ಮಳೆಗಾಲ ಬಂತು ಅಂದರೆ ಬಿಸಿ ಬಿಸಿ ಮೀನು ಸಾಂಬಾರು, ಸುಕ್ಕ, ಫ್ರೈ ನೆನಪಾಗುವುದು ಸಹಜ. ಆದರೆ ಈ ಸಮಯದಲ್ಲಿ ಮೀನುಗಾರಿಕೆ ಚಟುವಟಿಕೆ ಕಡಿಮೆಯಾಗುವುದರಿಂದ ಮಾರುಕಟ್ಟೆಯಲ್ಲಿ ತಾಜಾ ಮೀನು ಸಿಗುವುದು ಕೆಲವೊಮ್ಮೆ ಸವಾಲಾಗುತ್ತದೆ. ಕೆಲ ವ್ಯಾಪಾರಿಗಳು ಹಳೆಯ ಮೀನುಗಳನ್ನು ಐಸ್ನಲ್ಲಿ ಇಟ್ಟು ತಾಜಾ ಮೀನು ಎಂದು ಮಾರಾಟ ಮಾಡುವ ಸಾಧ್ಯತೆಯೂ ಇರುತ್ತದೆ. ಹಾಗಾದರೆ ಫ್ರೆಶ್ ಮೀನು ಮತ್ತು ಹಳಸಿದ ಮೀನು ನಡುವಿನ ವ್ಯತ್ಯಾಸವನ್ನು ಹೇಗೆ ಗುರುತಿಸುವುದು? ಇಲ್ಲಿವೆ ಕೆಲವು ಸರಳ ಟಿಪ್ಸ್.
ಮೀನಿನ ಕಣ್ಣುಗಳನ್ನು ಗಮನಿಸಿ
ತಾಜಾ ಮೀನಿನ ಕಣ್ಣುಗಳು ಸ್ಪಷ್ಟ, ಹೊಳೆಯುವ ಮತ್ತು ಸ್ವಲ್ಪ ಉಬ್ಬಿದಂತೆ ಕಾಣುತ್ತವೆ. ಹಳೆಯ ಮೀನಿನ ಕಣ್ಣುಗಳು ಮಂಕಾಗಿರುತ್ತವೆ, ಬಿಳಿ ಪದರ ಕಾಣಿಸಬಹುದು ಅಥವಾ ಒಳಗೆ ಕುಸಿದಂತೆ ಕಾಣಬಹುದು. ಆದ್ದರಿಂದ ಮೀನು ಖರೀದಿಸುವಾಗ ಮೊದಲು ಕಣ್ಣುಗಳನ್ನು ಪರಿಶೀಲಿಸುವುದು ಉತ್ತಮ.
ವಾಸನೆ ಪರೀಕ್ಷಿಸಿ
ತಾಜಾ ಮೀನುಗಳಿಗೆ ಸೌಮ್ಯವಾದ ಸಮುದ್ರದ ವಾಸನೆ ಇರುತ್ತದೆ. ಆದರೆ ಮೀನುಗಳಿಂದ ತೀವ್ರವಾದ ಅಥವಾ ಕೊಳೆತ ವಾಸನೆ ಬಂದರೆ ಅದು ಹಳಸಿರುವ ಸಾಧ್ಯತೆ ಹೆಚ್ಚು. ಐಸ್ನಲ್ಲಿ ಇಟ್ಟಿದ್ದರೂ ವಾಸನೆಯಿಂದ ಮೀನಿನ ಗುಣಮಟ್ಟವನ್ನು ಸುಲಭವಾಗಿ ಅಂದಾಜಿಸಬಹುದು.
ಬಣ್ಣ ಮತ್ತು ಹೊಳಪನ್ನು ನೋಡಿ
ತಾಜಾ ಮೀನಿನ ಚರ್ಮದಲ್ಲಿ ನೈಸರ್ಗಿಕ ಹೊಳಪು ಇರುತ್ತದೆ. ಅದರ ಬಣ್ಣವೂ ಸ್ಪಷ್ಟವಾಗಿರುತ್ತದೆ. ಮೀನಿನ ಕಿವಿರುಗಳು (Gills) ಕೆಂಪು ಅಥವಾ ಗುಲಾಬಿ ಬಣ್ಣದಲ್ಲಿದ್ದರೆ ಅದು ತಾಜಾ ಎಂಬ ಸೂಚನೆ. ಕಂದು ಅಥವಾ ಮಂಕಾದ ಬಣ್ಣ ಕಂಡುಬಂದರೆ ಎಚ್ಚರಿಕೆ ವಹಿಸುವುದು ಒಳಿತು.
ಮಾಂಸದ ಗಟ್ಟಿತನ ಪರೀಕ್ಷಿಸಿ
ಮೀನಿನ ಮೇಲ್ಭಾಗವನ್ನು ಬೆರಳಿನಿಂದ ನಿಧಾನವಾಗಿ ಒತ್ತಿ ನೋಡಿ. ತಾಜಾ ಮೀನಿನ ಮಾಂಸ ಗಟ್ಟಿಯಾಗಿದ್ದು, ಒತ್ತಿದ ಕೂಡಲೇ ಹಿಂದಿನ ಸ್ಥಿತಿಗೆ ಮರಳುತ್ತದೆ. ಗುರುತು ಉಳಿದರೆ ಅಥವಾ ಮಾಂಸ ಮೃದುವಾಗಿದ್ದರೆ ಅದು ಹಳೆಯ ಮೀನು ಆಗಿರಬಹುದು.
ಸಿಪ್ಪೆ ಮತ್ತು ಮೇಲ್ಮೈ ಗಮನಿಸಿ
ತಾಜಾ ಮೀನಿನ ಸಿಪ್ಪೆಗಳು ಗಟ್ಟಿಯಾಗಿ ಅಂಟಿಕೊಂಡಿರುತ್ತವೆ. ಅವು ಸುಲಭವಾಗಿ ಉದುರುವುದಿಲ್ಲ. ಚರ್ಮವು ಸ್ವಲ್ಪ ತೇವಾಂಶ ಹೊಂದಿದ್ದರೂ ಜಿಗುಟಾಗಿರುವುದಿಲ್ಲ. ಅತಿಯಾಗಿ ಜಿಗುಟಾಗಿದ್ದರೆ ಅಥವಾ ಸಿಪ್ಪೆಗಳು ಉದುರುತ್ತಿದ್ದರೆ ಅದು ತಾಜಾ ಅಲ್ಲದಿರಬಹುದು.
ಐಸ್ನಲ್ಲಿ ಇಟ್ಟಿದೆ ಅಂದರೆ ಫ್ರೆಶ್ ಅಂತಲ್ಲ!
ಬಹಳಷ್ಟು ಜನ ಐಸ್ನಲ್ಲಿ ಇಟ್ಟಿರುವ ಮೀನುಗಳನ್ನು ತಾಜಾ ಎಂದು ಭಾವಿಸುತ್ತಾರೆ. ಆದರೆ ಕೆಲವೊಮ್ಮೆ ಹಳೆಯ ಮೀನುಗಳನ್ನೂ ಐಸ್ನಲ್ಲಿ ಇಟ್ಟು ಹೊಸದಾಗಿ ಕಾಣುವಂತೆ ಮಾಡಲಾಗುತ್ತದೆ. ಆದ್ದರಿಂದ ಕಣ್ಣು, ವಾಸನೆ, ಬಣ್ಣ ಮತ್ತು ಮಾಂಸದ ಸ್ಥಿತಿಯನ್ನು ಪರಿಶೀಲಿಸಿದ ಬಳಿಕವೇ ಮೀನು ಖರೀದಿಸುವುದು ಉತ್ತಮ.
ಹಳಸಿದ ಮೀನು ಸೇವನೆಯಿಂದ ಹೊಟ್ಟೆ ನೋವು, ವಾಂತಿ, ಅತಿಸಾರ ಮತ್ತು ಜೀರ್ಣಕ್ರಿಯೆ ಸಮಸ್ಯೆಗಳು ಉಂಟಾಗಬಹುದು. ಆದ್ದರಿಂದ ಮೀನು ಖರೀದಿಸುವಾಗ ಸ್ವಲ್ಪ ಸಮಯ ತೆಗೆದುಕೊಂಡು ಅದರ ತಾಜಾತನವನ್ನು ಖಚಿತಪಡಿಸಿಕೊಳ್ಳಿ. ಈ ಸರಳ ಟಿಪ್ಸ್ ಅನುಸರಿಸಿದರೆ ಉತ್ತಮ ಗುಣಮಟ್ಟದ ಮೀನುಗಳನ್ನು ಆಯ್ಕೆ ಮಾಡಿ ರುಚಿಕರವಾದ ಮೀನು ಊಟವನ್ನು ಸವಿಯಬಹುದು.
