ಬೆಂಗಳೂರು: ಭೂಮಿಯ ಗುರುತ್ವಾಕರ್ಷಣೆಯು ಹಿಂದೂ ಮಹಾಸಾಗರದ ಮಧ್ಯದಲ್ಲೆಲ್ಲೋ ದುರ್ಬಲವಾಗಿದೆ. ಇದಕ್ಕೆ ಕಾರಣ ಇಲ್ಲಿ ಇರುವ ದೈತ್ಯ ” ಗುರುತ್ವಾಕರ್ಷಣ ರಂಧ್ರ” . ಭಾರತೀಯ ವಿಜ್ಞಾನಿಗಳ ತಂಡವು ಹಿಂದೂ ಮಹಾಸಾಗರದಲ್ಲಿ ಮೂರು ಮಿಲಿಯನ್ ಚದರ ಕಿಲೋಮೀಟರ್‌ಗಿಂತಲೂ ಹೆಚ್ಚು ವ್ಯಾಪ್ತಿಯಲ್ಲಿರುವ ದೈತ್ಯ “ಗುರುತ್ವಾಕರ್ಷಣೆಯ ರಂಧ್ರ” ಕ್ಕೆ ಕಾರಣವೇನು ಎಂದು ಗುರುತಿಸಿದೆ.
ಇಂಡಿಯನ್ ಓಷನ್ ಜಿಯೋಯ್ಡ್ ಲೋ (IOGL) ಎಂದು ಕರೆಯಲ್ಪಡುವ ಈ ಗುರುತ್ವಾಕರ್ಷಣೆಯ ರಂಧ್ರವು ಭೂಮಿಯ ಪ್ರಮುಖ ಗುರುತ್ವಾಕರ್ಷಣೆಯ ಅಸಂಗತತೆಯಾಗಿದೆ. ಇಲ್ಲಿ ಗುರುತ್ವಾಕರ್ಷಣೆಯು ಸರಾಸರಿಗಿಂತ ಕಡಿಮೆಯಾಗಿದೆ, ಹೀಗಾಗಿ ಸಮುದ್ರ ಮಟ್ಟವು ಜಾಗತಿಕ ಸರಾಸರಿಗಿಂತ 106 ಮೀಟರ್ ಗಳಷ್ಟು ಕಡಿಮೆಯಾಗಿದೆ.
ಇಲ್ಲಿ ಉಲ್ಲೇಖಿಸಲಾದ ರಂಧ್ರವು ನೀರು ಬರಿದಾಗುವ ವಿಶಿಷ್ಟ ರಂಧ್ರವಲ್ಲ. ಬದಲಾಗಿ, ಆ ಸ್ಥಳದ ಅಡಿಯಲ್ಲಿ ಕಡಿಮೆ ದ್ರವ್ಯರಾಶಿ ಇದೆ ಎಂದು ಭೂವಿಜ್ಞಾನಿಗಳು ಹೇಳುತ್ತಾರೆ, ಇದರಿಂದಾಗಿ ಗುರುತ್ವಾಕರ್ಷಣೆಯು ಗ್ರಹದ ಇತರ ಸ್ಥಳಗಳಿಗಿಂತ ದುರ್ಬಲವಾಗಿರುತ್ತದೆ.
ಜಿಯೋಫಿಸಿಕಲ್ ರಿಸರ್ಚ್ ಲೆಟರ್ಸ್‌ನಲ್ಲಿ ಪ್ರಕಟವಾದ ಅಧ್ಯಯನವು ಐಒಜಿಎಲ್ ಹಿಂದೂ ಮಹಾಸಾಗರದ ಕೆಳಗಿರುವ ಭೂಮಿಯ ಮ್ಯಾಂಟಲ್ ನೊಳಗಿನ ದ್ರವ್ಯರಾಶಿಯ ಕೊರತೆಯ ಪರಿಣಾಮವಾಗಿದೆ ಎಂದು ತೋರಿಸಿದೆ.
ಬೆಂಗಳೂರಿನ ಭಾರತೀಯ ವಿಜ್ಞಾನ ಸಂಸ್ಥೆಯ (IISc) ವಿಜ್ಞಾನಿಗಳು ಕಳೆದ 140 ಮಿಲಿಯನ್ ವರ್ಷಗಳ ಪ್ಲೇಟ್ ಟೆಕ್ಟೋನಿಕ್ ಚಲನೆಯನ್ನು ಪುನರ್ನಿರ್ಮಿಸಿದ್ದರು ಮತ್ತು ಗುರುತ್ವಾಕರ್ಷಣೆಯ ರಂಧ್ರದ ಮೂಲವನ್ನು ಪತ್ತೆಹಚ್ಚಲು ಕಂಪ್ಯೂಟರ್ ಸಿಮ್ಯುಲೇಶನ್‌ಗಳನ್ನು ನಡೆಸಿದ್ದರು.
ಟೆಕ್ಟೋನಿಕ್ ಪ್ಲೇಟ್‌ಗಳ (ಭೂ ತಟ್ಟೆ) ಕೆಲವು ವಿಭಾಗಗಳು ಆಫ್ರಿಕಾದ ಕೆಳಗಿರುವ ಮ್ಯಾಂಟಲ್ ಮೂಲಕ ಮುಳುಗಿ, ಹಿಂದೂ ಮಹಾಸಾಗರದ ಅಡಿಯಲ್ಲಿ ಪ್ಲೂಮ್‌ಗಳನ್ನು ಉತ್ಪಾದಿಸುತ್ತವೆ ಎಂದು ಅವರು ಕಂಡುಕೊಂಡಿದ್ದಾರೆ.
ಈ ಪ್ಲೂಮ್‌ಗಳು, ಜಿಯೋಯ್ಡ್ ಕಡಿಮೆಯ ಸಮೀಪ ಪ್ರದೇಶದಲ್ಲಿರುವ ಮ್ಯಾಂಟಲ್ ನ ರಚನೆಯೊಂದಿಗೆ, ಈ ನಕಾರಾತ್ಮಕ ಜಿಯೋಯ್ಡ್ ಅಸಂಗತತೆಯ ರಚನೆಗೆ ಕಾರಣವಾಗಿವೆ. ಹಿಂದೂ ಮಹಾಸಾಗರದ ಕೆಳಗಿರುವ ಈ ಪ್ರಕ್ರಿಯೆಗಳ ಪರಸ್ಪರ ಕ್ರಿಯೆಯು ಐಒಜಿಎಲ್ ನ ಸ್ಥಾನ ಮತ್ತು ಆಕಾರವನ್ನು ನಿರ್ಧರಿಸಿರಬಹುದು ಎಂದು ಪ್ರಮುಖ ಲೇಖಕರಾದ ದೇಬಂಜನ್ ಪಾಲ್ ಮತ್ತು ಅತ್ರೇಯೀ ಘೋಷ್ ತಮ್ಮ ಅಧ್ಯಯನದಲ್ಲಿ ವಿವರಿಸಿದ್ದಾರೆ.
ವಿಜ್ಞಾನಿಗಳ ಪ್ರಕಾರ, ಐಒಜಿಎಲ್ ಅದರ ಪ್ರಸ್ತುತ ಆಕಾರವನ್ನು ಸುಮಾರು 20 ಮಿಲಿಯನ್ ವರ್ಷಗಳ ಹಿಂದೆ (ಅಂದರೆ ಯಾವಾಗ ಪ್ಲೂಮ್‌ಗಳು ಮೇಲಿನ ಮ್ಯಾಂಟಲ್ ನೊಂದಿಗೆ ಹರಡಲು ಪ್ರಾರಂಭಿಸಿದವೋ ಆವಾಗ) ಪಡೆದವು. ಮತ್ತು ಮ್ಯಾಂಟಲ್ ವಸ್ತು ಹರಿಯುವವರೆಗೂ ಇದು ಬಹುಶಃ ಇರುತ್ತದೆ. ತಾಪಮಾನದ ವೈಪರೀತ್ಯಗಳು ಈ ಕಡಿಮೆ ಜಿಯಾಯ್ಡ್ ಅನ್ನು ಇಂದಿನ ಸ್ಥಳದಿಂದ ಬದಲಾಯಿಸಿದಾಗ, ಜಿಯಾಯ್ಡ್ ಅಸಂಗತತೆ ಚದುರಲು ಪ್ರಾರಂಭವಾಗುತ್ತದೆ ಎಂದು ಪಾಲ್, ಸೈಂಟಿಫಿಕ್ ಅಮೇರಿಕನ್‌ಗೆ ತಿಳಿಸಿದ್ದಾರೆ.
