ಉಡುಪಿ: ಉಡುಪಿ–ಮಣಿಪಾಲ ಸಂಪರ್ಕದ ಪ್ರಮುಖ ಯೋಜನೆ – ಇಂದ್ರಾಳಿ ರೈಲ್ವೆ ಓವರ್ ಬ್ರಿಡ್ಜ್ – ಕೊನೆಗೂ ಉದ್ಘಾಟನೆಗೆ ಸಜ್ಜಾಗಿದೆ. ದೀರ್ಘಕಾಲದಿಂದ ಜನರ ನಿರೀಕ್ಷೆಯಲ್ಲಿದ್ದ ಈ ಸೇತುವೆ ನಾಳೆ (ಸೆಪ್ಟೆಂಬರ್ 21) ಬೆಳಿಗ್ಗೆ 11 ಗಂಟೆಗೆ ಉದ್ಘಾಟನೆಗೊಳ್ಳಲಿದೆ. ರೈಲ್ವೆ ಮತ್ತು ಜಲಶಕ್ತಿ ರಾಜ್ಯ ಸಚಿವ ವಿ. ಸೋಮಣ್ಣ ಅವರು ನೂತನ ಸೇತುವೆಯನ್ನು ಉದ್ಘಾಟಿಸಲಿದ್ದಾರೆ.

ಇಂದ್ರಾಳಿ ಓವರ್ ಬ್ರಿಡ್ಜ್ ರಾಷ್ಟ್ರೀಯ ಹೆದ್ದಾರಿ 169ಎ ಯ ಭಾಗವಾಗಿದ್ದು, ಉಡುಪಿ ಮತ್ತು ಮಣಿಪಾಲ ನಡುವಿನ ಸಂಚಾರ ದಟ್ಟಣೆಗೆ ಪರಿಹಾರ ನೀಡುವ ಮಹತ್ವದ ಸೇತುವೆಯಾಗಿದೆ. ಈ ಯೋಜನೆ ಹಲವು ವರ್ಷಗಳ ವಿಳಂಬಕ್ಕೆ ಗುರಿಯಾಗಿತ್ತು. ವಿನ್ಯಾಸ ಬದಲಾವಣೆ, ವಿವಿಧ ಇಲಾಖೆಗಳ ಅನುಮೋದನೆ ಹಾಗೂ ತಾಂತ್ರಿಕ ಅಡಚಣೆಗಳಿಂದ ಕಾಮಗಾರಿ ನಿಧಾನವಾಗಿ ಸಾಗಿತ್ತು. ಇದರಿಂದಾಗಿ ಹಲವಾರು ಪ್ರತಿಭಟನೆಗಳು ಕೂಡ ನಡೆದಿದ್ದವು. ಆದರೆ ಇದೀಗ ಸೇತುವೆ ಪೂರ್ಣಗೊಂಡು ಉದ್ಘಾಟನೆಗೆ ಸಿದ್ಧವಾಗಿದೆ.

ಸೇತುವೆಯ ತಾಂತ್ರಿಕ ವೈಶಿಷ್ಟ್ಯಗಳು:
ಉದ್ದ ಸುಮಾರು 58 ಮೀಟರ್, ಸಿಂಗಲ್ ಸ್ಪಾನ್ ಬೋ-ಸ್ಟ್ರಿಂಗ್ ಗಿರ್ಡರ್ ವಿನ್ಯಾಸ.
ಅಗಲ 12.5 ಮೀಟರ್, ಎರಡೂ ಬದಿಯಲ್ಲಿ 1.5 ಮೀಟರ್ ಪಾದಚಾರಿಗಳ ದಾರಿ.
ನಿರ್ಮಾಣಕ್ಕೆ ಬಳಸಿರುವ ಉಕ್ಕು: ಸುಮಾರು 420 ಟನ್ ಪೂರ್ವಸಿದ್ಧ ಗಿರ್ಡರ್ಗಳು.

ಈ ಓವರ್ ಬ್ರಿಡ್ಜ್ ಉದ್ಘಾಟನೆಯಿಂದ ಉಡುಪಿ–ಮಣಿಪಾಲ ಮಾರ್ಗದ ಸಂಚಾರ ದಟ್ಟಣೆ ಹಾಗೂ ಅಪಘಾತ ಭೀತಿ ಕಡಿಮೆಯಾಗಲಿದೆ. ಸಾವಿರಾರು ವಿದ್ಯಾರ್ಥಿಗಳು, ಉದ್ಯೋಗಿಗಳು, ರೈತರು ಸೇರಿದಂತೆ ದಿನನಿತ್ಯ ಸಂಚರಿಸುವವರಿಗೆ ಇದು ದೊಡ್ಡ ಅನುಕೂಲವಾಗಲಿದೆ.
ಸ್ಥಳೀಯರು ವರ್ಷಗಳಿಂದ ಕಾಯುತ್ತಿದ್ದ ಈ ಸೇತುವೆ ಇದೀಗ ಸಾರ್ವಜನಿಕ ಬಳಕೆಗೆ ತೆರೆಯುತ್ತಿರುವುದು, ಉಡುಪಿ ಜಿಲ್ಲೆಯ ಅಭಿವೃದ್ಧಿಯ ಪ್ರಮುಖ ಹೆಜ್ಜೆಯಾಗಿದೆ.