ಕೇಂದ್ರ ಸರ್ಕಾರದ ಜಿಎಸ್​ಟಿ ಪರಿಷ್ಕರಣೆ ಹಿನ್ನೆಲೆ ಐಸಿಇ (ಆಂತರಿಕ ದಹನಕಾರಿ ಇಂಜಿನ್​) ವಾಹನಗಳ ಬೆಲೆಗಳು ಕಡಿಮೆಯಾಗುವ ಸಾಧ್ಯತೆ ಇದೆ ಎಂದು ಟಿವಿಎಸ್ ಮೋಟಾರ್ ಕಂಪನಿ ಸಿಇಓ ಕೆ.ಎನ್​.ರಾಧಕೃಷ್ಣನ್ ಸೋಮವಾರ(ಸೆ. 08) ಹೇಳಿದ್ದಾರೆ ಎಂದು ವರದಿಯಾಗಿದೆ.ಜಿಎಸ್‌ಟಿ ಕೌನ್ಸಿಲ್ ಐಸಿಇ ವಾಹನಗಳ ಮೇಲಿನ ಜಿಎಸ್‌ಟಿ ದರವನ್ನು ಶೇ.28 ರಿಂದ ಶೇ.18 ಕ್ಕೆ ಇಳಿಕೆ ಹಿನ್ನೆಲೆ ಮಾತನಾಡಿರುವ ಅವರು, ಜಿಎಸ್‌ಟಿ ದರ ತರ್ಕಬದ್ಧಗೊಳಿಸುವಿಕೆಯು ಒಂದು ದಿಟ್ಟ ಮತ್ತು ಪರಿವರ್ತನಾತ್ಮಕ ಕ್ರಮವಾಗಿದ್ದು ಅದು ಸಮಾಜದಾದ್ಯಂತ ಬಳಕೆಯನ್ನು ವೇಗಗೊಳಿಸುತ್ತದೆ. ಜಿಎಸ್‌ಟಿ ದರ ಕಡಿತದ ಸಂಪೂರ್ಣ ಪ್ರಯೋಜನವನ್ನು ನಮ್ಮ ಐಸಿಇ ಪೋರ್ಟ್‌ ಫೋಲಿಯೊದಾದ್ಯಂತ ಗ್ರಾಹಕರಿಗೆ ವರ್ಗಾಯಿಸುತ್ತೇವೆ ಎಂದು ಹೇಳಿದ್ದಾರೆ.

ಕಂಪನಿಯ ಉತ್ಪನ್ನಗಳ ಮೇಲೆ ಗಮನಾರ್ಹ ಉಳಿತಾಯವಾಗಲಿದೆ. ಜಿಎಸ್‌ಟಿ ದರಗಳಲ್ಲಿನ ಸಂಭಾವ್ಯ ಕಡಿತವು ಉತ್ಪಾದನಾ ವೆಚ್ಚವನ್ನು ತಗ್ಗಿಸಿ, ಅಂತಿಮವಾಗಿ ಗ್ರಾಹಕರಿಗೆ ಲಾಭವನ್ನು ಒದಗಿಸಬಹುದು. ಗ್ರಾಹಕರಿಗೆ ಕಡಿಮೆ ಬೆಲೆಯಲ್ಲಿ ವಾಹನಗಳು ದೊರೆಯುವಂತೆ ಮಾಡಬಹುದು ಎಂದಿದ್ದಾರೆ.ಎಲೆಕ್ಟ್ರಿಕ್ ವಾಹನಗಳು ಯಾವುದೇ ಪರಿಣಾಮ ಬೀರುವುದಿಲ್ಲ ಮತ್ತು ಶೇಕಡಾ 5 ರಷ್ಟು ಜಿಎಸ್‌ಟಿಯ ರಿಯಾಯಿತಿ ದರವನ್ನು ಆನಂದಿಸುತ್ತಲೇ ಇರುತ್ತವೆ. ಈ ಪ್ರಯೋಜನಗಳು ಸೆಪ್ಟೆಂಬರ್ 22, 2025 ರಿಂದ ಗ್ರಾಹಕರಿಗೆ ಲಭ್ಯವಿರುತ್ತವೆ ಎಂದು ಹೇಳಿದ್ದಾರೆ. ಇದಲ್ಲದೆ, ಜಿಎಸ್‌ಟಿ ದರ ಕಡಿತದಿಂದಾಗುವ ಪ್ರಯೋಜನಗಳ ಬಗ್ಗೆ ಗ್ರಾಹಕರಿಗೆ ತಿಳಿಸಲು ವ್ಯಾಪಕ ಸಂವಹನ ಕ್ರಮಗಳನ್ನು ಕೈಗೊಳ್ಳುವುದಾಗಿ ಅವರು ತಿಳಿಸಿದ್ದಾರೆ.

ಕಳದ ಜಿಎಸ್​ಟಿ ಕೌನ್ಸಿಲ್ ಸಭೆಯಲ್ಲಿ ತೆರಿಗೆ ಸ್ಲಾಬ್​ಗಳನ್ನು ಶೇ.5 ಮತ್ತು ಶೇ. 18ಕ್ಕೆ ಇಳಿಸಲಾಗಿದೆ. ಅದರಲ್ಲಿ350 ಸಿಸಿ ವರೆಗಿನ ಮೋಟಾರ್‌ಸೈಕಲ್‌ಗಳು, ಎಸಿಗಳು, ಡಿಶ್‌ವಾಶರ್‌ಗಳು ಮತ್ತು ಟಿವಿಗಳಂತಹ ಗ್ರಾಹಕ ಎಲೆಕ್ಟ್ರಾನಿಕ್ಸ್‌ಗಳಿಗೆ ಸಹ ಪ್ರಸ್ತುತ ಶೇಕಡಾ 28 ರಿಂದ ಶೇಕಡಾ 18 ರಷ್ಟು ಕಡಿಮೆ ಜಿಎಸ್‌ಟಿ ವಿಧಿಸಲಾಗುತ್ತದೆ.