ಮಂಗಳೂರು: ಕರಾವಳಿ ಭಾಗದ ದಶಕಗಳ ಬೇಡಿಕೆಗೆ ಇದೀಗ ಮಹತ್ವದ ಬೆಳವಣಿಗೆ ಎದುರಾಗಿದೆ. ದಕ್ಷಿಣ ರೈಲ್ವೆಯ ಪಾಲಕ್ಕಾಡ್ ವಿಭಾಗದ ವ್ಯಾಪ್ತಿಯಲ್ಲಿದ್ದ ಮಂಗಳೂರು ರೈಲ್ವೆ ಪ್ರದೇಶವು ಅಕ್ಟೋಬರ್ 1ರಿಂದ ನೈಋತ್ಯ ರೈಲ್ವೆಯ ಮೈಸೂರು ವಿಭಾಗದ ವ್ಯಾಪ್ತಿಗೆ ಬರಲಿದೆ. ರೈಲ್ವೆ ಮಂಡಳಿಯ ಆಗಸ್ಟ್ 21ರ ಅಧಿಸೂಚನೆಯಂತೆ ಈ ಆಡಳಿತಾತ್ಮಕ ಬದಲಾವಣೆ ಜಾರಿಗೆ ಬರಲಿದೆ.

ಮಧ್ಯರಾತ್ರಿಯಿಂದ ಆಡಳಿತ ಹಸ್ತಾಂತರ

ಸೆಪ್ಟೆಂಬರ್ 30 ಮತ್ತು ಅಕ್ಟೋಬರ್ 1ರ ಮಧ್ಯರಾತ್ರಿಯಿಂದ ಮಂಗಳೂರು ಪ್ರದೇಶದ ರೈಲ್ವೆ ಆಡಳಿತದ ನಿಯಂತ್ರಣ ಮೈಸೂರು ವಿಭಾಗಕ್ಕೆ ವರ್ಗಾವಣೆಯಾಗಲಿದೆ. ಬದಲಾವಣೆಯ ಸಂದರ್ಭದಲ್ಲಿ ರೈಲು ಸಂಚಾರ ಹಾಗೂ ಪ್ರಯಾಣಿಕರ ಸೇವೆಗಳಿಗೆ ಯಾವುದೇ ಅಡಚಣೆಯಾಗದಂತೆ ಪಾಲಕ್ಕಾಡ್ ಮತ್ತು ಮೈಸೂರು ವಿಭಾಗಗಳ ಅಧಿಕಾರಿಗಳು ಸಮನ್ವಯದಲ್ಲಿ ಕಾರ್ಯನಿರ್ವಹಿಸುತ್ತಿದ್ದಾರೆ. ಇತ್ತೀಚೆಗೆ ಎರಡೂ ವಿಭಾಗಗಳ ಹಿರಿಯ ಅಧಿಕಾರಿಗಳು ಮಂಗಳೂರಿನಲ್ಲಿ ಸಭೆ ನಡೆಸಿ ಹಸ್ತಾಂತರ ಪ್ರಕ್ರಿಯೆಯ ಸಿದ್ಧತೆಗಳನ್ನು ಪರಿಶೀಲಿಸಿದ್ದರು.

ಪಡೀಲ್ ಬದಲು ಉಳ್ಳಾಲ ಗಡಿ

ಈ ಬದಲಾವಣೆಯ ಪ್ರಮುಖ ಅಂಶವೆಂದರೆ ದಕ್ಷಿಣ ರೈಲ್ವೆ ಮತ್ತು ನೈಋತ್ಯ ರೈಲ್ವೆ ನಡುವಿನ ಇಂಟರ್‌ಚೇಂಜ್‌ ಗಡಿ ಪಡೀಲ್‌ನಿಂದ ಉಳ್ಳಾಲಕ್ಕೆ ಸ್ಥಳಾಂತರವಾಗಲಿದೆ. ಮಂಗಳೂರು ಪ್ರದೇಶವು ಉಳ್ಳಾಲ ಸೇರಿದಂತೆ ಮೈಸೂರು ವಿಭಾಗದ ವ್ಯಾಪ್ತಿಗೆ ಸೇರ್ಪಡೆಯಾಗಲಿದೆ. ತೋಕೂರು ಇನ್ನು ಮುಂದೆ ದಕ್ಷಿಣ ರೈಲ್ವೆ–ಕೊಂಕಣ ರೈಲ್ವೆ ನಡುವಿನ ಹಸ್ತಾಂತರ ಬಿಂದುವಾಗಿರದೆ, ಕೊಂಕಣ ರೈಲ್ವೆ ಮತ್ತು ನೈಋತ್ಯ ರೈಲ್ವೆ ನಡುವಿನ ಇಂಟರ್‌ಚೇಂಜ್‌ ಆಗಲಿದೆ.

ಮೈಸೂರು ವಿಭಾಗದ ವ್ಯಾಪ್ತಿ ವಿಸ್ತರಣೆ

ಮಂಗಳೂರು ಪ್ರದೇಶ ಸೇರ್ಪಡೆಯೊಂದಿಗೆ ಮೈಸೂರು ವಿಭಾಗದ ಬ್ಲಾಕ್‌ ನಿಲ್ದಾಣಗಳ ಸಂಖ್ಯೆ 92ರಿಂದ 99ಕ್ಕೆ ಏರಿಕೆಯಾಗಲಿದೆ. ಹಾಸನ ಜಿಲ್ಲೆಯ ಆಲೂರುವರೆಗೆ ವಿಸ್ತರಿಸುವ ಹೊಸ ವ್ಯಾಪ್ತಿಯನ್ನು ಒಳಗೊಂಡಂತೆ ಮಂಗಳೂರು ಪ್ರದೇಶದ ರೈಲು ಕಾರ್ಯಾಚರಣೆಯನ್ನು ನಿರ್ವಹಿಸಲು ಮೈಸೂರು ವಿಭಾಗದಲ್ಲಿ ಹೊಸ ನಿಯಂತ್ರಣ ವ್ಯವಸ್ಥೆಯನ್ನು ರೂಪಿಸಲಾಗುತ್ತಿದೆ.

ರೈಲು ಸಂಚಾರಕ್ಕೆ ಏನು ಬದಲಾವಣೆ?

ಪ್ರಸ್ತುತ ಬೆಂಗಳೂರು ಕಡೆಯಿಂದ ಮಂಗಳೂರು ಮೂಲಕ ಕಾರವಾರದತ್ತ ಸಾಗುವ ರೈಲುಗಳು ವಿವಿಧ ವಲಯಗಳ ಗಡಿಗಳನ್ನು ದಾಟಬೇಕಾಗಿರುವುದರಿಂದ ಮುಂಗಡ ಸಮನ್ವಯ ಅಗತ್ಯವಾಗುತ್ತದೆ. ಪಡೀಲ್‌ನಲ್ಲಿ ನೈಋತ್ಯ ರೈಲ್ವೆ–ದಕ್ಷಿಣ ರೈಲ್ವೆ ಹಾಗೂ ತೋಕೂರಿನಲ್ಲಿ ದಕ್ಷಿಣ ರೈಲ್ವೆ–ಕೊಂಕಣ ರೈಲ್ವೆ ನಡುವಿನ ಹಸ್ತಾಂತರ ಪ್ರಕ್ರಿಯೆ ನಡೆಯುತ್ತಿತ್ತು.

ಮಂಗಳೂರು ಪ್ರದೇಶದ ಬಹುಪಾಲು ಒಂದೇ ನೈಋತ್ಯ ರೈಲ್ವೆ ವಿಭಾಗದ ವ್ಯಾಪ್ತಿಗೆ ಬಂದ ಬಳಿಕ ಈ ವಲಯಗಳ ನಡುವಿನ ಒಂದು ಹಂತದ ಸಮನ್ವಯ ಕಡಿಮೆಯಾಗಲಿದೆ. ಇದರಿಂದ ರೈಲುಗಳ ಕಾರ್ಯಾಚರಣೆಯನ್ನು ಮತ್ತಷ್ಟು ಸುಗಮಗೊಳಿಸುವ ಉದ್ದೇಶ ಹೊಂದಲಾಗಿದೆ ಎಂದು ರೈಲ್ವೆ ಅಧಿಕಾರಿಗಳು ತಿಳಿಸಿದ್ದಾರೆ.

ಕೋಚಿಂಗ್ ಡಿಪೋದಲ್ಲಿ ಸದ್ಯಕ್ಕೆ ಬದಲಾವಣೆ ಇಲ್ಲ

ಮಂಗಳೂರು ಕೋಚಿಂಗ್ ಡಿಪೋದಲ್ಲಿ ನಡೆಯುತ್ತಿರುವ ರೈಲುಗಳ ಕಾರ್ಯಾಚರಣೆ ಹಾಗೂ ಪ್ರಾಥಮಿಕ ನಿರ್ವಹಣೆಯಲ್ಲಿ ಆರಂಭಿಕ ಹಂತದಲ್ಲಿ ಯಾವುದೇ ಬದಲಾವಣೆ ಇರುವುದಿಲ್ಲ. ಕನಿಷ್ಠ ಮೊದಲ ಮೂರು ತಿಂಗಳವರೆಗೆ ಪ್ರಸ್ತುತ ವ್ಯವಸ್ಥೆಯನ್ನೇ ಮುಂದುವರಿಸಲಾಗುವುದು ಎಂದು ವರದಿಯಾಗಿದೆ.