ಬೆಂಗಳೂರು ರಾಯಲ್ ಚಾಲೆಂಜರ್ಸ್  ತಂಡಕ್ಕೆ ಇಂದು ನಿಜಕ್ಕೂ ಸ್ಪೆಷಲ್ ಡೇ ಮತ್ತು ಸ್ಮರಣೀಯ ದಿನ. ಹೌದು ಐಪಿಎಲ್ ಇತಿಹಾಸದಲ್ಲಿ ತನ್ನ ತವರು ನೆಲವಾದ ಚಿನ್ನಸ್ವಾಮೀ ಸ್ಟೇಡಿಯಂನಲ್ಲಿ 100 ಪಂದ್ಯಗಳನ್ನು ಆಡಿದ ಮೊದಲ ತಂಡ ಎಂಬ ಹೆಗ್ಗಳಿಕೆಗೆ ಆರ್ ಸಿ ಬಿ ಇವತ್ತು ಪಾತ್ರವಾಗಲಿದೆ.

Indian Premier League ಆರಂಭವಾಗಿ 19 ವರ್ಷಗಳು ಪೂರ್ಣಗೊಳ್ಳುತ್ತಿರುವ  ಈ ದಿನವೇ ಈ ಸಾಧನೆ ಮಾಡಿರುವುದು ಅಭಿಮಾನಿಗಳಲ್ಲಿ ಹಬ್ಬದ ವಾತಾವರಣ ಮೂಡಿಸಿದೆ. ಇದೇ ಸಂದರ್ಭದಲ್ಲಿ ಇಂದು ನಡೆಯಲಿರುವ ಪಂದ್ಯದಲ್ಲಿ Delhi Capitals ವಿರುದ್ಧ ಆರ್ಸಿಬಿ ಕಣಕ್ಕಿಳಿಯಲಿದೆ.

2008ರ ಏಪ್ರಿಲ್ 18ರಂದು ಇದೇ ಮೈದಾನದಲ್ಲಿ ಐಪಿಎಲ್ ಮೊದಲ ಪಂದ್ಯ ನಡೆದಿತ್ತು. ಆ ಪಂದ್ಯದಲ್ಲಿ Kolkata Knight Riders ವಿರುದ್ಧ ಆಡಿದ ಆರ್ಸಿಬಿಗೆ Brendon McCullum ಅಜೇಯ 158 ರನ್‌ಗಳ ಸಿಡಿಲು ಪ್ರದರ್ಶನದ ಮೂಲಕ ದೊಡ್ಡ ಸವಾಲು ಹಾಕಿದ್ದರು. 222 ರನ್‌ಗಳ ಗುರಿ ಬೆನ್ನಟ್ಟಿದ ಆರ್ಸಿಬಿ, ರಾಹುಲ್ ದ್ರಾವಿಡ್ ಮತ್ತು ವಿರಾಟ್ ಕೊಹ್ಲಿ ಇದ್ದರೂ 140 ರನ್‌ಗಳಿಗೆ ಆಲೌಟ್ ಆಗಿ, ಚಿನ್ನಸ್ವಾಮಿಯಲ್ಲಿ ತನ್ನ ಕನಿಷ್ಠ ಸ್ಕೋರ್ ದಾಖಲಿಸಿತು.

2013ರಲ್ಲಿ ಇದೇ ಮೈದಾನದಲ್ಲಿ ನಡೆದ ಪಂದ್ಯದಲ್ಲಿ Chris Gayle ಇತಿಹಾಸ ನಿರ್ಮಿಸಿದ್ದರು. Pune Warriors India ವಿರುದ್ಧ ಕೇವಲ 30 ಎಸೆತಗಳಲ್ಲಿ ಶತಕ ಸಿಡಿಸಿದ ಗೇಲ್, ಅಜೇಯ 175 ರನ್ ಗಳಿಸಿ ಟಿ20 ಕ್ರಿಕೆಟ್‌ನಲ್ಲಿ ಅತಿ ಹೆಚ್ಚು ವೈಯಕ್ತಿಕ ಸ್ಕೋರ್ ದಾಖಲಿಸಿದರು. ಆ ದಿನ ಆರ್ಸಿಬಿ 263 ರನ್‌ಗಳ ಭಾರೀ ಮೊತ್ತ ಪೇರಿಸಿದ್ದು, ಅದು ಹಲವು ವರ್ಷಗಳ ಕಾಲ ಐಪಿಎಲ್‌ನ ಅತ್ಯುನ್ನತ ಸ್ಕೋರ್ ಆಗಿ ಉಳಿಯಿತು.

ಚಿನ್ನಸ್ವಾಮಿ ಮೈದಾನದಲ್ಲಿ ಆರ್ಸಿಬಿಯ ಪ್ರದರ್ಶನ ಸಮಬಲದಲ್ಲಿದೆ. ಈವರೆಗೆ ಆಡಿದ ಪಂದ್ಯಗಳಲ್ಲಿ 48 ಗೆಲುವು ಮತ್ತು 46 ಸೋಲು ದಾಖಲಿಸಿರುವ ತಂಡ, ಒಂದು ಪಂದ್ಯವನ್ನು ಟೈ ಮಾಡಿಕೊಂಡಿದೆ. ತವರು ಮೈದಾನದ ಅನುಭವ ಮತ್ತು ಪಿಚ್‌ನ ಪರಿಚಯವನ್ನು ಬಳಸಿಕೊಂಡು ಇಂದು ಗೆಲುವಿನ ಸಂಖ್ಯೆಯನ್ನು ಹೆಚ್ಚಿಸಿಕೊಳ್ಳುವ ವಿಶ್ವಾಸದಲ್ಲಿದೆ.

ತಮ್ಮ ತವರು ಮೈದಾನದಲ್ಲಿ ಅತಿ ಹೆಚ್ಚು ಪಂದ್ಯ ಆಡಿದ ತಂಡಗಳ ಪಟ್ಟಿಯಲ್ಲಿ ಆರ್ಸಿಬಿ ಮೊದಲ ಸ್ಥಾನದಲ್ಲಿದೆ. ಇದರ ನಂತರ Kolkata Knight Riders ಈಡನ್ ಗಾರ್ಡನ್ಸ್‌ನಲ್ಲಿ 98 ಪಂದ್ಯಗಳು ಮತ್ತು Mumbai Indians ವಾಂಖೆಡೆ ಮೈದಾನದಲ್ಲಿ 95 ಪಂದ್ಯಗಳನ್ನು ಆಡಿವೆ. ಈ ಸಾಧನೆ ಬೆಂಗಳೂರು ಅಭಿಮಾನಿಗಳ ಉತ್ಸಾಹ ಮತ್ತು ತಂಡದ ಮೇಲೆ ಇರುವ ಪ್ರೀತಿಯನ್ನು ತೋರಿಸುತ್ತದೆ.