದ ಆಸ್ಟಿನ್ ಶ್ವಾಸಕೋಶದ ಕ್ಯಾನ್ಸರ್​ನಿಂದ ಬಳಲುತ್ತಿದ್ದರು ಎಂದು ಅಂತಾರಾಷ್ಟ್ರೀಯ ಮಾಧ್ಯಮಗಳು ವರದಿ ಮಾಡಿವೆ.

1993 ರ ಹೊತ್ತಿಗೆ ಪವರ್​ ಪಾಯಿಂಟ್​ $ 100 ಮಿಲಿಯನ್ ಡಾಲರ್​ಗಿಂತ ಹೆಚ್ಚು ಆದಾಯ ಗಳಿಸುವ ಕಂಪನಿಯಾಗಿತ್ತು. ನಂತರ ಮೈಕ್ರೊಸಾಫ್ಟ್​ ಪವರ್ ಪಾಯಿಂಟ್​ ಅನ್ನು ತನ್ನ ಎಂಎಸ್​​ ವರ್ಡ್​ ಸೇರಿದಂತೆ ಆಫೀಸ್​ ಉತ್ಪನ್ನಗಳ ಸೂಟ್ ನಲ್ಲಿ ಸಂಯೋಜಿಸಿತು. ಆಸ್ಟಿನ್ ಅವರು 1985 ರಿಂದ 1996 ರವರೆಗೆ ಪವರ್​ ಪಾಯಿಂಟ್​ನ ಮೂಲ ಡೆವಲಪರ್ ಆಗಿ ಸೇವೆ ಸಲ್ಲಿಸಿ ನಿವೃತ್ತರಾಗಿದ್ದರು.

ಆಸ್ಟಿನ್ ಮೇ 28, 1947 ರಂದು ಪಿಟ್ಸ್ ಬರ್ಗ್ ನಲ್ಲಿ ಜನಿಸಿದರು. ಅವರು ವರ್ಜೀನಿಯಾ ವಿಶ್ವವಿದ್ಯಾಲಯದಲ್ಲಿ ಎಂಜಿನಿಯರಿಂಗ್ ಅಧ್ಯಯನ ಮಾಡಿದರು. 1984 ರಲ್ಲಿ ಬ್ಯಾಟರಿ ಚಾಲಿತ ಲ್ಯಾಪ್​ಟಾಪ್​ಗಳ ಬಗ್ಗೆ ಕೆಲಸ ಮಾಡುವ ಸ್ಟಾರ್ಟ್ ಅಪ್ ನಿಂದ ವಜಾಗೊಳಿಸಲ್ಪಟ್ಟ ನಂತರ, ಆಸ್ಟಿನ್ ಅವರನ್ನು ಫೋರ್ ಥಾಟ್ ನೇಮಿಸಿಕೊಂಡಿತು. ಫೋರ್​ ಥಾಟ್​ ಇಬ್ಬರು ಮಾಜಿ ಆಯಪಲ್ ಉದ್ಯೋಗಿಗಳು ಸ್ಥಾಪಿಸಿದ್ದರು.1987 ರಲ್ಲಿ ಫೋರ್​ಥಾಟ್​ ಹೆಸರಿನ ಸಾಫ್ಟ್​ವೇರ್ ಸಂಸ್ಥೆ ಬಿಡುಗಡೆ ಮಾಡಿದ್ದ ಪವರ್ ಪಾಯಿಂಟ್​ ಸಾಫ್ಟ್​ವೇರ್​ ಓವರ್​ ಹೆಡ್​ ಪ್ರೊಜೆಕ್ಟರ್​ಗಳಿಗೆ ಪರ್ಯಾಯವಾಗಿ ಸ್ಥಾನ ಗಳಿಸಿತ್ತು. ಸ್ಲೈಡ್​ಗಳನ್ನು ತಯಾರಿಸುವ ಕ್ಲಿಷ್ಟಕರವಾದ ಕ್ರಿಯೆಯನ್ನು ಇದು ಕಡಿಮೆ ಮಾಡಿತ್ತು. ಕಂಪನಿಯು 1987 ರಲ್ಲಿ ಪವರ್​ ಪಾಯಿಂಟ್​ ಸಾಫ್ಟ್​ವೇರ್ ಅನ್ನು ಬಿಡುಗಡೆ ಮಾಡಿತ್ತು. ಇದಾಗಿ ಕೆಲ ತಿಂಗಳುಗಳ ನಂತರ ಮೈಕ್ರೋಸಾಫ್ಟ್ ಕಂಪನಿಯನ್ನು $ 14 ಮಿಲಿಯನ್​ಗೆ ಖರೀದಿಸಿತ್ತು.

MS PowerPoint ಎಂಬುದು Microsoft Office ಸೂಟ್ ನಲ್ಲಿ ಸೇರಿಸಲಾದ ಒಂದು ಪ್ರೋಗ್ರಾಂ ಆಗಿದೆ. ವೈಯಕ್ತಿಕ ಮತ್ತು ವೃತ್ತಿಪರ ಉದ್ದೇಶಗಳಿಗಾಗಿ ಪ್ರಸೆಂಟೇಶನ್​ಗಳನ್ನು ತಯಾರಿಸಲು ಬಳಸಲಾಗುತ್ತದೆ. ಪವರ್​ ಪಾಯಿಂಟ್ (ಪಿಪಿಟಿ) ಇದು ಶಕ್ತಿಯುತವಾದ, ಬಳಸಲು ಸುಲಭವಾದ ಪ್ರಸೆಂಟೇಶನ್ ಗ್ರಾಫಿಕ್ಸ್ ಸಾಫ್ಟ್​ವೇರ್ ಪ್ರೋಗ್ರಾಂ ಆಗಿದ್ದು, ಇದು ವೃತ್ತಿಪರವಾಗಿ ಕಾಣುವ ಎಲೆಕ್ಟ್ರಾನಿಕ್ ಸ್ಲೈಡ್ ಶೋಗಳನ್ನು ರಚಿಸಲು ಸಹಾಯ ಮಾಡುತ್ತದೆ.ಮೈಕ್ರೋಸಾಫ್ಟ್ ಪವರ್​ ಪಾಯಿಂಟ್​ ಅನ್ನು ಸ್ವಾಧೀನಪಡಿಸಿಕೊಂಡ ನಂತರವೂ ಆಸ್ಟಿನ್ ಪವರ್​ ಪಾಯಿಂಟ್​ ಸಾಫ್ಟ್​ವೇರ್ ಅಭಿವೃದ್ಧಿಪಡಿಸುವುದನ್ನು ಮುಂದುವರೆಸಿದ್ದರು. ಅವರು 1996 ರಲ್ಲಿ ನಿವೃತ್ತರಾದರು. ವರದಿಯ ಪ್ರಕಾರ, ಈಗ ದಿನಕ್ಕೆ ಪವರ್​ ಪಾಯಿಂಟ್​ ಬಳಸಿ 30 ದಶಲಕ್ಷಕ್ಕೂ ಹೆಚ್ಚು ಪ್ರಸೆಂಟೇಶನ್​ಗಳನ್ನು ಜಗತ್ತಿನಲ್ಲಿ ರಚಿಸಲಾಗುತ್ತಿದೆ.