ನ್ಯೂಯಾರ್ಕ್: ಈ ವಾರ ಸೂರ್ಯನ ಹೊಸ ಉಪಗ್ರಹ ಚಿತ್ರವನ್ನು ಅಮೇರಿಕಾದ ಬಾಹ್ಯಾಕಾಶ ಸಂಸ್ಥೆ ನಾಸಾ ಬಿಡುಗಡೆ ಮಾಡಿದೆ. ಈ ಚಿತ್ರದಲ್ಲಿ ನಮ್ಮ ಸೂರ್ಯನು ನಗುತ್ತಿರುವಂತೆ ಭಾಸವಾಗುತ್ತಿದೆ!
ನಾಸಾದ ಸೋಲಾರ್ ಡೈನಾಮಿಕ್ಸ್ ಅಬ್ಸರ್ವೇಟರಿಯಿಂದ ಫೋಟೋವನ್ನು ಸೆರೆಹಿಡಿಯಲಾಗಿದೆ. ಅಬ್ಸರ್ವೇಟರಿಯು ಸೂರ್ಯನ ವಿಕಿರಣದ ಉತ್ಪಾದನೆಯಲ್ಲಿನ ಬದಲಾವಣೆಗಳನ್ನು ಅರ್ಥಮಾಡಿಕೊಳ್ಳಲು ಕೆಲಸ ಮಾಡುತ್ತದೆ.
“ನೇರಳಾತೀತ ಬೆಳಕಿನಲ್ಲಿ ನೋಡಿದರೆ, ಸೂರ್ಯನ ಮೇಲಿನ ಕಾಣುವ ಈ ಕಪ್ಪು ಪ್ರದೇಶಗಳನ್ನು ಕರೋನಲ್ ರಂಧ್ರಗಳು ಎಂದು ಕರೆಯಲಾಗುತ್ತದೆ ಮತ್ತು ಅವು ವೇಗದ ಸೌರ ಮಾರುತವು ಬಾಹ್ಯಾಕಾಶಕ್ಕೆ ಚಿಮ್ಮುವ ಪ್ರದೇಶಗಳಾಗಿವೆ” ಎಂದು ನಾಸಾ ಹೇಳಿದೆ.
ಸೂರ್ಯನ ಹೊರ ಪದರವನ್ನು “ಕರೋನಾ” ಎಂದು ಕರೆಯಲಾಗುತ್ತದೆ ಮತ್ತು ಉಪಗ್ರಹ ಚಿತ್ರಗಳಲ್ಲಿ ಕಂಡುಬರುವ ಗಾಢವಾದ ಪ್ರದೇಶಗಳು ಕರೋನಲ್ ರಂಧ್ರಗಳಾಗಿವೆ. ಇವು ಅಂತರಗ್ರಹ ಬಾಹ್ಯಾಕಾಶಕ್ಕೆ ತೆರೆದಿರುವ ಸೂರ್ಯನ ಮೇಲಿನ ಕಾಂತೀಯ ಕ್ಷೇತ್ರದ ಪ್ರದೇಶಗಳಾಗಿವೆ. ಇವುಗಳು ಕಪ್ಪು ಕಲೆಗಳಾಗಿ ಕಾಣಿಸಿಕೊಳ್ಳುತ್ತವೆ ಏಕೆಂದರೆ ಇವುಗಳು ಸಾಮಾನ್ಯವಾಗಿ ತಮ್ಮ ಸುತ್ತಮುತ್ತಲಿನ ಪ್ರದೇಶಗಳಿಗಿಂತ ಕಡಿಮೆ ತಾಪಮಾನ ಮತ್ತು ಸಾಂದ್ರತೆಯನ್ನು ಹೊಂದಿರುತ್ತವೆ. ಕರೋನಲ್ ರಂಧ್ರಗಳು ಯಾವುದೇ ಸಮಯದಲ್ಲಿ ಸಂಭವಿಸಬಹುದು ಆದರೆ ಬರಿಗಣ್ಣಿನಿಂದ ಇವುಗಳನ್ನು ನೋಡಲಾಗುವುದಿಲ್ಲ.
ಪಕೃತಿಯಲ್ಲಿ ಎಂತೆತಹ ವೈಶಿಷ್ಟ್ಯಗಳು ಅಡಗಿವೆ ಎಂದು ಬಲ್ಲವರು ಯಾರೂ ಇಲ್ಲ. ಸೂರ್ಯನ ಈ ಚಿತ್ರವು ಪುಟ್ಟಮಗುವೊಂದು ಕಿಲಕಿಲ ನಕ್ಕರೆ ಆ ನಗು ಹೇಗೆ ಆಹ್ಲಾದಕರವಾಗಿರುತ್ತೋ ಹಾಗಿದೆ! ಸೂರ್ಯನ ಈ ಚಿತ್ರವನ್ನು ಮತ್ತೆ ಮತ್ತೆ ನೋಡಬೇಕೆನಿಸುವಂತೆ ಮಾಡುತ್ತಿದೆ.
