ಮಕ್ಕಳ ಆರೋಗ್ಯದ ಬಗ್ಗೆ ಪ್ರತಿಯೊಬ್ಬ ಪೋಷಕರಿಗೂ ಕಾಳಜಿ ಇರುತ್ತದೆ. ಉತ್ತಮ ಆಹಾರ, ಸ್ವಚ್ಛ ಪರಿಸರ ಹಾಗೂ ಕಾಯಿಲೆಗಳಿಂದ ರಕ್ಷಿಸಲು ಹಲವು ಮುನ್ನೆಚ್ಚರಿಕೆಗಳನ್ನು ವಹಿಸುತ್ತಾರೆ. ಆದರೆ ಮನೆಯಲ್ಲಿರುವ ಹಿರಿಯರ ಧೂಮಪಾನದ ಅಭ್ಯಾಸ ಮಕ್ಕಳ ಆರೋಗ್ಯದ ಮೇಲೂ ಪರಿಣಾಮ ಬೀರಬಹುದು ಎಂಬುದನ್ನು ಹಲವರು ಗಮನಿಸುವುದಿಲ್ಲ.
ಮಕ್ಕಳಿದ್ದಾರೆ ಎಂಬ ಕಾರಣಕ್ಕೆ ಕೆಲವರು ಮನೆಯೊಳಗೆ ಸಿಗರೇಟ್ ಸೇದುವುದಿಲ್ಲ. ಬದಲಾಗಿ ಬಾಲ್ಕನಿ, ಅಂಗಳ ಅಥವಾ ಕಿಟಕಿಯ ಬಳಿ ನಿಂತು ಧೂಮಪಾನ ಮಾಡುತ್ತಾರೆ. ಇದರಿಂದ ಮಕ್ಕಳು ಸಿಗರೇಟ್ ಹೊಗೆಯಿಂದ ಸುರಕ್ಷಿತವಾಗಿರುತ್ತಾರೆ ಎಂದು ಭಾವಿಸುತ್ತಾರೆ. ಆದರೆ ಮನೆಯ ಹೊರಗೆ ಧೂಮಪಾನ ಮಾಡಿದರೂ ಮಕ್ಕಳಿಗೆ ಅಪಾಯ ಸಂಪೂರ್ಣವಾಗಿ ತಪ್ಪುವುದಿಲ್ಲ.
ಸಿಗರೇಟ್ ಹೊಗೆಯಲ್ಲಿರುವ ಹಾನಿಕಾರಕ ರಾಸಾಯನಿಕಗಳು ಬಟ್ಟೆ, ಪರದೆ, ಸೋಫಾ, ಹಾಸಿಗೆ ಹಾಗೂ ಮನೆಯ ಇತರ ವಸ್ತುಗಳ ಮೇಲೆ ಅಂಟಿಕೊಳ್ಳಬಹುದು. ಧೂಮಪಾನ ಮಾಡಿದ ವ್ಯಕ್ತಿ ಮನೆಗೆ ಮರಳಿದಾಗ ಈ ವಿಷಕಾರಿ ಅಂಶಗಳು ಮನೆಯೊಳಗೆ ಬರುವ ಸಾಧ್ಯತೆಯಿದೆ. ಜಾಗತಿಕ ವಯಸ್ಕ ತಂಬಾಕು ಸಮೀಕ್ಷೆ (GATS-2) ವರದಿಯಲ್ಲೂ ಈ ಬಗ್ಗೆ ಎಚ್ಚರಿಕೆ ನೀಡಲಾಗಿದೆ.
ಸೆಕೆಂಡ್ ಹ್ಯಾಂಡ್ ಮತ್ತು ಥರ್ಡ್ ಹ್ಯಾಂಡ್ ಸ್ಮೋಕ್ ಎಂದರೇನು?
ಧೂಮಪಾನ ಮಾಡದ ವ್ಯಕ್ತಿ ಮತ್ತೊಬ್ಬರು ಸೇದುವ ಸಿಗರೇಟ್ ಹೊಗೆಯನ್ನು ಉಸಿರಾಡುವುದನ್ನು ಸೆಕೆಂಡ್ ಹ್ಯಾಂಡ್ ಸ್ಮೋಕ್ ಅಥವಾ ಪರೋಕ್ಷ ಧೂಮಪಾನ ಎಂದು ಕರೆಯುತ್ತಾರೆ.
ಇನ್ನು ಸಿಗರೇಟ್ ಹೊಗೆ ನಿಂತ ನಂತರವೂ ಬಟ್ಟೆ, ಗೋಡೆ, ಪೀಠೋಪಕರಣ ಹಾಗೂ ಮನೆಯ ಇತರ ವಸ್ತುಗಳ ಮೇಲೆ ಉಳಿಯುವ ಹಾನಿಕಾರಕ ರಾಸಾಯನಿಕ ಅಂಶಗಳನ್ನು ಥರ್ಡ್ ಹ್ಯಾಂಡ್ ಸ್ಮೋಕ್ ಎಂದು ಕರೆಯಲಾಗುತ್ತದೆ.
ಮಕ್ಕಳು ನೆಲದ ಮೇಲೆ ಆಟವಾಡುವಾಗ, ವಸ್ತುಗಳನ್ನು ಮುಟ್ಟುವಾಗ ಅಥವಾ ಧೂಮಪಾನ ಮಾಡುವ ವ್ಯಕ್ತಿಯನ್ನು ಅಪ್ಪಿಕೊಳ್ಳುವಾಗ ಈ ರಾಸಾಯನಿಕಗಳಿಗೆ ಒಡ್ಡಿಕೊಳ್ಳಬಹುದು. ಹೀಗಾಗಿ ಮನೆಯ ಹೊರಗೆ ಸಿಗರೇಟ್ ಸೇದಿದರೆ ಸಾಕು, ಮಕ್ಕಳಿಗೆ ಯಾವುದೇ ಅಪಾಯವಿಲ್ಲ ಎಂದು ಭಾವಿಸುವುದು ಸರಿಯಲ್ಲ.
ಮಕ್ಕಳ ಆರೋಗ್ಯದ ಮೇಲೆ ಏನೆಲ್ಲ ಪರಿಣಾಮ?
ಮಕ್ಕಳ ಶ್ವಾಸಕೋಶಗಳು ಬೆಳವಣಿಗೆಯ ಹಂತದಲ್ಲಿರುವುದರಿಂದ ತಂಬಾಕಿನ ಹೊಗೆಯಲ್ಲಿರುವ ರಾಸಾಯನಿಕಗಳು ಅವರ ಆರೋಗ್ಯದ ಮೇಲೆ ಪರಿಣಾಮ ಬೀರಬಹುದು. ಧೂಮಪಾನದ ಹೊಗೆಗೆ ಪದೇಪದೇ ಒಡ್ಡಿಕೊಳ್ಳುವುದರಿಂದ ಈ ಕೆಳಗಿನ ಸಮಸ್ಯೆಗಳು ಕಾಣಿಸಿಕೊಳ್ಳಬಹುದು.
- ಪದೇಪದೇ ಕೆಮ್ಮು ಮತ್ತು ಉಸಿರಾಟದ ತೊಂದರೆ.
- ಆಸ್ತಮಾ ಸಮಸ್ಯೆ ಹೆಚ್ಚಾಗುವುದು.
- ಉಸಿರಾಡುವಾಗ ಉಬ್ಬಸ ಮತ್ತು ಶಬ್ದ ಕಾಣಿಸಿಕೊಳ್ಳುವುದು.
- ಎದೆಯ ಸೋಂಕು ಹಾಗೂ ನ್ಯುಮೋನಿಯಾ ಅಪಾಯ ಹೆಚ್ಚಾಗುವುದು.
- ಶ್ವಾಸಕೋಶಗಳ ಬೆಳವಣಿಗೆಗೆ ತೊಂದರೆಯಾಗುವುದು.
ಮಕ್ಕಳನ್ನು ಸಿಗರೇಟ್ ಹೊಗೆಯಿಂದ ರಕ್ಷಿಸುವುದು ಹೇಗೆ?
- ಮನೆಯೊಳಗೆ ಮಾತ್ರವಲ್ಲದೆ ಬಾಲ್ಕನಿ, ಕಿಟಕಿ ಮತ್ತು ಮನೆಯ ಪ್ರವೇಶದ್ವಾರದ ಬಳಿಯೂ ಧೂಮಪಾನ ಮಾಡಬೇಡಿ.
- ಮಕ್ಕಳ ಆರೋಗ್ಯದ ದೃಷ್ಟಿಯಿಂದ ಧೂಮಪಾನವನ್ನು ಸಂಪೂರ್ಣವಾಗಿ ತ್ಯಜಿಸುವುದು ಉತ್ತಮ.
- ಧೂಮಪಾನ ಮಾಡಿದ ಬಳಿಕ ಕೈಗಳನ್ನು ಚೆನ್ನಾಗಿ ತೊಳೆಯಿರಿ ಮತ್ತು ಬಟ್ಟೆ ಬದಲಾಯಿಸಿ. ಆದರೆ ಇದರಿಂದ ಅಪಾಯ ಸಂಪೂರ್ಣವಾಗಿ ದೂರವಾಗುವುದಿಲ್ಲ.
- ಮಕ್ಕಳು ಪ್ರಯಾಣಿಸುವ ಕಾರು ಸೇರಿದಂತೆ ಯಾವುದೇ ವಾಹನವನ್ನು ಹೊಗೆ ಮುಕ್ತವಾಗಿಡಿ.
- ಮನೆಯ ಹಿರಿಯರು ಉತ್ತಮ ಅಭ್ಯಾಸಗಳನ್ನು ರೂಢಿಸಿಕೊಳ್ಳಿ. ಏಕೆಂದರೆ ಮಕ್ಕಳು ದೊಡ್ಡವರ ನಡವಳಿಕೆಯನ್ನು ನೋಡಿ ಕಲಿಯುತ್ತಾರೆ.
ಏರ್ ಫ್ರೆಶ್ನರ್ ಬಳಸಿದರೆ ಅಪಾಯ ಕಡಿಮೆಯಾಗುತ್ತದೆಯೇ?
ಮನೆಯಲ್ಲಿರುವ ಸಿಗರೇಟ್ ವಾಸನೆ ಹೋಗಲಾಡಿಸಲು ಕೆಲವರು ಏರ್ ಫ್ರೆಶ್ನರ್ ಅಥವಾ ಫ್ಯಾನ್ ಬಳಸುತ್ತಾರೆ. ಆದರೆ ಇವು ತಂಬಾಕಿನಲ್ಲಿರುವ ಹಾನಿಕಾರಕ ರಾಸಾಯನಿಕಗಳನ್ನು ಸಂಪೂರ್ಣವಾಗಿ ತೆಗೆದುಹಾಕುವುದಿಲ್ಲ. ವಾಸನೆ ಕಡಿಮೆಯಾಗಿದೆ ಎಂಬ ಕಾರಣಕ್ಕೆ ಮನೆಯ ಗಾಳಿ ಸುರಕ್ಷಿತವಾಗಿದೆ ಎಂದು ಭಾವಿಸಬಾರದು.
ಮಕ್ಕಳ ಆರೋಗ್ಯ ಕಾಪಾಡಲು ಮನೆಯ ವಾತಾವರಣವನ್ನು ಸಂಪೂರ್ಣ ಹೊಗೆ ಮುಕ್ತವಾಗಿಡುವುದು ಅತ್ಯಂತ ಮುಖ್ಯ. ನಿಮ್ಮ ಒಂದು ಉತ್ತಮ ನಿರ್ಧಾರ ಮಕ್ಕಳ ಆರೋಗ್ಯಕರ ಭವಿಷ್ಯಕ್ಕೆ ರಕ್ಷಣೆಯಾಗಬಹುದು.
