ಬ್ರಹ್ಮಾವರ: ಜೈ ಗಣೇಶ್ ಕ್ರೆಡಿಟ್ ಸೌಹಾರ್ದ ಸಹಕಾರಿ ಸೈಬರಕಟ್ಟೆ ಶಿರಿಯಾರ ಇದರ ಗೋಗ್ರಾಸ ವಿತರಣೆ ಕಾರ್ಯಕ್ರಮವು ನ.9 ರಂದು ನಂಚಾರಿನ ಕಾಮಧೇನು ಗೋಶಾಲಾ ಮಹಾಸಂಘ ಟ್ರಸ್ಟ್ ನಲ್ಲಿ ನಡೆಯಿತು.
ಜೈಗಣೇಶ್ ಸೌಹಾರ್ದ ಸಹಕಾರಿಯ ಅಧ್ಯಕ್ಷ ಅಶೋಕ್ ಪ್ರಭು ಸೈಬರಕಟ್ಟೆ ಅಧ್ಯಕ್ಷತೆ ವಹಿಸಿದ್ದರು.
ಕಾರ್ಯಕ್ರಮದಲ್ಲಿ ಜೈ ಗಣೇಶ್ ಸೌಹಾರ್ದ ಸಹಕಾರಿಯ ಸುಮಾರು 3 ವರ್ಷದ ಅವಧಿಯಿಂದ ಕ್ರೋಢೀಕೃತ ಗೋರಕ್ಷಾ ನಿಧಿ ರೂ 1ಲಕ್ಷ 30ಸಾವಿರದಿಂದ 33 ಸಾವಿರ ಮೌಲ್ಯದ ಒಣ ಹುಲ್ಲನ್ನು ಗೋಶಾಲೆಗೆ ಹಸ್ತಾಂತರಿಸಿದರು. ಉಳಿದ ಮೊತ್ತವನ್ನು ಈಗಾಗಲೇ ನಿಶ್ಚಯಿಸಿದಂತೆ 2 ಗೋ ಶಾಲೆ ಗಳಿಗೆ ನೀಡುವುದಾಗಿ ತಿಳಿಸಿದರು.

ಈ ಸಂದರ್ಭದಲ್ಲಿ ಮಾತನಾಡಿದ ಸಂಸ್ಥೆಯ ಅಧ್ಯಕ್ಷ, ಅಶೋಕ್ ಪ್ರಭು, ಜೈಗಣೇಶ್ ಸಂಸ್ಥೆ ತನ್ನ ನಿವ್ವಳ ಲಾಭದಲ್ಲಿ ಶೇ 1.00% ಗೋರಕ್ಷಾ ನಿಧಿಯಾಗಿ ಗೋವುಗಳ ಪಾಲನೆ ಪೋಷಣೆಗೆ ಮೀಸಲಿಡುತ್ತಿದ್ದು,ಇತರ ಸಂಘ ಸಂಸ್ಥೆಗಳು ಇದೇ ಮಾದರಿಯಲ್ಲಿ ಗೋವುಗಳ ರಕ್ಷಣೆಗೆ ಮುಂದಾಗಬೇಕು ಎಂದು ಕರೆ ನೀಡಿದರು.

ಮುಂದಿನ ದಿನಗಳಲ್ಲಿ ವರ್ಷದ ಲಾಭಾಂಶದಲ್ಲಿ 2% ಗೋ ಸೇವಾ ಕಾರ್ಯಕ್ಕೆ ಮೀಸಲಿಡುವುದಾಗಿ ನಿಶ್ಚಯಿಸಲಾಯಿತು.

ಕಾರ್ಯಕ್ರಮದಲ್ಲಿ ಸಂಸ್ಥೆಯ ಉಪಾಧ್ಯಕ್ಷ ಹೆಚ್.ನಾರಾಯಣ ಶೆಣೈ ಗಾವಳಿ, ನಿರ್ದೇಶಕ ಮಾಧವ ಹೆಗ್ಡೆ ಮಧುವನ, ಜಗದೀಶ ಹೆಗ್ಡೆ ಸೈಬರಕಟ್ಟೆ, ಎಂ.ರವೀಂದ್ರನಾಥ ಕಿಣಿ ಸೈಬರಕಟ್ಟೆ, ಕಾರ್ಯದರ್ಶಿ ಶಿವಾನಂದ ಶ್ಯಾನುಭೋಗ್ ಎತ್ತಿನಟ್ಟಿ ಉಪಸ್ಥಿತರಿದ್ದರು.

ಟ್ರಸ್ಟ್ ನ ಅಧ್ಯಕ್ಷ ರಾಜೇಂದ್ರ ಚಕ್ಕೇರ ಮತ್ತು ಕೋಶಾಧಿಕಾರಿ ಕೋಟ ರಾಮಕೃಷ್ಣ ಆಚಾರ್ ಕೊಡುಗೆಯನ್ನು ಸ್ವೀಕರಿಸಿ ವಂದಿಸಿದರು.