ನವದೆಹಲಿ: ಕನ್ನಡಿಗ ನಟ ರಾಕಿಂಗ್ ಸ್ಟಾರ್ ಯಶ್, ರಣಬೀರ್ ಕಪೂರ್ ಹಾಗೂ ಸಾಯಿ ಪಲ್ಲವಿ ಅಭಿನಯದ ಬಹುನಿರೀಕ್ಷಿತ ‘ರಾಮಾಯಣ ಪಾರ್ಟ್-1’ (Ramayana Part 1) ಬಾಕ್ಸ್ ಆಫೀಸ್ನಲ್ಲಿ ಭರ್ಜರಿ ಸದ್ದು ಮಾಡುತ್ತಿದೆ. ಬಿಡುಗಡೆಯಾಗಿ ಕೇವಲ 10 ದಿನಗಳಲ್ಲಿ ಭಾರತದಲ್ಲಿ 685.60 ಕೋಟಿ ರೂ. ನಿವ್ವಳ ಗಳಿಕೆ ಮಾಡಿರುವ ಸಿನಿಮಾ, ವಿಶ್ವಾದ್ಯಂತ 1,228 ಕೋಟಿ ರೂ. ಕಲೆಕ್ಷನ್ ಮಾಡುವ ಮೂಲಕ ಹೊಸ ದಾಖಲೆ ನಿರ್ಮಿಸಿದೆ ಎಂದು ವರದಿಯಾಗಿದೆ.
ನವೆಂಬರ್ 5ರಂದು ಬಿಡುಗಡೆಯಾದ ಈ ಬಿಗ್ ಬಜೆಟ್ ಸಿನಿಮಾ ಮೊದಲ ದಿನದಿಂದಲೇ ಉತ್ತಮ ಪ್ರದರ್ಶನ ನೀಡುತ್ತಿದೆ. ವಿಶೇಷವೆಂದರೆ, ಕೇವಲ 10 ದಿನಗಳಲ್ಲೇ ‘ಜವಾನ್’, ‘ಕಲ್ಕಿ 2898 ಎಡಿ’ ಹಾಗೂ ‘ಕಾಂತಾರ: ಎ ಲೆಜೆಂಡ್ ಚಾಪ್ಟರ್ 1’ ಚಿತ್ರಗಳ ದೇಶೀಯ ನಿವ್ವಳ ಗಳಿಕೆಯನ್ನು ಹಿಂದಿಕ್ಕಿದೆ ಎಂದು ವರದಿಗಳು ತಿಳಿಸಿವೆ.

10ನೇ ದಿನ ‘ರಾಮಾಯಣ’ ಗಳಿಸಿದ್ದೆಷ್ಟು?
ಬಿಡುಗಡೆಯ ಮೊದಲ ದಿನವೇ 64.85 ಕೋಟಿ ರೂ. ಗಳಿಸುವ ಮೂಲಕ ‘ರಾಮಾಯಣ’ ಉತ್ತಮ ಆರಂಭ ಕಂಡಿತ್ತು. ಚಿತ್ರದ ಇದುವರೆಗಿನ ಗರಿಷ್ಠ ಏಕದಿನ ಗಳಿಕೆ ಐದನೇ ದಿನ ದಾಖಲಾಗಿದ್ದು, ಅಂದು 107.50 ಕೋಟಿ ರೂ. ಕಲೆಕ್ಷನ್ ಮಾಡಿತ್ತು.
ಎರಡನೇ ಶುಕ್ರವಾರದಂದು ಗಳಿಕೆಯಲ್ಲಿ ಕೊಂಚ ಇಳಿಕೆ ಕಂಡಿದ್ದರೂ, ವಾರಾಂತ್ಯದಲ್ಲಿ ಮತ್ತೆ ವೇಗ ಪಡೆದುಕೊಂಡಿದೆ. ನವೆಂಬರ್ 13ರಂದು ಒಂಬತ್ತನೇ ದಿನ 48.10 ಕೋಟಿ ರೂ. ಗಳಿಸಿದ್ದ ಸಿನಿಮಾ, ನವೆಂಬರ್ 14ರಂದು ಹತ್ತನೇ ದಿನ 72.90 ಕೋಟಿ ರೂ. ಕಲೆಕ್ಷನ್ ಮಾಡಿದೆ.
ಇದರೊಂದಿಗೆ ಚಿತ್ರದ ಒಟ್ಟು ಭಾರತ ನಿವ್ವಳ ಗಳಿಕೆ 685.60 ಕೋಟಿ ರೂ. ತಲುಪಿದೆ. ಭಾರತದಲ್ಲಿನ ಒಟ್ಟು ಗ್ರಾಸ್ ಕಲೆಕ್ಷನ್ 819.50 ಕೋಟಿ ರೂ. ಆಗಿದೆ ಎಂದು ವರದಿಯಾಗಿದೆ.
ಜವಾನ್, ಕಲ್ಕಿ, ಕಾಂತಾರ ದಾಖಲೆ ಹಿಂದಿಕ್ಕಿದ ರಾಮಾಯಣ!
ಯಶ್ ಅಭಿನಯದ ‘ರಾಮಾಯಣ’ ಸಿನಿಮಾ ಕೇವಲ 10 ದಿನಗಳಲ್ಲಿ ಹಲವು ಬ್ಲಾಕ್ಬಸ್ಟರ್ ಚಿತ್ರಗಳ ದೇಶೀಯ ಬಾಕ್ಸ್ ಆಫೀಸ್ ಗಳಿಕೆಯನ್ನು ಮೀರಿಸಿದೆ.
- ಜವಾನ್: ಶಾರುಖ್ ಖಾನ್ ಅಭಿನಯದ 2023ರ ಈ ಸಿನಿಮಾ ಭಾರತದಲ್ಲಿ 640.25 ಕೋಟಿ ರೂ. ನಿವ್ವಳ ಗಳಿಕೆ ಮಾಡಿತ್ತು.
- ಕಲ್ಕಿ 2898 ಎಡಿ: 2024ರಲ್ಲಿ ಬಿಡುಗಡೆಯಾದ ಈ ಚಿತ್ರ 646.31 ಕೋಟಿ ರೂ. ನಿವ್ವಳ ಕಲೆಕ್ಷನ್ ಮಾಡಿತ್ತು.
- ಕಾಂತಾರ: ಎ ಲೆಜೆಂಡ್ ಚಾಪ್ಟರ್ 1: 2025ರಲ್ಲಿ ತೆರೆಕಂಡ ಈ ಸಿನಿಮಾ 622.48 ಕೋಟಿ ರೂ. ಗಳಿಸಿತ್ತು.
ಈ ಮೂರೂ ಸಿನಿಮಾಗಳ ಜೀವಿತಾವಧಿಯ ದೇಶೀಯ ನಿವ್ವಳ ಗಳಿಕೆಯನ್ನು ‘ರಾಮಾಯಣ’ ಕೇವಲ 10 ದಿನಗಳಲ್ಲೇ ಹಿಂದಿಕ್ಕಿದೆ ಎನ್ನಲಾಗಿದೆ.

ಯಶ್ ಅಭಿಮಾನಿಗಳಲ್ಲಿ ಹೆಚ್ಚಿದ ಸಂಭ್ರಮ
ರಣಬೀರ್ ಕಪೂರ್ ರಾಮನ ಪಾತ್ರದಲ್ಲಿ, ಸಾಯಿ ಪಲ್ಲವಿ ಸೀತೆಯ ಪಾತ್ರದಲ್ಲಿ ಹಾಗೂ ಯಶ್ ರಾವಣನ ಪಾತ್ರದಲ್ಲಿ ಕಾಣಿಸಿಕೊಂಡಿರುವ ಈ ಸಿನಿಮಾ ಭಾರೀ ನಿರೀಕ್ಷೆ ಮೂಡಿಸಿದೆ. ಚಿತ್ರದ ಬಾಕ್ಸ್ ಆಫೀಸ್ ಗಳಿಕೆ ಮುಂದಿನ ದಿನಗಳಲ್ಲಿ ಮತ್ತಷ್ಟು ಹೆಚ್ಚಾಗುವ ಸಾಧ್ಯತೆಯಿದ್ದು, ಸಿನಿಪ್ರೇಮಿಗಳ ಗಮನ ಈಗ ಚಿತ್ರದ ಮುಂದಿನ ಕಲೆಕ್ಷನ್ ದಾಖಲೆಗಳತ್ತ ನೆಟ್ಟಿದೆ.















