ಪ್ರಧಾನಮಂತ್ರಿ ಕಿಸಾನ್ ಸಮ್ಮಾನ್ ನಿಧಿ ಯೋಜನೆಯಡಿ ಆರ್ಥಿಕ ನೆರವು ಪಡೆಯುತ್ತಿರುವ ಅರ್ಹ ರೈತರಿಗೆ ಇ-ಕೆವೈಸಿ ಕಡ್ಡಾಯವಾಗಿದೆ. ಇ-ಕೆವೈಸಿ ಪೂರ್ಣಗೊಳಿಸದಿದ್ದರೆ ಮುಂದಿನ ಕಂತಿನ ಹಣ ಪಾವತಿಗೆ ಅಡಚಣೆಯಾಗುವ ಸಾಧ್ಯತೆ ಇರುವುದರಿಂದ ರೈತರು ಕೂಡಲೇ ಕೆವೈಸಿ ಪ್ರಕ್ರಿಯೆ ಪೂರ್ಣಗೊಳಿಸುವಂತೆ ಕೃಷಿ ಇಲಾಖೆ ಸೂಚಿಸಿದೆ.
ಪಿಎಂ ಕಿಸಾನ್ ಯೋಜನೆಯಡಿ ಅರ್ಹ ರೈತರಿಗೆ ಪ್ರತಿ ನಾಲ್ಕು ತಿಂಗಳಿಗೊಮ್ಮೆ ₹2,000ರಂತೆ ವರ್ಷಕ್ಕೆ ಮೂರು ಕಂತುಗಳಲ್ಲಿ ಒಟ್ಟು ₹6,000 ನೇರವಾಗಿ ಬ್ಯಾಂಕ್ ಖಾತೆಗೆ ಜಮೆಯಾಗುತ್ತದೆ. ಈವರೆಗೆ 23 ಆರ್ಥಿಕ ಕಂತುಗಳ ಹಣವನ್ನು ಪಾವತಿಸಲಾಗಿದೆ.
ಇ-ಕೆವೈಸಿ ಮಾಡುವುದು ಹೇಗೆ?
ಅರ್ಹ ರೈತರು ಇ-ಕೆವೈಸಿಯನ್ನು ಬಯೋಮೆಟ್ರಿಕ್ ಅಥವಾ ಫೇಸ್ ಅಥೆಂಟಿಕೇಷನ್ ಮೂಲಕ ಪೂರ್ಣಗೊಳಿಸಬಹುದು.
- ಸಮೀಪದ ಸಾಮಾನ್ಯ ಸೇವಾ ಕೇಂದ್ರಕ್ಕೆ ಭೇಟಿ ನೀಡಿ ಬಯೋಮೆಟ್ರಿಕ್ ಮೂಲಕ ಇ-ಕೆವೈಸಿ ಮಾಡಿಸಬಹುದು.
- ಗ್ರಾಮ ಒನ್ ಅಥವಾ ಕರ್ನಾಟಕ ಒನ್ ಕೇಂದ್ರಗಳಲ್ಲಿಯೂ ಈ ಸೌಲಭ್ಯ ಪಡೆಯಬಹುದು.
- ರೈತರು ಸ್ವತಃ ಅಥವಾ ತಮ್ಮ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಕೃಷಿ ಸಖಿ/ವಿಲೇಜ್ ನೋಡಲ್ ಆಫೀಸರ್ ಮೂಲಕ ಪಿಎಂ-ಕಿಸಾನ್ ಮೊಬೈಲ್ ಅಪ್ಲಿಕೇಷನ್ನ ಫೇಸ್ ಅಥೆಂಟಿಕೇಷನ್ ಬಳಸಿ ಇ-ಕೆವೈಸಿ ಪೂರ್ಣಗೊಳಿಸಬಹುದು.
ಮೊಬೈಲ್ನಲ್ಲೇ e-KYC ಮಾಡುವುದು ಹೇಗೆ?
ಮೊಬೈಲ್ ಮೂಲಕ ಸರಳವಾಗಿ OTP ಆಧಾರಿತ e-KYC ಮಾಡಬಹುದು. ಇದಕ್ಕಾಗಿ ರೈತರ ಆಧಾರ್ಗೆ ಮೊಬೈಲ್ ಸಂಖ್ಯೆ ಲಿಂಕ್ ಆಗಿರಬೇಕು.
- ಮೊಬೈಲ್ನಲ್ಲಿ PM-KISAN ಅಧಿಕೃತ ವೆಬ್ಸೈಟ್ ತೆರೆಯಿರಿ.
- ಅಲ್ಲಿ ‘e-KYC’ ಆಯ್ಕೆಯನ್ನು ಕ್ಲಿಕ್ ಮಾಡಿ.
- ನಿಮ್ಮ ಆಧಾರ್ ಸಂಖ್ಯೆಯನ್ನು ನಮೂದಿಸಿ.
- ‘Search’ ಅಥವಾ ಮುಂದುವರಿಯುವ ಆಯ್ಕೆಯನ್ನು ಒತ್ತಿರಿ.
- ಆಧಾರ್ಗೆ ಲಿಂಕ್ ಆಗಿರುವ ಮೊಬೈಲ್ ಸಂಖ್ಯೆಗೆ ಬರುವ OTP ನಮೂದಿಸಿ.
- OTP ಪರಿಶೀಲನೆಯಾದ ಬಳಿಕ e-KYC ಪ್ರಕ್ರಿಯೆ ಪೂರ್ಣಗೊಳ್ಳುತ್ತದೆ.
ಫೇಸ್ ಮೂಲಕವೂ e-KYC ಮಾಡಬಹುದು
OTP ಮೂಲಕ e-KYC ಮಾಡಲು ಸಾಧ್ಯವಾಗದ ರೈತರಿಗೆ PM-KISAN ಮೊಬೈಲ್ ಆ್ಯಪ್ನಲ್ಲಿ Face Authentication ಆಧಾರಿತ e-KYC ಸೌಲಭ್ಯವೂ ಲಭ್ಯವಿದೆ. ಇದಕ್ಕಾಗಿ PM-KISAN ಮೊಬೈಲ್ ಆ್ಯಪ್ ಬಳಸಬಹುದು. ಅಧಿಕೃತ ಮಾಹಿತಿಯ ಪ್ರಕಾರ ಮೊಬೈಲ್ ಆ್ಯಪ್ ಮೂಲಕ Face Authentication ಆಧಾರಿತ e-KYC ಮಾಡುವ ವ್ಯವಸ್ಥೆ ಲಭ್ಯವಿದೆ.
e-KYC ಆಗಿದೆಯೇ ಎಂದು ಪರಿಶೀಲಿಸುವುದು ಹೇಗೆ?
PM-KISAN ಪೋರ್ಟಲ್ನ ‘Know Your Status’ ವಿಭಾಗಕ್ಕೆ ತೆರಳಿ ನೋಂದಣಿ ಸಂಖ್ಯೆಯ ಮೂಲಕ ನಿಮ್ಮ ವಿವರಗಳನ್ನು ಪರಿಶೀಲಿಸಬಹುದು. ಅಲ್ಲಿ ಪಾವತಿ ಸ್ಥಿತಿ ಸೇರಿದಂತೆ e-KYC ಮಾಹಿತಿಯನ್ನೂ ನೋಡಲು ಅವಕಾಶವಿದೆ.
ಹೀಗಾಗಿ ಪಿಎಂ ಕಿಸಾನ್ ಯೋಜನೆಯಡಿ ಮುಂದಿನ ಕಂತಿನ ಹಣ ಪಡೆಯಲು ಅರ್ಹರಾಗಿರುವ ರೈತರು ವಿಳಂಬ ಮಾಡದೆ ಇ-ಕೆವೈಸಿ ಪೂರ್ಣಗೊಳಿಸುವುದು ಅಗತ್ಯ. ಹೆಚ್ಚಿನ ಮಾಹಿತಿಗಾಗಿ ರೈತರು ತಮ್ಮ ವ್ಯಾಪ್ತಿಯ ತಾಲೂಕು ಸಹಾಯಕ ಕೃಷಿ ನಿರ್ದೇಶಕರ ಕಚೇರಿ ಅಥವಾ ರೈತ ಸಂಪರ್ಕ ಕೇಂದ್ರವನ್ನು ಸಂಪರ್ಕಿಸಬಹುದು.
