ಮೈಸೂರು: ಸಾಂಸ್ಕೃತಿಕ ನಗರಿ ಮೈಸೂರಿನಲ್ಲಿ ಇದೀಗ ಹೊಸ ಮಾದರಿಯ ಹೈಟೆಕ್ ವಂಚನೆ ಜಾಲವೊಂದು ಸಕ್ರಿಯವಾಗಿದ್ದು, ಎಟಿಎಂ ಕ್ಯಾಶ್ ಡೆಪಾಸಿಟ್ ಮಷೀನ್ಗಳ ಬಳಿ ಹಣ ಜಮೆ ಮಾಡಲು ಬರುವ ಅಮಾಯಕ ಜನರನ್ನು ಟಾರ್ಗೆಟ್ ಮಾಡಿ ಲಕ್ಷಾಂತರ ರೂಪಾಯಿ ದೋಚುತ್ತಿರುವ ಪ್ರಕರಣಗಳು ಬೆಳಕಿಗೆ ಬಂದಿವೆ.ಮೈಸೂರು ಮಾತ್ರವಲ್ಲ, ರಾಜ್ಯದ ಎಲ್ಲಾ ಕಡೆಗಳಲ್ಲೂ ಈ ರೀತಿಯ ಮೋಸದ ಜಾಲವೊಂದು ಸಕ್ರೀಯವಾಗಿದೆಯಂತೆ. ಈ ಸುದ್ದಿ ಓದಿ, ಎಟಿಎಂ ನಲ್ಲಿ ಕ್ಯಾಶ್ ಡೆಪಾಸಿಟ್ ಮಾಡಲು ಹೋಗುವಾಗ ಜಾಗರೂಕರಾಗಿರಿ.
ಏನಿದು ಹೊಸ ವಂಚನೆ ತಂತ್ರ?
ವಂಚಕರು ಎಟಿಎಂ ಕೇಂದ್ರಗಳ ಬಳಿ ಹೊಂಚು ಹಾಕಿ ನಿಂತಿರುತ್ತಾರೆ. ಹಣ ಜಮೆ ಮಾಡಲು ಬಂದವರನ್ನು ಗಮನಿಸಿ, “ಮಷೀನ್ನಲ್ಲಿ ಸಮಯ ವ್ಯರ್ಥ ಮಾಡಬೇಡಿ. ನೀವು ನನಗೆ ನಗದು ಹಣ ಕೊಡಿ, ನಾನು ತಕ್ಷಣವೇ ನಿಮ್ಮ ಖಾತೆಗೆ ಫೋನ್ಪೇ ಅಥವಾ ಯುಪಿಐ ಮೂಲಕ ಹಣ ವರ್ಗಾವಣೆ ಮಾಡುತ್ತೇನೆ” ಎಂದು ಅತ್ಯಂತ ವಿನಯದಿಂದ ನಂಬಿಸುತ್ತಾರೆ.
ಒಮ್ಮೆ ಅವರ ಮಾತನ್ನು ನಂಬಿ ನಗದು ಹಣ ನೀಡಿದರೆ, ಮೊಬೈಲ್ನಲ್ಲಿ ನಕಲಿ ಯಶಸ್ವಿ ವರ್ಗಾವಣೆಯ ಸ್ಕ್ರೀನ್ಶಾಟ್ ಅಥವಾ ಸಂದೇಶವನ್ನು ತೋರಿಸಿ, ಹಣ ಪಡೆದು ಕ್ಷಣಾರ್ಧದಲ್ಲಿ ಪರಾರಿಯಾಗುತ್ತಾರೆ. ನಂತರ ಖಾತೆಯನ್ನು ಪರಿಶೀಲಿಸಿದಾಗ ಯಾವುದೇ ಹಣ ಜಮೆಯಾಗಿಲ್ಲ ಎಂಬುದು ಗೊತ್ತಾಗುತ್ತದೆ.
ಮೈಸೂರಿನಲ್ಲಿ ಸಾಲು ಸಾಲು ಪ್ರಕರಣಗಳು
ಎನ್.ಆರ್. ಮೊಹಲ್ಲಾ ಪ್ರದೇಶದಲ್ಲಿ ಇಂಜಿನಿಯರ್ ಒಬ್ಬರು 10 ಸಾವಿರ ರೂಪಾಯಿ ಕಳೆದುಕೊಂಡಿದ್ದು, ಬನ್ನಿಮಂಟಪದಲ್ಲಿ ಉದ್ಯಮಿಯೊಬ್ಬರಿಗೆ 20 ಸಾವಿರ ರೂಪಾಯಿ ವಂಚನೆ ಮಾಡಲಾಗಿದೆ. ನಗದು ಹಣ ಪಡೆದುಕೊಂಡ ಆರೋಪಿಗಳು ಫೋನ್ಪೇ ಮೂಲಕ ಹಣ ವರ್ಗಾವಣೆಯಾದಂತೆ ನಕಲಿ ಸಂದೇಶ ತೋರಿಸಿ ಬೈಕ್ನಲ್ಲಿ ಪರಾರಿಯಾಗಿದ್ದಾರೆ.
ಎರಡೂ ಪ್ರಕರಣಗಳಲ್ಲಿ ತೋರಿಸಲಾದ ‘ಸಕ್ಸಸ್ ಮೆಸೇಜ್’ ನಕಲಿ ಎಂಬುದು ಬಳಿಕ ತಿಳಿದುಬಂದಿದೆ. ಈ ಸಂಬಂಧ ಎನ್.ಆರ್. ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಾಗಿದ್ದು, ಪೊಲೀಸರು ತನಿಖೆ ಮುಂದುವರಿಸಿದ್ದಾರೆ.
ಸಾರ್ವಜನಿಕರು ಏನು ಮಾಡಬೇಕು?
- ಎಟಿಎಂ ಡೆಪಾಸಿಟ್ ಮಷೀನ್ ಬಳಿ ಅಪರಿಚಿತರ ಸಹಾಯವನ್ನು ಎಂದಿಗೂ ಸ್ವೀಕರಿಸಬೇಡಿ.
- ಯಾರಾದರೂ ಹಣ ಬದಲಾಯಿಸಿ ಕೊಡುತ್ತೇವೆ ಅಥವಾ ಯುಪಿಐ ಮೂಲಕ ಕಳುಹಿಸುತ್ತೇವೆ ಎಂದರೆ ನಂಬಬೇಡಿ.
- ನಿಮ್ಮ ಬ್ಯಾಂಕ್ ಖಾತೆಗೆ ಹಣ ಜಮೆಯಾಗಿದೆ ಎಂಬುದನ್ನು ಬ್ಯಾಂಕ್ನ ಅಧಿಕೃತ ಆ್ಯಪ್ ಅಥವಾ ಎಸ್ಎಂಎಸ್ ಮೂಲಕ ಖಚಿತಪಡಿಸಿಕೊಳ್ಳಿ.
- ಯುಪಿಐ ಪಿನ್, ಸ್ಕ್ಯಾನರ್ ಅಥವಾ ವೈಯಕ್ತಿಕ ಬ್ಯಾಂಕಿಂಗ್ ಮಾಹಿತಿಯನ್ನು ಅಪರಿಚಿತರೊಂದಿಗೆ ಹಂಚಿಕೊಳ್ಳಬೇಡಿ.
- ಅನುಮಾನಾಸ್ಪದ ವ್ಯಕ್ತಿಗಳ ಬಗ್ಗೆ ತಕ್ಷಣವೇ ಪೊಲೀಸರಿಗೆ ಮಾಹಿತಿ ನೀಡಿ.
ತಾಂತ್ರಿಕತೆ ಬೆಳೆದಂತೆ ವಂಚಕರ ತಂತ್ರಗಳೂ ಬದಲಾಗುತ್ತಿವೆ. ಆದ್ದರಿಂದ ಸಾರ್ವಜನಿಕರು ಹೆಚ್ಚಿನ ಎಚ್ಚರಿಕೆ ವಹಿಸಿ, ತಮ್ಮ ಕಷ್ಟಪಟ್ಟು ದುಡಿದ ಹಣವನ್ನು ಸುರಕ್ಷಿತವಾಗಿಟ್ಟುಕೊಳ್ಳುವುದು ಅಗತ್ಯವಾಗಿದೆ. ಈ ಮಾಹಿತಿಯನ್ನು ಕುಟುಂಬದವರು ಹಾಗೂ ಸ್ನೇಹಿತರೊಂದಿಗೂ ಹಂಚಿಕೊಂಡು ಜಾಗೃತಿಯನ್ನು ಮೂಡಿಸುವುದು ಮುಖ್ಯವಾಗಿದೆ.
